អន្តរជាតិ
ប្រធានាធិបតីកូរ៉េខាងត្បូង៖ ការចរចារឿងកីឡាអូឡាំពិកនឹងនាំដល់ការចរចារឿងនុយក្លេអ៊ែរ
× នៅថ្ងៃទី២២ ខែមករា ប្រធានាធិបតីកូរ៉េខាងត្បូង មូន ចេអ៊ីន និយាយថា ការចរចារវាងកូរ៉េទាំងពីរស្ដីពីការចូលរួមក្នុងព្រឹត្តិការណ៍អូឡាំពិកនាពេលកន្លងមក អាចជាជំហានដ៏សំខាន់សម្រាប់ការចាប់ផ្ដើមការចរចានុយក្លេអ៊ែរឡើងវិញ។ ប៉ុន្តែលោក មូន ចេអ៊ីន មិនអាចធានាថា ស្ថានភាពសព្វថ្ងៃអាចនៅយូរបានដល់ណាឡើយ។ ប្រធានាធិបតីកូរ៉េខាងត្បូងក៏ស្នើឲ្យប្រជាជនទាំងអស់គាំទ្រវត្តមានកូរ៉េខាងជើងក្នុងព្រឹត្តិការណ៍នេះ។
ការចូលរួមរបស់កូរ៉េខាងជើងក្នុងព្រឹត្តិការណ៍អូឡាំពិករដូវរងារឆ្នាំ២០១៨ ត្រូវបានប្រធានាធិបតីកូរ៉េខាងត្បូង មូន ចេអ៊ីន ចាត់ទុកជាឱកាសកម្រដើម្បីចាប់ផ្ដើមឡើងវិញនូវការចរចាស្ដីពីកម្មវិធីនុយក្លេអ៊ែរ។ បើតាមលោក មូន ចេអ៊ីន ការចរចារវាងកូរ៉េខាងត្បូង និងកូរ៉េខាងជើងប៉ុន្មានលើកនេះ អាចនាំដល់ការជួបតទល់រវាងអាមេរិក និងកូរ៉េខាងជើង ទោះជាគេមិនទាន់ដឹងថា កិច្ចសន្ទនានេះអាចបន្តដល់ពេលណាឡើយ។
ក្នុងជំនួបជាមួយទីប្រឹក្សានៅវិមានប្រធានាធិបតីនៅថ្ងៃទី២២ ខែមករា លោក មូន ចេអ៊ីន បញ្ជាក់ថា សព្វថ្ងៃ យើងជួបឱកាសដ៏មានតម្លៃដើម្បីដោះស្រាយវិបត្តិនុយក្លេអ៊ែរកូរ៉េខាងជើង និងបង្កើតសន្តិភាពនៅឧបទ្វីបកូរ៉េ។ ដោយសារតែព្រឹត្តិការណ៍អូឡាំពិក និងប៉ារ៉ាឡាំពិកនៅទីក្រុងព្យុងឆាង ទើបកូរ៉េទាំងពីរអាចអង្គុយចរចាគ្នាបាន ហើយការចរចាគ្នានេះកើតឡើង ស្របពេលដែលលទ្ធភាពផ្ទុះសង្គ្រាមកាន់តែមកដល់។ នេះបើតាមទីភ្នាក់ងារព័ត៌មាន Yonhap ។
ការលើកឡើងរបស់មេដឹកនាំកូរ៉េខាងត្បូងធ្វើឡើង ក្រោយពេលសារធាណមតិកូរ៉េខាងត្បូងមិនសូវសប្បាយចិត្តចំពោះការព្រមព្រៀងរវាងកូរ៉េទាំងពីរក្នុងការបង្កើតក្រុមកីឡាហុកគីស្ត្រីរួមគ្នាដើម្បីប្រកួតក្នុងព្រឹត្តិការណ៍អូឡាំពិក ចាប់ពីថ្ងៃទី៩ ដល់ថ្ងៃទី២៥ ខែកុម្ភៈ។ លោក មូន ចេអ៊ីន បានស្នើឲ្យប្រជាជនគាំទ្រការសម្រេចចិត្តនេះ ព្រោះវាអាចជួយឲ្យកូរ៉េជួបទល់គ្នា ក៏ដូចជាជួយដោះស្រាយបញ្ហានុយក្លេអ៊ែរបានទៀតផង។
លោក មូន ចេអ៊ីន បានប្រៀបធៀបកិច្ចសន្ទនាជាមួយកូរ៉េខាងជើងទៅនឹងទៀនកណ្ដាលខ្យល់ ដែលត្រូវការការគាំទ្រ ដ្បិតឱកាសនេះនឹងមិនអាចកើតឡើងម្ដងទៀតស្រួលៗឡើយ។ លើសពីនេះ ការចរចារវាងកូរ៉េទាំងពីរនឹងក្លាយជាជណ្ដើរទៅកាន់ការជួបទល់មុខរវាងអាមេរិក និងកូរ៉េខាងជើង ដើម្បីបញ្ចប់វិបត្តិនុយក្លេអ៊ែរ ហើយការរីកចម្រើន និងសន្តិភាព នឹងនៅតែបន្តវត្តមានរបស់ខ្លួនឧបទ្វីបកូរ៉េដដែល។
ផ្ទុយពីគំនិតសុទិដ្ឋិនិយមរបស់កូរ៉េខាងត្បូង កូរ៉េខាងជើងហាក់មិនអើពើរឿងចរចាស្ដីពីនុយក្លេអ៊ែរឡើយ។ កូរ៉េខាងជើងព្រមចូលរួមប្រកួតកីឡាអូឡាំពិកមែនពិត តែកូរ៉េខាងជើងអះអាងម្ដងហើយម្ដងទៀតថា កម្មវិធីនុយក្លេអ៊ែររបស់ខ្លួនមិនមែនសម្រាប់ចរចាឡើយ។ សម្រាប់ក្រុងព្យុងយ៉ាង នុយក្លេអ៊ែរនេះជាអាយុជីវិតរបស់ខ្លួន ទោះជាត្រូវរងទណ្ឌកម្ម និងសម្ពាធខ្លាំងយ៉ាងក៏ដោយចុះ ក៏មិនព្រមបោះបង់ឡើយ៕
Tag:
កូរ៉េខាងត្បូង
កូរ៉េខាងជើង
មូន ចេអ៊ីន
© រក្សាសិទ្ធិដោយ thmeythmey.com