អន្តរជាតិ
ឧបនាយករដ្ឋមន្ត្រីសិង្ហបុរី៖ សិង្ហបុរីត្រូវដឹកនាំដោយមនុស្សពេញកម្លាំងស្វាហាប់ ឧបនាយករដ្ឋមន្រ្តីសិង្ហបុរីលោក Teo Chee Hean (រូបភាព៖ Today Online)
× ឧបនាយករដ្ឋមន្ត្រីសិង្ហបុរី លោក Teo Chee Hean នៅថ្ងៃទី២២ ខែមករា និយាយថា មេដឹកនាំប្រទេសមួយត្រូវជាមនុស្សពេញកម្លាំង និងស្វាហាប់ ហើយមេដឹកនាំប្រទេសមួយមិនអាចជាមនុស្សចាស់ជរាបានឡើយ។ បើតាមលោក Teo Chee Hean ការផ្លាស់ប្ដូរមេដឹកនាំជារឿងសំខាន់សម្រាប់ប្រទេសមួយ។
ក្នុងសន្និសីទស្ដីពី Singapore Perspectives 2018 លោក Teo Chee Hean ឧបនាយករដ្ឋមន្ត្រីសិង្ហបុរី បានលើកឡើងពីភាពចាំបាច់សម្រាប់ប្រទេសមួយក្នុងការផ្លាស់ប្ដូរថ្នាក់ដឹកនាំថ្មីវ័យក្មេង ជំនួសមេដឹកនាំវ័យចំណាស់។ ការផ្ទេរតំណែងទៅមនុស្សជំនាន់ក្រោយជារឿងសំខាន់ តែលោក Teo Chee Hea អះអាងថា ការរក្សាវត្តមានមេដឹកនាំចាស់ៗក្នុងជួររដ្ឋាភិបាលក៏ជារឿងមានប្រយោជន៍ដែរ។
«អ្នកមិនចង់ឲ្យប្រទេសមួយក្លាយជាចំណាប់ខ្មាំងនៃសុខភាពមនុស្សមួយក្រុមដែលមានវ័យចំណាស់ និងកំពុងតែចាស់ទៅៗពីមួយឆ្នាំទៅមួយឆ្នាំឡើយ ដូច្នេះការផ្លាស់ប្ដូរមេដឹកនាំថ្មី គឺជារឿងចំបាច់។» នេះជាសម្ដីរបស់លោក Teo វ័យ៦៣ឆ្នាំ ឆ្លើយទៅនឹងអ្នកចូលរួមកម្មវិធី ដែលសួរលោកជុំវិញតួនាទីមន្ត្រីចាស់ៗក្នុងរដ្ឋាភិបាល និងសេវាសាធារណៈ ដើម្បីជាតំណាងឲ្យមនុស្សចាស់ដែលមានចំនួនកើនឡើងក្នុងបុរីរដ្ឋមួយនេះ។
យោងតាមការផ្សាយរបស់សារព័ត៌មាន Strait Times លោក Teo ដែលទទួលបន្ទុកកិច្ចការសេវាសាធារណៈដែរនោះ ក៏សង្ឃឹមដែរថា មេដឹកនាំជំនាន់ក្រោយនឹងមើលឃើញពីផលប្រយោជន៍ក្នុងរក្សាមេដឹកនាំចាស់ៗក្នុងជួររដ្ឋាភិបាលដើម្បីធានានិរន្តរភាព។ បើតាមឧបនាយករដ្ឋមន្ត្រីរូបនេះ ការរក្សាមន្ត្រីចាស់គឺជាចំណុចពិសេសរបស់ប្រព័ន្ធនយោបាយសិង្ហបុរី។ នៅសិង្ហបុរី អតីតនាយករដ្ឋមន្ត្រីទាំងពីរ ត្រូវបានតែងតាំងជាទេសរដ្ឋមន្ត្រី និងរដ្ឋមន្ត្រីប្រឹក្សាយោបល់ បន្ទាប់ពីលាលែងពីតំណែង។
លោក លី ក្វាន់យូ អតីតនាយករដ្ឋមន្ត្រីទីមួយរបស់សិង្ហបុរី និងលោក Goh Chok Tong អតីតនាយករដ្ឋមន្ត្រីទីពីរ ត្រូវបានតែងតាំងជារដ្ឋមន្ត្រីប្រឹក្សាយោបល់ និងជាទេសរដ្ឋមន្ត្រីកិត្តិយស ជាបន្តបន្ទាប់ ក្រោយចាកចេញពីអំណាច។ នាយករដ្ឋមន្ត្រីបច្ចុប្បន្នលោក លី សៀនឡុង ដែលជាកូនប្រុសលោក លី ក្វាន់ យូ បានរក្សាមេដឹកនាំទាំងពីរនៅក្នុងរដ្ឋាភិបាលរបស់លោកតាំងពីកាន់តំណែងក្នុងឆ្នាំ២០០៤ មកម្ល៉េះ។
ដោយឡែក លោក លីន សៀនឡុង វិញ ក៏អនុវត្តតាមេដឹកនាំជំនាន់មុនដែរ ដោយលោកនឹងចូលនិវត្តន៍មុនឈានដល់វ័យ៧០ឆ្នាំ។ ពោល គឺនាយករដ្ឋមន្ត្រីទីបីរបស់សិង្ហបុរីនឹងចាកចេញពីតំណែង ក្រោយការបោះឆ្នោតសកលឆ្នាំ២០២១ ដែលគេរំពឹងថា បក្សកាន់អំណាចសកម្មភាពប្រជាជន (PAP) នឹងបន្តឈ្នះឆ្នោតទៀត។ មេដឹកនាំវ័យក្មេងជំនាន់ទីបួន នឹងដឹកនាំប្រទេសជឿនលឿននេះបន្តទៀត ហើយលោក លី ទំនងជាមានមុខក្នុងរដ្ឋាភិបាលតាមលំអានចាស់៕
Tag:
សិង្ហបុរី
លី សៀនឡុង
Teo Chee Hean
© រក្សាសិទ្ធិដោយ thmeythmey.com