អន្តរជាតិ
ប៉ាឡេស្ទីនស្នើឲ្យសហភាពអឺរ៉ុបទទួលស្គាល់ខ្លួនជារដ្ឋឯករាជ្យ ឆ្លើយតប ដូណាល់ ត្រាំ រូបភាព៖ AFP
× អាជ្ញាធរប៉ាឡេស្ទីនប្រញាប់ប្រញាល់រត់រកការគាំទ្រពីសហភាពអឺរ៉ុប ខណៈខ្លួនកំពុងមានបញ្ហាជាមួយសហរដ្ឋអាមេរិក។ គេរំពឹងថា លោក ម៉ាមូត អាបាស ទំនងជានឹងសុំឲ្យសហភាពអឺរ៉ុបជួយទទួលស្គាល់ប៉ាឡេស្ទីនជារដ្ឋផ្លូវការ ដូចដែលអាមេរិកទទួលស្គាល់ក្រុងហ្ស៊េរុយសាឡិមជារដ្ឋធានីអ៊ីស្រាអែលដែរ។
ប្រធានាធិបតីប៉ាឡេស្ទីន លោក ម៉ាមូត អាបាស ចាប់ផ្តើមដំណើរទស្សនកិច្ចរបស់ខ្លួននៅសហភាពអឺរ៉ុបដើមសប្តាហ៍នេះ ដើម្បីស្វះស្វែងរកការគាំទ្រពីអង្គការតំបន់ដ៏មានឥទ្ធិពលនេះ។ ទស្សនកិច្ចរបស់លោកកើតឡើងក្រោយពេលដែលប្រធានាធិបតីអាមេរិក ដូណាល់ ត្រាំ ប្រកាសទទួលស្គាល់ក្រុងហ្ស៊េរុយសាឡិមជារដ្ឋធានីរបស់អ៊ីស្រាអែលជាផ្លូវការ។
ក្នុងដំណើរទស្សនកិច្ចនេះ លោក អាបាស នឹងជួបពិភាក្សាជាមួយប្រមុខការទូតសហភាពអឺរ៉ុបលោកស្រី Federica Mogherini ដើម្បីពិភាក្សាពីទំនាក់ទំនងសហភាពអឺរ៉ុបជាមួយប៉ាឡេស្ទីន ក៏ដូចជាបញ្ហាពាក់ព័ន្ធនឹងការកសាងសន្តិភាពនៅមជ្ឈិមបូព៌ា។
តាមទីភ្នាក់ងារព័ត៌មាន AFP រដ្ឋមន្ត្រីការបរទេសប៉ាឡេស្ទីន Riad al-Malki បានថ្លែងពីក្រុងព្រុចសែលថា ក្នុងដំណើរទស្សនកិច្ចនេះប្រមុខរដ្ឋប៉ាឡេស្ទីននឹងឆ្លៀតឱកាសជំរុញឲ្យសហភាពអឺរ៉ុបទទួលស្គាល់ប៉ាឡេស្ទីនជារដ្ឋឯករាជ្យ ដើម្បីឆ្លើយតបនឹងការសហរដ្ឋអាមេរិកដែលទទួលស្គាល់ក្រុងហ្ស៊េរុយសាឡិមជារដ្ឋធានីផ្លូវការកន្លងមក។ លោកក៏រំពឹងទទួលបានកិច្ចព្រមព្រៀងភ្ជាប់ទំនាក់ទំនងជាមួយសហភាពអឺរ៉ុបផងដែរ ក្នុងឋានៈជារដ្ឋផងដែរ។
យ៉ាងណាក៏ដោយចុះ មន្ត្រីទូតសហភាពអឺរ៉ុបបានលួចបង្ហើបថា ទោះជាមានការអំពាវនាវពីខាងប៉ាឡេស្ទីនក៏ដោយ ការទទួលស្គាល់ប៉ាឡេស្ទីនជារដ្ឋឯករាជ្យនោះមិនមែនជាគោលដៅរបស់សហភាពអឺរ៉ុបឡើយ។ មកដល់បច្ចុប្បន្ន សហភាពអឺរ៉ុបមិនមានជំហរក្នុងការធ្វើបែបនោះឡើយ ប៉ុន្តែអង្គការតំបន់នេះបើកផ្លូវទុកឲ្យរដ្ឋសមាជិករបស់ខ្លួននីមួយៗពិចារណាទទួលស្គាល់ប៉ាឡេស្ទីនតាមចិត្តរបស់ខ្លួនចុះ។ ចំណែកកិច្ចព្រមព្រៀងភ្ជាប់ទំនាក់ទំនងនោះ វាប្រហែលជាមិនអាចទៅរួចឡើយព្រោះប៉ាឡេស្ទីនមិនមានសមត្ថភាពពេញលេញឡើយ។
តាមសម្តីប្រមុខការទូតប៉ាឡេស្ទីនខាងលើ លោក អាបាស ក៏នឹងជជែកពីដំណើរកសាងសន្តិភាពរវាងអ៊ីស្រាអែល និងប៉ាឡេស្ទីនផងដែរ។លោក អាបាស បង្ហាញការប្តេជ្ញាចិត្តពេញលេញក្នុងការចូលរួមកសាងសន្តិភាព ហើយលោកក៏នឹងទទូចឲ្យសហភាពអឺរ៉ុបបង្កើនតួនាទីរបស់ខ្លួនឲ្យធំជាងមុនក្នុងការជួយជ្រោមជ្រែងការកសាងសន្តិភាពនេះដែរ។
កន្លងមកមេដឹកនាំប៉ាឡេស្ទីនបានបញ្ជាក់ច្បាស់ហើយថា ខ្លួននឹងមិនទទួលយកអាមេរិកជាសន្ធានការីជួយសម្រុះសម្រួលការដោះស្រាយជម្លោះប៉ាឡេស្ទីន និងអ៊ីស្រាអែលទៀតឡើយ។ អាមេរិកលែងជាភាគីឯករាជ្យ និងមិនលម្អៀងទៀតហើយ ក្រោយការទទួលស្គាល់ហ្ស៊រុយសាឡិមជារដ្ឋធានីអ៊ីស្រាអែលនោះ៕
Tag:
ប៉ាឡេស្ទីន
ហ្ស៊េរុយសាឡិម
ម៉ាមូត អាបាស
សហភាពអឺរ៉ុប
© រក្សាសិទ្ធិដោយ thmeythmey.com