អន្តរជាតិ
អតីតប្រធានាធិបតីម៉ាល់ឌីវ ថា ចិនលេបយកកោះខ្លួនជាច្រើន តែរដ្ឋាភិបាលឲ្យបង្ហាញភស្តុតាង អតីតប្រធានាធិបតីម៉ាល់ឌីវ Mohamed Nasheed (រូបភាព៖ AFP)
× អតីតប្រធានាធិបតីម៉ាល់ឌីវ Mohamed Nasheed បានចោទចិនថា កំពុងលេបយកកោះរបស់ម៉ាល់ឌីវជាច្រើន ដែលមានទីតាំងនៅក្នុងមហាសមុទ្រឥណ្ឌា។ បើតាមលោក Nasheed សកម្មភាពរបស់ចិនបង្កជាការគំរាមកំហែងទៅលើសន្តិភាព និងស្ថិរភាពនៃមហាសមុទ្រមួយនេះ។ យ៉ាងណាមិញ រដ្ឋាភិបាលម៉ាល់ឌីវឯណោះ បានទាត់ចោលការចោទរបស់លោក Nasheed ហើយទាមទារភស្តុតាងថែមទៀត។
មេដឹកនាំនិរទេសខ្លួនរបស់ម៉ាល់ឌីវ Mohamed Nasheed បានរិះគន់ការវិនិយោគរបស់ចិននៅក្នុងប្រទេសរបស់លោក ដែលគ្មានតម្លាភាព និងមិនគោរពនីតិវិធីអ្វីឡើយ។ ដោយហៅការវិនិយោគរបស់ចិនជាទិញអធិបតេយ្យរបស់ម៉ាល់ឌីវ លោក Nasheed បានស្នើឲ្យប្រជាជនម៉ាល់ឌីវទាំងអស់ប្រើប្រាស់ឱកាសបោះឆ្នោតប្រធានាធិបតីក្នុងឆ្នាំ២០១៨ ដើម្បីរើបម្រាសខ្លួនពីឥទ្ធិពលរបស់ចិន មុននឹងមានវាសនាដូចស្រីលង្កា។
ប្រាប់អ្នកសារព័ត៌មាននៅស្រីលង្កានៅថ្ងៃទី២២ ខែមករា លោក Nasheed ដែលត្រូវតុលាការម៉ាល់ឌីវកាត់ទោសជាប់គុក១៣ឆ្នាំពីបទភេរវកម្ម និយាយថា ការលេបយកកោះបានកើតឡើងក្រោមរូបភាពវិនិយោគតាមរយៈការទិញដី និងហេដ្ឋារចនាសម្ព័ន្ធធំៗ ហើយក៏ទិញអធិបតេយ្យម៉ាល់ឌីវតែម្ដង។ លោកអះអាងថា កោះតូចៗយ៉ាងតិចចំនួន១៦ ទៅ១៧ ត្រូវលេបយក។ បើតាមទីភ្នាក់ងារព័ត៌មាន Reuters ។
ការចោទប្រកាន់របស់អតីតប្រធានាធិបតីរូបនេះ ត្រូវបានអគ្គរដ្ឋទូតម៉ាល់ឌីវប្រចាំស្រីលង្កា Mohamed Hussain Shareef ទាត់ចោល។ តំណាងម៉ាល់ឌីវនិយាយថា រដ្ឋធម្មនុញ្ញបានហាមការគ្រប់គ្រងកោះណាមួយ បើមិនបានបោះទុនវិនិយោគធំទេនោះ។ លោកបន្តថា៖ «យោងតាមច្បាប់ វិនិយោគិនអាចគ្រប់គ្រងកោះបាន លុះត្រាបោះទុនលើសមួយពាន់លានដុល្លារ។ មកទល់ពេលនេះ មិនទាន់មានការរកស៊ីទ្រង់ទ្រាយធំបែបនេះឡើយ។ ចំពោះការជួលវិញ ក្រុមហ៊ុនចិនបានជួលរីសតជាច្រើនមែន»។
លោក Shareef បានប្រាប់ឲ្យលោក Nasheed បញ្ចេញភស្តុតាងដើម្បីគាំទ្រអំណះអំណាងរបស់ខ្លួន ដោយយ៉ាងហោចណាស់ក៏ប្រាប់ឈ្មោះកោះដែលចិនលេបយកដែរ។ ប៉ុន្តែលោក Nasheed លើកឡើងថា សកម្មភាពរបស់ចិនមិនត្រឹមតែគំរាមម៉ាល់ឌីវឡើយ តែប៉ះពាល់សន្តិសុខតំបន់ទាំងមូល។ ក្នុងន័យនេះ អតីតប្រមុខរដ្ឋម៉ាល់ឌីវដដែលនេះបានស្នើឲ្យប្រទេសទាំងអស់ងើបឡើងប្រឆាំងចិន ជាពិសេសប្រឆាំងការលក់អធិបតេយ្យម៉ាល់ឌីវតែម្ដង។
សូមបញ្ជាក់ថា លោក Nasheed គឺជាប្រធានាធិបតីឆ្លងកាត់តាមការបោះឆ្នោតបែបប្រជាធិបតេយ្យមុនគេរបស់ប្រទេសកោះក្នុងមហាសមុទ្រឥណ្ឌា ចាប់ពីឆ្នាំ២០០៨ ដល់ឆ្នាំ២០១២ ។ លោកត្រូវបានបណ្ដេញពីអំណាចក្នុងឆ្នាំ២០១២ ។ ក្រោយមកលោកត្រូវបានកាត់ទោសរយៈពេល១៣ឆ្នាំ ដែលរឿងនេះបានរារាំងលោកពីការចូលរួមការបោះឆ្នោតឆ្នាំ២០១៨ ។ លោកកំពុងធ្វើយុទ្ធនាការដើម្បីទទួលបានសិទ្ធិចូលរួមប្រកួតឡើងវិញ៕
Tag:
ម៉ាល់ឌីវ
Mohamed Nasheed
Yameen Abdul Gayoom
© រក្សាសិទ្ធិដោយ thmeythmey.com