អន្តរជាតិ
ឥណ្ឌាបង្អួតទស្សនីយភាពរ៉ាម៉ាយ៉ាណៈ ដើម្បីពង្រឹងទំនាក់ទំនងឥណ្ឌា-អាស៊ាន
× មេដឹកនាំទាំងអស់ពីតំបន់អាស៊ាន ត្រូវបានអញ្ជើញជាភ្ញៀវកិត្តិយសនាពិធីដង្ហែព្យុះហយាត្រាគម្រប់ខួប៦៩ឆ្នាំនៃថ្ងៃសាធារណរដ្ឋ «Republic Day» នៅក្នុងក្រុងញូវដេលី នាថ្ងៃទី២៥ ខែមករា។ ជាមួយគ្នានេះផងដែរ ឥណ្ឌាបានយកទិវាបុណ្យរ៉ាម៉ាយ៉ាណៈ (Ramayana Festival) ជាមធ្យោបាយនៃការពង្រឹងទំនាក់ទំនងរវាងឥណ្ឌា និងអាស៊ាន ដែលមានអាយុកាល២៥ឆ្នាំ។
ក្រោមការរៀបចំរបស់ក្រុមប្រឹក្សាទំនាក់ទំនងវប្បធម៌ឥណ្ឌា (ICCR) ទិវាបុណ្យរ៉ាម៉ាយ៉ាណៈ ត្រូវបានរៀបចំឡើងនារយៈ៥ថ្ងៃ ដោយចាប់ផ្តើមពីថ្ងៃទី២០ រហូតដល់ថ្ងៃទី២៥ ខែវិច្ឆិកា។ ឈុតឆាកនៃទេវកថា «រ៉ាម៉ាយ៉ាណៈ» នឹងត្រូវបង្ហាញជូនភ្ញៀវកិត្តិយសទាំងអស់ដែលជាថ្នាក់ដឹកនាំពីឥណ្ឌូណេស៊ី សិង្ហបុរី ហ្វីលីពីន ម៉ាឡេស៊ី ព្រុយណេ ថៃ ឡាវ មីយ៉ាន់ម៉ា វៀតណាម និងកម្ពុជា។
លោក Norendra Modi នាយករដ្ឋមន្ត្រីឥណ្ឌា បានសរសេរនៅលើ Twitter របស់ខ្លួនថា ទស្សនីយភាពរ៉ាម៉ាយ៉ាណៈ នឹងឆ្លុះបញ្ចាំងពីទំនាក់ទំនងកាន់តែជ្រាលជ្រៅរវាងប្រជាជន និងប្រវត្តិសាស្ត្រជាមួយតំបន់អាស៊ានទាំងមូល។
វប្បធម៌ប្រទេសនៅអាស៊ានដូចជា កម្ពុជា ឥណ្ឌូណេស៊ី ហ្វីលីពីន ថៃ ឡាវ មីយ៉ាន់ម៉ា និងម៉ាឡេស៊ី សុទ្ធតែទទួលឥទ្ធិពលពីទេវកថា «Ramayana» របស់ឥណ្ឌា។ រឿង «រាមកេរ្តិ៍» ជាពិសេសឈុតឆាកសង្គ្រាមរវាងមនុស្ស យក្ស និងទេវៈ បានជ្រាបចូលមកក្នុងប្រទេសកម្ពុជា តាំងពីមុនសម័យមហានគរ មកម្ល៉េះ៕
Tag:
អាស៊ាន-ឥណ្ឌា
រ៉ាម៉ាយ៉ាណៈ
រាមកេរ្តិ៍
© រក្សាសិទ្ធិដោយ thmeythmey.com