អន្តរជាតិ
ប្រធានាធិបតីឡាវ ណែនាំយោធាឲ្យពង្រឹងសមត្ថភាពផ្ទាល់ខ្លួន និងមិត្តភាពជាមួយកងទ័ពចិននិងវៀតណាមផង
× លោកប្រធានាធិបតីឡាវ Bounnhang Vorachit បានទទូចឲ្យកងទ័ពប្រជាជនឡាវពង្រឹងសមត្ថភាពក្នុងកិច្ចការការពារ និងអភិវឌ្ឍជាតិ ដោយរក្សាកិត្យានុភាព និងភាពស្មោះត្រង់ចំពោះបក្សកុម្មុនីស្តឡាវ ទោះក្នុងកាលៈទេសៈណាក៏ដោយ។ ក្រៅពីនេះលោកក៏ដាស់តឿនឲ្យកងទ័ពពង្រឹងចំណងមិត្តភាពជាមួយកងទ័ពចិន និងវៀតណាមដែរ។
លោកប្រធានាធិបតី Bounnhang Vorachit បានថ្លែងក្នុងពិធីរម្លឹខួបនៃការបង្កើតកងទ័ពប្រជាជនឡាវ ថា កងទ័ពទាំងអស់ ត្រូវតែស្ថិតក្រោមការដឹកនាំដោយផ្ទាល់របស់បក្សកុម្មុយនីស្តឡវ ហើយត្រូវប្រយុទ្ធប្រឆាំងជាមួយនឹងចលនាប្រឆាំងនានា។ នេះបើយោងតាមការចុះផ្សាយសារព័ត៌មានឡាវ The Vientiane Time នៅថ្ងៃ២៣ មករា ។
តាមប្រភពព័ត៌មានដដែលនោះ លោកប្រធានាធិបតី បានកោតសរសើរចំពោះការបូជារបស់កងទ័ពសម្រាប់ជាតិ ការនាំយកសន្តិភាព អធិបតេយ្យ និងភាពរុងរឿងដើម្បីប្រជាជនឡាវទាំងអស់។ លោក ក៏ទទូចឲ្យកងទ័ពបន្តប្រយុទ្ធប្រឆាំងសត្រូវរួម និងប្រឹងប្រែងធ្វើការតាមមូលដ្ឋានដើម្បីជំរុញឲ្យមានការចូលរួមកាន់តែច្រើនក្នុងការរក្សាសន្តិសុខ និងពង្រឹងអំណាចរដ្ឋ។
លោក Bounnhang Vorachit ដែលជាអគ្គលេខាធិការបក្សកុម្មុយនីស្តឡាវផងដែរនោះ បានសង្កត់ធ្ងន់ទៀថា៖« កងទ័ពត្រូវតែពង្រឹងសាមគ្គីភាព និងស្នេហាជាតិ តាមបណ្តោយគោលនយោបាយរបស់បក្ស ។ ជាងនេះទៅទៀតនោះ កងទ័ពក៏ត្រូវពង្រឹងទំនាក់ទំនង និងមិត្តភាព ជាមួយសមភាគីវៀតណាម និងចិនផងដែរ»។
គួរជម្រាបផងដែរថា ឡាវ គឺជាប្រទេសមួយក្នុងចំណោម ប្រទេសទាំងប្រាំរបស់ពិភពលោក ដែលរួមមាន ចិន វៀតណាម គុយបា និងកូរ៉េខាងជើង ដែលនៅតែបន្តរបបកុម្មុយនីស្ត ។ ចិន និងវៀតណាម ត្រូវបានគេមើលឃើញថា ជាសម្ព័ន្ធមិត្តជិតស្និទ្ធបំផុតរបស់ឡាវ ក្នុងការពង្រឹងមនោគមន៍វិជ្ជាកុម្មុយនីស្ត ៕
© រក្សាសិទ្ធិដោយ thmeythmey.com