អន្តរជាតិ
មហាយក្សឥណ្ឌានឹងដាក់ដំណើរការនាវាដឹកយន្តហោះផលិតក្នុងស្រុកដំបូងត្រឹមឆ្នាំ ២០២០
× នាវាដឹកយន្តហោះចម្បាំងទីពីរបស់ឥណ្ឌាត្រូវពន្យារពេលដាក់ឲ្យដំណើរការជាផ្លូវការពីចុងឆ្នាំ ២០១៨ ទៅឆ្នាំ ២០២០ វិញដោយសារបញ្ហាបច្ចេកទេសមួយចំនួន។ នាវាដឹកយន្តហោះចម្បាំងមានឈ្មោះថា វីក្រាន់ (INS Vikrant) នេះជា ផលិតក្នុងស្រុកលើកដំបូងបំផុតរបស់ឥណ្ឌា ហើយវាជាផ្នែមួយនៃយុទ្ធសាស្ត្រពង្រឹងឥទ្ធិពលនិងអំណាចយោធារបស់ខ្លួនឲ្យសមជាមហាយក្សអាស៊ីខាងត្បូងផង។
វីក្រាន់ (Vikrant) ជាឈ្មោះផ្លូវការរបស់នាវាដឹកយន្តហោះទីពីររបស់មហាយក្សឥណ្ឌា។ វាជាប្រភេទនាវាដឹកយន្តហោះដែលត្រូវបានផលិតក្នុងស្រុកលើកដំបូងបំផុតមួយនេះ។ ដើមឡើយនាវានេះត្រូវបានគេកំណត់ដាក់ឲ្យដំណើរការនៅចុងឆ្នាំ ២០១៨នេះ ប៉ុន្តែដោយសារបញ្ហាមួយចំនួននាវានេះត្រូវពន្យារពេលចូលបម្រើការរហូតដល់ឆ្នាំ ២០២០វិញ។
យោងតាមសារព័ត៌មានឥណ្ឌា NDTV កងទ័ពជើងទឹកឥណ្ឌាបានបញ្ជាក់ថា ការពន្យារពេលដាក់ដំណើរការនាវាដឹកយន្តហោះផលិតក្នុងស្រុកនេះក៏ដោយសារការពន្យារពេលនៃការផ្គត់ផ្គង់ឧបករណ៍បរិក្ខារបំពាក់លើនាវាពីរុស្ស៊ី។ បច្ចុប្បន្ននេះកងទ័ពឥណ្ឌាទើបទទួលបានគ្រឿងបរិក្ខារ ផ្នែកអាកាសចរណ៍មួយចំនួនពីរុស្ស៊ីប៉ុណ្ណោះ។ ដូច្នេះហើយទើបបានជា គេត្រូវពន្យារកាលបរិច្ឆេទដាក់ដំណើរការនាវាបែបនេះ។
នាវាដឹកយន្តហោះវីក្រាន់ ដែលឥណ្ឌាកំពុងសាងសង់នេះជានាវាទីពីរ។ វាមានទម្ងន់ធ្ងន់រហូតដល់បួនម៉ឺនតោយ ហើយមានប្រវែងរហូតដល់ ២៦០ ម៉ែតឯណោះ។ នាវានេះដែរមានផ្លូវសម្រាប់យន្តហោះហោះឡើងរយៈចម្ងាយខ្លីចំនួនពីរដោយមានភ្ជាប់ជាមួយប្រព័ន្ធខ្សែកាបសម្រាប់ថ្ពក់ចាប់យន្តហោះចំនួនបីផង។ កងទ័ពឥណ្ឌាគ្រោងនឹង ដាក់យន្តហោះចម្បាំងរុស្ស៊ីប្រភេទ MiG 29K ចំនួន ២០គ្រឿង និងមានឧទ្ធម្ភាគចក្រចំនួន ដប់គ្រឿងផ្សេងទៀតនៅលើនាវានេះផងដែរ។
កន្លងមក ក្រសួងការពារជាតិឥណ្ឌាចង់ដាក់ប្រភេទយន្តហោះចម្បាំងក្នុងស្រុក Tejas លើនាវានេះ។ ប៉ុន្តែក្រោយមកគម្រោងនេះត្រូវបានគេផ្លាស់ប្តូរដោយសារយន្តហោះនេះមិនមានលទ្ធភាពហោះហើរឡើងចុះនៅលើនាវាដឹកយន្តហោះថ្មីនេះឡើយ។ ដូច្នេះហើយបានជាឥណ្ឌាត្រូវប្រើប្រាស់យន្តហោះរបស់រុស្ស៊ីបែបនេះ។
ឥណ្ឌាបច្ចុប្បន្នមាននាវាដឹកយន្តហោះចំនួនមួយគ្រឿងប៉ុណ្ណោះដែលវាមានឈ្មោះ Vikramaditya។ នាវាដឹកយន្តហោះទីមួយនេះត្រូវបានឥណ្ឌាចរចាទិញពីរុស្ស៊ីនៅឆ្នាំ ២០០៤ ក្នុងតម្លៃជាង ពីរពាន់លានដុល្លារ ហើយត្រូវបានយកមកកែច្នៃជានាវាដឹកយន្តហោះតែម្តង។ នាវានេះចូលបម្រើកងទ័ពឥណ្ឌាជាផ្លូវការនៅឆ្នាំ ២០១៣។ បច្ចុប្បន្ននេះឥណ្ឌាក៏កំពុងចាប់ផ្តើមគម្រោងសាសង់នាវាទីបី ដែលវាមានឈ្មោះថា Vishal ហើយនាវានេះនឹងមានទម្ងន់រហូតដល់ ៦៥០០០តោនឯណោះ។
បើតាមកងទ័ពជើងទឹកឥណ្ឌា នាវាថ្មីនេះនឹងអាចផ្ទុកយន្តហោះចម្បាំងបានជាង ៥០គ្រឿងច្រើនជាងនាវាទីមួយ និងទីពីរ ហើយកងទ័ពឥណ្ឌាក៏កំពុងសិក្សាដើម្បីឈានដំឡើងប្រព័ន្ធពិសេសសម្រួលដល់ការឡើងចុះរបស់យន្តហោះចម្បាំងដែរ។ គេរំពឹងថា ឥណ្ឌានឹងពង្រាយយន្តហោះទំនើបដូចជា F-18 របស់អាមេរិក និងRafale ដែលខ្លួននាំចូលពីបារាំងលើនាវាទីបីរបស់ខ្លួនផងដែរ៕
Tag:
ឥណ្ឌា
នាវាដឹកយន្តហោះចម្បាំង
Vikrant
© រក្សាសិទ្ធិដោយ thmeythmey.com