កីឡាអន្តរជាតិ
អន្តរជាតិ
អតីតពេទ្យកីឡាអាមេរិកម្នាក់ជាប់ពន្ធនាគារ១៧៥ឆ្នាំពីបទបៀតបៀនភេទកីឡាការិនី លោក Larry Nassar នាអំឡុងសវនាការនៅ Ingham County Circuit Court កាលពីថ្ងៃទី២៤ ខែមករា។ រូបថត AFP
× លោក Larry Nassar អតីតគ្រូពេទ្យកីឡាប្រចាំក្រុមកាយសម្ព័ន្ធសកលវិទ្យាល័យ និងក្រុមជម្រើសជាតិអាមេរិក ត្រូវបានតុលាការផ្តន្ទាទោសដាក់ពន្ធពី៤០ ទៅ១៧៥ឆ្នាំកាលពីថ្ងៃពុធ ក្រោយជនរងគ្រោះជិត១៦០នាក់ បានផ្តល់សក្ខីកម្មជាបន្តបន្ទាប់ លើករណីបៀតបៀនផ្លូវភេទ។
«លោក! ខ្ញុំផ្តន្ទាទោសលោករយៈពេល១៧៥ឆ្នាំ ដែលស្មើ២១០០ខែ។ ខ្ញុំទើបតែចេញដីកាមរណៈសម្រាប់លោក»។ អ្នកស្រី Rosemarie Aquilina ចៅក្រមនៃតុលាការរដ្ឋ Michigan សហរដ្ឋអាមេរិក បានថ្លែងទៅកាន់លោក Nassar ក្នុងបន្ទប់សវនាការ។
ស្ត្រី និងកុមារីជាង១០០នាក់ បានចោទប្រកាន់លោក Nassar អាយុ៥៤ឆ្នាំ ពីបទបៀតបៀនផ្លូវភេទ នាអំឡុងដែលលោកធ្វើការត្រួតពិនិត្យសុខភាព ក្នុងចំណោមអ្នកទាំងនោះ ក៏មានម្ចាស់មេដាយអូឡាំពិក Simone Biles, Aly Raisman, Gabby Douglas និង McKayla Maroney ផងដែរ។
លោកស្រីចៅក្រម បានព្រមានថា លោក Nassar មិនស័ក្តិសមនឹងដើរចេញពីពន្ធនាគារនោះឡើយ ពីព្រោះលោកជាមនុស្សដ៏គ្រោះថ្នាក់ម្នាក់។
ក្នុងតួនាទីជាគ្រូពេទ្យប្រចាំក្រុមកាយសម្ព័ន្ធរបស់ Michigan State University និងក្រុមជម្រើសជាតិអាមេរិក លោក Nassar មានភារកិច្ចត្រួតពិនិត្យលើសុខភាព និងកាយសម្បទារបស់អត្តពលិក ប៉ុន្តែផ្ទុយទៅវិញ លោកបានប្រព្រឹត្តទង្វើបៀតបៀនផ្លូវភេទ ខណៈកីឡាការិនីក្មេងៗ យល់មិនទាន់ដល់ពីករណីនេះនៅឡើយ។
លោក Nassar បានទទួលស្គាល់កំហុស ហើយសុំការអភ័យទោសចំពោះជនរងគ្រោះនូវទង្វើមិនគប្បីរបស់ខ្លួន។ ជនរងគ្រោះ និងតំណាងដែលមានម្តាយ បងស្រី និងកូនស្រី សុទ្ធតែសម្រក់ទឹកភ្នែក នៅពេលរំលឹកឡើងវិញនូវរឿងរ៉ាវដែលបានកើតឡើង។
លោក Nassar បានជាប់ចោទលើ១០ករណីផ្សេងៗរួចទៅហើយពាក់ព័ន្ធនឹងការបៀតបៀនផ្លូវភេទនាអំឡុងពេលខ្លួនធ្វើការត្រួតពិនិត្យសុខភាពលើក្មេងស្រីៗ ជាមួយគ្នានោះ លោកត្រូវបានផ្តន្ទាទោសឲ្យជាប់ពន្ធនាគារ៦០ឆ្នាំលើអំពើអាស។
បើតាម AFP ក្រោយការប្រកាសសាលក្រម គណៈកម្មាធិការអូឡាំពិកអាមេរិក (USOC) បានបង្កើតក្រុមស៊ើបអង្កេតឯករាជ្យមួយដើម្បីស្វែងរកភាពមិនប្រក្រតីបន្ថែមទៀត ស្របពេលដែលមន្ត្រីសំខាន់៣រូបរបស់សហព័ន្ធកាយសម្ព័ន្ធអាមេរិក បានលាលែងពីតំណែង៕
Tag:
កាយសម្ព័ន្ធ
កីឡាអាមេរិក
© រក្សាសិទ្ធិដោយ thmeythmey.com