កីឡាអន្តរជាតិ
អន្តរជាតិ
រ៉ូណាល់ដូ នឹងបើកសាខាសណ្ឋាគារ CR7 នៅញូវយ៉ក ម៉ាឌ្រីត និងម៉ារ៉ាកេច
× កីឡាករ Cristiano Ronaldo នឹងពង្រីកសាខាសណ្ឋាគារ CR7 របស់ខ្លួន តាមរយៈការលក់សិទ្ធអាជីវកម្មបន្ត (Franchise) នៅក្នុងទីក្រុងញូវយ៉ក សហរដ្ឋអាមេរិក ក្រុងម៉ាឌ្រីត ប្រទេសអេស្ប៉ាញ និងក្រុងម៉ារ៉ាកេច ប្រទេសម៉ារ៉ុក។
Ronaldo ម្ចាស់ពាន Ballon d’Or ៥លើក ដែលបច្ចុប្បន្នមានអាយុ៣២ឆ្នាំ ដំណើរការអាជីវកម្មសណ្ឋាគារ CR7 របស់ខ្លួនជាមួយក្រុមហ៊ុនសណ្ឋាគារ Pestana ក្នុងទីក្រុងលីស្បោន និងក្រុង Funchal ដែលជាស្រុកកំណើតរបស់ខ្លួន។
តាមការផ្សាយរបស់ AFP ដែលបានដកស្រង់សំដីមនុស្សជំនិតម្នាក់របស់ខ្សែប្រយុទ្ធជម្រើសព័រទុយហ្គាល់ និងក្លិប Real Madrid សណ្ឋាគារថ្មីដំបូងអាចដំណើរការនាអំឡុងរយៈពេល១៨ខែនៅក្នុងទីក្រុងម៉ារ៉ាកេច ដែលជាទីតាំងអនុស្សារីយ៍របស់ រ៉ូណាល់ដូ ជាមួយមិត្តភក្តិជនជាតិហូឡង់ម្នាក់ដែលជាកីឡាករប្រដាល់។
សណ្ឋាគារ CR7 របស់ រ៉ូណាល់ដូ នឹងផ្តល់ឱកាសដល់អតិថិជនមើលការតាំងបង្ហាញរូបថត និងសកម្មភាពផ្សេងៗរបស់កីឡាករបាល់ទាត់លេខមួយពិភពលោករូបនេះ៕
© រក្សាសិទ្ធិដោយ thmeythmey.com