អន្តរជាតិ
ម៉ាក្រុង ប្រកាសបញ្ចប់ឧស្សាហកម្មធ្យូងថ្មត្រឹមឆ្នាំ ២០២១ ដើម្បីដោះស្រាយបញ្ហាប្រែប្រួលអាកាសធាតុ
× ប្រធានាធិបតីបារាំង អេម៉ានុយអែល ម៉ាក្រុង សន្យាបិទឧស្សាហកម្មធ្យូងថ្មទាំងអស់នៅត្រឹមឆ្នាំ ២០២១ខាងមុខដើម្បីរួមចំណែកដោះស្រាយបញ្ហាប្រែប្រួលអាកាសធាតុសាកល។ លោកបានបញ្ជាក់បែបនេះនៅវេទិកាសេដ្ឋកិច្ចពិភពលោកឆ្នាំ ២០១៨ នៅទីក្រុង ដាវ៉ូស ប្រទេសស្វីស។
ក្រោយលោក អេម៉ានុយអែល ម៉ាក្រុង ចូលកាន់តំណែងជាប្រធានាធិបតីបារាំងឆ្នាំ ២០១៧ លោកបានប្រកាសថា រដ្ឋាភិបាលបារាំងនឹងរួមចំណែកធ្វើឲ្យផែនដីអស្ចារ្យម្តងទៀត។ ឥឡូវនេះលោកបានប្រកាសបិទបញ្ចប់ឧស្សាហកម្មធ្យូងថ្មទាំងស្រុងនៅត្រឹមឆ្នាំ ២០២១ ខាងមុខ។
យោងតាមទីភ្នាក់ងារព័ត៌មាន AFP ក្រៅពីប្រកាសប្តេជ្ញាបញ្ឈប់ឧស្សាហកម្មធ្យូងថ្ម លោក ម៉ាក្រុង ក៏បានលើកឡើងពីមហិច្ឆតារបស់លោកក្នុងការកសាងកិត្យានុភាពបារាំងដើម្បីឲ្យប្រទេសដទៃយកគម្រូតាមក្នុងការដោះស្រាយបញ្ហាពិភពលោកនេះដែរ។
«យើងបានសម្រេចចិត្តក្នុងការធ្វើឲ្យបារាំងក្លាយជាប្រទេសគម្រូសម្រាប់ការប្រឆាំងការប្រែប្រួលអាកាសធាតុ»។ នេះជាសម្តីរបស់លោក ម៉ាក្រុង។
ពាក់ព័ន្ធការខ្វែងគំនិតគ្នារឿងដោះស្រាយបញ្ហាប្រែប្រួលអាកាសធាតុ ឬធានាប្រយោជន៍សេដ្ឋកិច្ចនោះ លោក ម៉ាក្រុង បានសង្កត់ធ្ងន់ថា វាគួរតែបញ្ចប់ការយល់ឃើញម្ខាងៗដោយខ្លះជំហរការផលិត រីឯខ្លះទៀតជំទាស់ការប្រែប្រួលអាកាសធាតុនោះ។ មេដឹកនាំបារាំងរូបនេះក៏អំពាវនាវឲ្យបណ្តាប្រទេសទាំងអស់ជំរុញការលូតលាស់នៃសេដ្ឋកិច្ចតាមរយៈការច្នៃប្រឌិត ធានាការទាក់ទាញនិងប្រកួតប្រជែងខ្ពស់ក្នុងសេដ្ឋកិច្ចផង។
ការដាក់កំណត់ឆ្នាំ ២០២១ សម្រាប់ការបញ្ចប់ឧស្សាហកម្មធ្យូងថ្មជាការប្តេជ្ញាចិត្តខ្លាំងក្លាជាងរដ្ឋបាលបារាំងមុនជំនាន់លោក ហ្វ្រង់ស្វ័រ ហូឡង់។ លោក ហូឡង់ធ្លាប់សន្យាថា បារាំងនឹងបញ្ចប់ឧស្សាហកម្មធ្យូងថ្មនៅត្រឹមឆ្នាំ ២០២៣។
ដោយឡែក រដ្ឋបាលអាមេរិករបស់លោក ដូណាល់ ត្រាំ ឯណោះវិញមិនដែលខ្វល់ទាល់តែសោះពីបញ្ហាប្រែប្រួលអាកាសធាតុ ហើយលោក ត្រាំ កំពុងដើរផ្ទុយទាំងស្រុងពីបារាំងដោយជំរុញការឧស្សាហកម្មធ្យូងថ្មទៅវិញ។
ដោយមិនជឿថាមានការប្រែប្រួលអាកាសធាតុ លោក ត្រាំ បានបញ្ជាដកអាមេរិកចេញពីកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ កាលពីខែមិថុនាឆ្នាំ ២០១៧។ ការដកខ្លួនរបស់អាមេរិកនេះ ធ្វើឲ្យមហាអំណាចផុតលេខនេះក្លាយជាប្រទេសតែមួយគត់លើពិភពលោកដែលមិនចូលរួមក្នុងកិច្ចព្រមព្រៀងប្រវត្តិសាស្ត្រនេះ៕
Tag:
អេម៉ានុយអែល ម៉ាក្រុង
បារាំង
ធ្យូងថ្ម
ការប្រែប្រួលអាកាសធាតុ
© រក្សាសិទ្ធិដោយ thmeythmey.com