អន្តរជាតិ
អាមេរិក សន្យាជួយជ្រោមជ្រែងបណ្តាប្រទេសអាស៊ីអាគ្នេយ៍ដើម្បីប្រឆាំងក្រុមភេរវជន រូបភាព៖ AFP
× ប្រមុខការពារជាតិអាមេរិកលោក James Mattis ប្រកាសក្នុងពេលបំពេញទស្សនកិច្ចនៅឥណ្ឌូណេស៊ីថា អាមេរិកនឹងជួយជ្រោមជ្រែងប្រទេសនៅអាស៊ីអាគ្នេយ៍ដើម្បីទប់ស្កាត់ និងប្រឆាំងការគំរាមកំហែងសន្តិសុខពីក្រុមភេវករក្នុងតំបន់ ។ ក្រុងវ៉ាស៊ីនតោន អាចនឹងបញ្ជូនក្រុមចារកម្មដើម្បីសហការក្នុងការស៊ើបអង្កេតពាក់ព័ន្ធចលនាភេរកម្មនៅក្នុងតំបន់ទៀតផង ។
ក្នុងសន្និសីទសារព័ត៌មានរួមជាមួយនឹងសមភាគីឥណ្ឌូណេស៊ី លោក Ryamizard Ryacudu ថ្ងៃ ២៣ ខែមករា រដ្ឋមន្ត្រីការពារជាតិអាមេរិកបានលើកឡើងពីចំណាត់ការជាច្រើនក្នុងការប្រឆាំងក្រុមភេរវជននៅក្នុងតំបន់អាស៊ីអាគ្នេយ៍ និងប៉ាស៊ីហ្វិក ជាពិសេសនៅហ្វីលីពីន ម៉ាឡេស៊ី និងឥណ្ឌូណេស៊ីតែម្តង ។
នាឱកាសនោះដែរ លោករដ្ឋមន្ត្រីការពារជាតិឥណ្ឌូណេស៊ី Ryamizard Ryacudu ក៏បានប្រាប់សមភាគីអាមេរិកវិញថា កន្លងមក ឥណ្ឌូណេស៊ី បានមានគំនិតផ្តួចផ្តើមមួយ ដែលជាកិច្ចសហប្រតិបត្តិការនៃការផ្លាស់ប្តូរព័ត៌មានចារកម្មដើម្បីទប់ទល់នឹងបញ្ហានេះដែរ ។ គំនិតផ្តួចផ្តើមនោះ មានឈ្មោះថា « ភ្នែករបស់យើង (Our Eyes) ។ នេះបើយោងសារព័ត៌មាន The Jakarta Post ។
តាមប្រភពព័ត៌មានដដែលនោះ គំនិតផ្តួចផ្តើម «ភ្នែករបស់យើង» ត្រូវបានបង្កើតឡើងនៅចុងឆ្នាំ២០១៧កន្លងទៅ ។ គំនិតផ្តួចផ្តើមនេះ មានភាគីពាក់ព័ន្ធទាំងអស់ រួមមាន ឥណ្ឌូណេស៊ី ថៃ ម៉ាឡេស៊ី ព្រុយណេ សិង្ហបុរី និង ហ្វីលីពីន ដែលមានគោលដៅ សហការ និងផ្លាស់ប្តូរព័ត៌មានសន្តិសុខ ជាដើម ។
តបនឹងការលើកឡើងរបស់ប្រមុខការពារជាតិឥណ្ឌូណេស៊ី ប្រមុខការពារជាតិអាមេរិក បានសន្យា ថា លោក នឹងជួយជ្រោមជ្រែងក្រុម «ភ្នែករបស់យើង» និងជាពិសេសនោះ អាមេរិក ក៏នឹងបន្ថែមកិច្ចសហប្រតិបត្តិការការពារជាតិជាមួយឥណ្ឌូណេស៊ី ដែលរួមមានទាំងការបញ្ជូនកងកម្លាំងពិសេសដើម្បីប្រយុទ្ធប្រឆាំងនឹងក្រុមភេរវជនផងដែរ ៕
Tag:
អាមេរិក
ឥណ្ឌូណេស៊ី
ភេរវកម្ម
© រក្សាសិទ្ធិដោយ thmeythmey.com