អន្តរជាតិ
រដ្ឋមន្ត្រីពាណិជ្ជកម្មអាមេរិក៖ ចិនអនុវត្តនយោបាយគាំពារនិយមខ្លាំងជាងអាមេរិកទៀត រដ្ឋមន្រ្តីពាណិជ្ជកម្មអាមេរិក Wilbur Ross ក្នុងវេទិកាសេដ្ឋកិច្ចពិភពលោក (រូបភាព៖ AFP)
× ក្រោមរដ្ឋបាលប្រធានាធិបតី ដូណាល់ ត្រាំ អាមេរិកត្រូវគេមើលឃើញថា កំពុងដើរលើផ្លូវទៅរកនយោបាយគាំពារនិយម ផ្ទុយពីចរន្តសកលលោកដែលជំរុញការអនុវត្តពាណិជ្ជកម្មសេរីភាវូបនីយកម្ម។ ប៉ុន្តែរដ្ឋមន្ត្រីពាណិជ្ជកម្មអាមេរិក Wilbur Ross និយាយថា អាមេរិកមិនទាន់អនុវត្តនយោបាយគាំពារនិយមខ្លាំងដូចចិននៅឡើយទេ ហើយចំណាត់ការទាំងឡាយលើរឿងពាណិជ្ជកម្ម គឺជាការដោះស្រាយបញ្ហាប៉ុណ្ណោះ។
ក្នុងវេទិកាសេដ្ឋកិច្ចពិភពលោកនៅទីក្រុង Davos ទឹកដីស្វ៊ីស រដ្ឋមន្ត្រីពាណិជ្ជកម្មអាមេរិក Wilbur Ross បាននិយាយការពារនយោបាយ «America First» របស់លោកប្រធានាធិបតី ដូណាល់ ត្រាំ ។ ការអនុវត្តនយោបាយដែលគិតពីប្រយោជន៍អាមេរិកមុនគេនេះ ត្រូវបានគេចាត់ទុកជានយោបាយគាំពារនិយម និងរងការរិះគន់យ៉ាងខ្លាំង ដ្បិតរដ្ឋបាលក្រុងវ៉ាស៊ីនតោនបានដាក់កំហិតជាច្រើនលើក្រុមហ៊ុនបរទេស។
ក្នុងការជជែកដេញដោលនៅថ្ងៃទី២៤ ខែមករា លោក Ross បានទាត់ចោលការចោទប្រកាន់ថាអាមេរិកមាននយោបាយរឹតត្បិត តែបានចង្អុលមុខចិនថា ជាប្រទេសដែលមាននយោបាយគាំពារនិយមខ្លាំងក្លា។ «ចិនជាប្រទេសដែលពូកែខាងវោហារសាស្ត្រស្ដីពីពាណិជ្ជកម្មសេរី និងកាន់តែពូកែខាងមានអាកប្បកិរិយាគាំពារនិយម»។ នេះជាសម្ដីលោក Ross ចំពោះមុខអ្នកចូលរួមវេទិកាសេដ្ឋកិច្ច ដែលមានទំនោរទៅរកសកលភាវូបនីយកម្ម និងផ្សាយដោយសារព័ត៌មាន Bloomberg ។
ជាមួយគ្នានោះ រដ្ឋមន្ត្រីពាណិជ្ជកម្មអាមេរិកក៏បានបដិសេធពាក្យរិះគន់ថា អាមេរិកដកខ្លួនចេញពីវេទិកាពិភពលោក និងទុកឱកាសនេះឲ្យចិនដែលជាមហាអំណាចសេដ្ឋកិច្ចលំដាប់ទីពីរធ្វើព្យុះភ្លៀងម្ដង។ បើតាមសម្ដីរដ្ឋមន្ត្រីរូបនេះ នយោបាយអាមេរិកកន្លងមក គឺជាសិល្បៈនៃការដឹកនាំរបស់លោក ត្រាំ ដែលគេឯងមិនពេញចិត្តប៉ុណ្ណោះ ហើយអាមេរិកមិនបោះបង់តួនាទីរបស់ខ្លួនឡើយ តែចង់ធ្វើជាអ្នកដឹកនាំក្នុងការធ្វើឲ្យប្រព័ន្ធពាណិជ្ជកម្មពិភពលោកស្មើភាព និងចំណេញទាំងអស់គ្នា។
កន្លងមក ក្រុងវ៉ាស៊ីនតោន តែងបង្ហាញការមិនពេញចិត្តចំពោះការរកស៊ីរបស់ក្រុមហ៊ុនបរទេសនៅអាមេរិក និងកេងចំណេញពីទីផ្សារអាមេរិកយ៉ាងច្រើន។ លោក ត្រាំ ផ្ទាល់ តែងរិះគន់ដៃគូពាណិជ្ជកម្មរបស់អាមេរិក និយាយឲ្យចំ គឺចិន ជុំវិញឱនភាពពាណិជ្ជកម្មក្នុងទំហំរាប់ពាន់លានដុល្លារ។ ក្រោយការកាន់អំណាចមកនោះ លោកបានចាត់វិធានការជាច្រើនដើម្បីបង្រួមគម្លាតតុល្យភាពពាណិជ្ជកម្ម និងគិតប្រយោជន៍ក្រុមហ៊ុនក្នុងស្រុកជាមុន។
ចិន ដែលនៅពីក្រោយអាមេរិកនោះ បានរងផលប៉ះពាល់ពីវិធានការរបស់លោក ត្រាំ ជាបន្តបន្ទាប់ ហើយជារឿយៗក៏ព្រមានវិញថា ខ្លួននឹងចាត់វិធានការឆ្លើយតបវិញប្រឆាំងប្រទេសណាដែលអនុវត្តផ្ទុយពីបញ្ញត្តិរបស់អង្គការពាណិជ្ជកម្មអន្តរជាតិ។ ក្រុងប៉េកាំងបញ្ជាក់ថា ខ្លួនមិនចង់ឲ្យសំណុំរឿងនេះរាលដាល និងចង់ដោះស្រាយបញ្ហាខ្វែងគំនិតគ្នាក្រោមក្របខណ្ឌស្ថាបនាគ្នាទៅវិញទៅមក៕
Tag:
អាមេរិក
ចិន
Wilbur Ross
© រក្សាសិទ្ធិដោយ thmeythmey.com