អន្តរជាតិ
ចិនគ្រោងបង្កើត «ផ្លូវសូត្រទឹកកក» នៅតំបន់អាក់ទិក
× មហាយក្សចិន នៅថ្ងៃទី២៦ ខែមករាបានដាក់ចេញសៀវភៅសស្ដីពី «នយោបាយតំបន់អាក់ទិក» ដើម្បីជំរុញការប្រើប្រាស់ គ្រប់គ្រង និងអភិវឌ្ឍតំបន់នេះរួមគ្នាជាមួយប្រទេសពាក់ព័ន្ធផ្សេងទៀត។ គម្រោងនេះ ក៏នឹងឈានដល់ការបង្កើតផ្លូវសូត្រទឹកកកថ្មីមួយដែរ។ តំបន់អាក់ទិក ប្រៀបដូចជាស្រីក្រមុំដែលមិនទាន់មានអ្នកណាប៉ះពាល់នៅឡើយ និងសម្បូរដោយភោគទ្រព្យរ៉ែជាច្រើន។ ចិនទំនងជាសំឡឹងឃើញទ្រព្យសម្បត្តិមហាសាលនៅទីនោះហើយ។
មហិច្ឆតានៃគំនិតផ្ដួចផ្ដើមខ្សែក្រវ៉ាត់ និងផ្លូវ របស់ប្រធានាធិបតីចិន ស៊ី ជិនភីង បានទៅដល់មហាសមុទ្រអាក់ទិកហើយ។ ក្នុងសៀវភៅសលើកដំបូងស្ដីពីតំបន់អាក់ទិក ចិនមានគម្រោងអភិវឌ្ឍផ្លូវដឹកជញ្ជូនទំនិញឆ្លងកាត់តំបន់វាលទឹកកកនេះ ដែលជាការបើកផ្លូវដល់ការបង្កើតផ្លូវសូត្រទឹកកក។ ចិនត្រៀមខ្លួនរួចរាល់ដើម្បីសហការជាមួយភាគីពាក់ព័ន្ធផ្សេងទៀតដើម្បីអភិវឌ្ឍតំបន់នេះ និងដោះស្រាយបញ្ហាប្រឈមមុខនានា។
បើតាមទីភ្នាក់ងារព័ត៌មាន Xinhua ក្នុងសៀវភៅគោលនយោបាយថ្មីដែលផ្សាយ ការិយាល័យព័ត៌មាន នៃក្រុមប្រឹក្សារដ្ឋ ចិនលើកឡើងថា ខ្លួននឹងលើកទឹកចិត្តឲ្យក្រុមហ៊ុនរបស់ខ្លួនកសាងហេដ្ឋារចនាសម្ព័ន្ធ និងដឹកជញ្ជូនទំនិញកាត់តាមតំបន់នេះ ដោយគោរពតាមបញ្ញត្តិមានស្រាប់។ ជាមួយគ្នានោះ ចិន ចង់ ការពារ អភិវឌ្ឍ និងគ្រប់គ្រងតំបន់អាក់ទិករួមគ្នា ក៏ដូចជាជំរុញកិច្ចសហប្រតិបត្តិការក្នុងតំបន់នេះក្រោមក្របខណ្ឌគំនិតផ្ដួចផ្ដើចខ្សែក្រវ៉ាត់ និងផ្លូវ។
«ខ្សែក្រវ៉ាត់ផ្លូវសូត្រសេដ្ឋកិច្ច និងផ្លូវសូត្រសមុទ្រសតវត្សរ៍ទី២១ ដែលជាគំនិតផ្ដួចផ្ដួចដ៏សំខាន់របស់ចិន នឹងនាំមកឱកាសសម្រាប់ភាគីពាក់ព័ន្ធទាំងអស់ដើម្បីបង្កើត «ផ្លូវសូត្រទឹកកក» និងសម្រួលការតភ្ជាប់ ការអភិវឌ្ឍសេដ្ឋកិច្ច និងសង្គមប្រកបដោយចីរភាពនៅអាក់ទិក»។ នេះជាការប្រកាសរបស់សៀវភៅសដដែល ដោយបន្តថាចិននឹងស្ដាប់មតិភាគីពាក់ព័ន្ធ អនុវត្តតាមគោលការណ៍គោរពគ្នា កិច្ចសហប្រតិបត្តិការឈ្នះ-ឈ្នះ និងនិរន្តរភាព។
លើសពីនោះ ចិនក៏ប្រកាសត្រង់ថា ខ្លួនចាប់អារម្មណ៍លើភោគទ្រព្យហូរហៀររបស់តំបន់អាក់ទិក និងសំឡឹងឃើញការអភិវឌ្ឍធនធានរ៉ែ ឧស្ម័ន ថាមពលមិនមែនផូស៊ីល ការនេសាទ និងទេសចរណ៍។ ចិនចង់សហការជាមួយប្រទេសផ្សេងលើការងារអភិវឌ្ឍនេះ ដោយរក្សាប្រពៃណី និងវប្បធម៌របស់ប្រជាជនទាំងអស់រស់នៅតំបន់អាក់ទិក ក៏ដូចជាការពារបរិស្ថានធម្មជាតិនៅមហាសមុទ្រទឹកកក ដែលកំពុងប្រឈមមុខការគំរាមកំហែងរបស់បម្រែបម្រួលអាកាសធាតុ។
សូមបញ្ជាក់ថា តំបន់អាក់ទិក ដែលស្ថិតនៅប៉ូលខាងជើងរបស់ផែនដីមានផ្ទៃក្រឡា៨លានគីឡូម៉ែត្រការ៉េ និងគ្រប់គ្រងដោយប្រទេសចំនួន៨ ផ្ទៃសមុទ្រវិញមានទំហំច្រើនជាង១២លានគីឡូម៉ែត្រការ៉េ។ តំបន់នេះមិនទាន់អភិវឌ្ឍទ្រង់ទ្រាយធំនៅឡើយទេ ហើយភាគច្រើនមានតែការស្រាវជ្រាវវិទ្យាសាស្ត្រប៉ុណ្ណោះ។ ឯចិនមិនមែនជាសមាជិកនៃក្រុមប្រឹក្សាតំបន់អាក់ទិកឡើយ តែមានសកម្មភាពខ្លាំងនៅតំបន់នេះ៕
Tag:
ចិន
ផ្លូវសូត្រទឹកកក
អាក់ទិក
© រក្សាសិទ្ធិដោយ thmeythmey.com