អ្នកញូវយ៉ក និងក្រុងមួយចំនួន មានទិវាស្លៀកខោស្លីបពេលជិះនៅផ្លូវក្រោមដី

អន្តរជាតិ

អ្នកញូវយ៉ក និងក្រុងមួយចំនួន មានទិវាស្លៀកខោស្លីបពេលជិះនៅផ្លូវក្រោមដី

27, Jan 2018 , 10:59 am

រូបភាព

ដោយ: ធីតា

ពលរដ្ឋមួយចំនួននៅក្រុងញូវយ៉ក សហរដ្ឋអាមេរិក កាលពីសប្តាហ៍មុន បាននាំគ្នាប្រារព្ធទិវា «No Pants Subway Ride» (មិនស្លៀកខោជើងវែងពេលជិះរថភ្លើងក្រោមដី) ។ អ្នកចូលរួមក្នុងទិវានេះ នាំគ្នាស្លៀកខោខ្លី ជាពិសេសខោស្លីប ពេលជិះរថភ្លើងក្រោមដី។

ចាប់ផ្តើមឡើងតាំងពីឆ្នាំ២០០២មក អ្នកចូលរួមក្នុងទិវា «No Pants Subway Ride» បានជួបរឿងរ៉ាវប្លែកជាច្រើន រហូតដល់អ្នកខ្លះរងពាក្យបណ្តឹងនៅតុលាការថែមទៀតផង ទាក់ទងនឹងការស្លៀកលីអូនៅទីសាធារណៈ។ ទោះបីជាយ៉ាងណាក៏ដោយ មិនមានច្បាប់ណាមួយដាក់ទោសអ្នកដែលស្លៀកលីអូនៅទីសាធារណៈនោះឡើយ។

យោងតាមការផ្សាយរបស់គេហទំព័រ Improve Everywhere គំនិតដំបូងនៃការរៀបចំទិវា « No Pants Subway Ride» នេះ គឺដោយសារតែកន្លងមក អ្នកស្លៀកខោខ្លីនៅក្នុងរថភ្លើងក្រោមដី ឬម៉េត្រូ តែងតែធ្វើឲ្យភ្ញាក់ផ្អើល ហើយគេមិនសូវនិយាយរាប់រក ដូចជាអ្នកស្លៀកខោជើងវែង និងពាក់អាវក្រាសៗនោះឡើយ។

ជាមួយគ្នានេះ អ្នកចូលរួមម្នាក់បានអះអាងថា ទិវាបែបនេះ គ្រាន់តែបង្កើតទិដ្ឋភាពប្លែកៗសម្រាប់មនុស្សទូទៅតែប៉ុណ្ណោះ វាមិនមែនក្នុងគោលដៅនយោបាយឡើយ ហើយក៏មិនមែនជាចលនាសង្គមអ្វីមួយនោះដែរ។

នារយៈពេល១៧ឆ្នាំកន្លងមកនេះ ពលរដ្ឋនៅបណ្តាក្នុងជាច្រើនបានចូលរួមក្នុងទិវា « No Pants Subway Ride» ក្នុងនោះដូចជាប៊ែរឡាំង តូរ៉ុងតូ វ៉ាស៊ីនតោន ឡុងដ៍ មីឡង់ និងជេរូសាឡឹម ជាដើម។ អ្នកចូលរួមភាគច្រើន និយមស្លៀកខោស្លីប ជាជាងខោខ្លីធម្មតា៕