អាមេរិកអញ្ជើញចិនឲ្យចូលរួមសមយុទ្ធយោធារួម ស្របពេលទំនាក់ទំនងតានតឹងខ្លាំង

អន្តរជាតិ

អាមេរិកអញ្ជើញចិនឲ្យចូលរួមសមយុទ្ធយោធារួម ស្របពេលទំនាក់ទំនងតានតឹងខ្លាំង

28, Jan 2018 , 1:59 pm

រូបភាព

ដោយ: ថ្មីៗ

សហរដ្ឋអាមេរិកបានសម្រេចអញ្ជើញចិនឲ្យចូលរួមក្នុងសមយុទ្ធកងទ័ពជើងទឹករួមគ្នាជាមួយខ្លួននៅសប្តាហ៍នេះ ស្របពេលដែលទំនាក់ទំនងប្រទេសទាំងពីរស្ថិតក្នុងស្ថានភាពតានតឹងផងនោះ។ ថ្មីៗនេះចិនទើបតែបញ្ចេញនាវាចម្បាំងរបស់ខ្លួនទៅបណ្តេញនាវាពិឃាតអាមេរិកដែលរំលោភដែនអធិបតេយ្យរបស់ខ្លួនផង។

ខណៈដែលទំនាក់ទំនងទ្វេភាគីនៅតែតានតឹង និងមានការប្រឈមមុខគ្នាខ្លាំងនោះ សប្តាហ៍នេះក្រសួងការពារជាតិអាមេរិកបានផ្ញើលិខិតទៅកាន់ភាគីចិនដើម្បីអញ្ជើញឲ្យមហាអំណាចនេះចូលរួមក្នុងសមយុទ្ធកងទ័ពជើងទឹកទ្រង់ទ្រាយធំមួយ (RIMPAC)។

ពាក់ព័ន្ធការអញ្ជើញនេះ អ្នកនាំពាក្យក្រសួងការពារជាតិ ចិនលោក Wu Qian បានអះអាងថា ចិនពិតជាបានទទួលការអញ្ជើញពីសំណាក់អាមេរិកពិតមែន ហើយប្រតិភូចិនត្រូវបានបញ្ជូនទៅកាន់សហរដ្ឋអាមេរិករួចហើយដើម្បីពិភាក្សាពីបញ្ហានេះ។ នេះបើតាមទីភ្នាក់ងារព័ត៌មាន AFP ។

តាមទីភ្នាក់ងារព័ត៌មានដដែល RIMPAC ជាសមយុទ្ធយោធាអន្តរជាតិធំបំផុតមួយដែលត្រូវបានគេរៀបចំឡើងរៀងរាល់ឆ្នាំនៅក្បែររដ្ឋហាវ៉ៃ ហើយចិនធ្លាប់ចូលរួមពីក្នុងលំហាត់យោធានេះពីរដងដែរពោលគឺនៅក្នុងឆ្នាំ ២០១៤ និងឆ្នាំ ២០១៦។

តាមពិតទៅលិខិតអញ្ជើញរបស់ក្រុងវ៉ាស៊ីនតោនផ្ញើទៅកាន់ក្រុងប៉េកាំងនេះកើតឡើងស្របពេលដែលទំនាក់ទំនងទ្វេភាគីរវាងមហាអំណាចទាំងពីរល្អក់កករខ្លាំងនិងមានភាពតានតឹងខ្លាំងផងជាពិសេសនៅក្នុងបញ្ហាជម្លោះសមុទ្រចិនខាងត្បូង។

ទោះមិនមែនជាភាគីជម្លោះក៏ដោយ អាមេរិកនៅបន្តវត្តមានរបស់ខ្លួននៅក្នុងតំបន់ដោយផ្អែកលើច្បាប់អន្តរជាតិ ធានាសេរីភាពក្នុងការធ្វើនាវាចរណ៍ និងសេរីភាពក្នុងការហោះហើរនៅក្នុងសមុទ្រចិនខាងត្បូងផង។ ដូចឃើញស្រាប់រដ្ឋមន្ត្រីការពារជាតិអាមេរិក លោក ជេម ម៉ាធីស (James Mattis) មុនបំពេញទស្សនកិច្ចនៅឥណ្ឌូណេស៊ី និងវៀតណាមនោះ បានថ្លែងយ៉ាងច្បាស់ៗថា សេរីភាពនាវាចរណ៍និងការភ្ជាប់ទៅកាន់សមុទ្រចិនខាងត្បូងនោះមានសារសំខាន់បំផុតសម្រាប់សេដ្ឋកិច្ច និងសន្តិសុខតំបន់ជាពិសេសសម្រាប់វៀតណាម។

យ៉ាងណាក៏ដោយ មហាយក្សចិនជាញឹកញយបានទិតៀនអាមេរិក និងចោទថា ការលូកលាន់មហាអំណាចនេះកំពុងបង្កបញ្ហាកាន់តែច្រើនដល់តំបន់អាស៊ីប៉ាស៊ីហ្វិកផងដែរ។ កាលពីសប្តាហ៍មុនដែរចិនបានអះអាងថា ខ្លួនសម្រេចបញ្ជូននាវាចម្បាំងទៅបណ្តេញនាវាពិឃាតបំពាក់មីស៊ីលរបស់អាមេរិកមួយគ្រឿងដែលបានបំពានដែនអធិបតេយ្យខ្លួនផងដែរ៕