អន្តរជាតិ
ពូទីន ហៅទណ្ឌកម្មអាមេរិកប្រឆាំងមន្ត្រីរុស្ស៊ីថា « ឆ្កែចេះតែព្រុស មនុស្សនៅតែដើរ» រូបភាព៖ TASS
× ប្រធានាធិបតីរុស្ស៊ី វ្ល៉ាឌីមៀ ពូទីន បានរិះគន់អាមេរិកខ្លាំងៗ ក្រោយការចេញផ្សាយបញ្ជីឈ្មោះមន្ត្រី និងអ្នកជំនួញរបស់រុស្ស៊ី ដែលប្រឈមមុខនឹងការដាក់ទណ្ឌកម្ម។ មន្ត្រីរដ្ឋាភិបាល១១៤នាក់ និងអ្នកជំនួញរុស្ស៊ី៩៦នាក់ ស្ថិតក្នុងបញ្ជីឈ្មោះរបស់ក្រសួងហិរញ្ញវត្ថុអាមេរិក។ ទោះមិនខ្វល់ខ្វាយក្ដី លោក ពូទីន ចាត់ទុកបញ្ជីឈ្មោះនេះ ជានយោបាយមិនច្បាស់លាស់របស់អាមេរិក ប៉ុន្តែរុស្ស៊ីនៅតែចង់បានទំនាក់ទំនងល្អប្រសើរជាមួយអាមេរិកដដែល។
ឆ្កែចេះតែព្រុស មនុស្សនៅតែដើរ។ នេះជាប្រតិកម្មរបស់ប្រធានាធិបតីរុស្ស៊ី វ្ល៉ាឌីមៀ ពូទីន ទៅនឹងបញ្ជីឈ្មោះមន្ត្រីធំៗ និងសេដ្ឋីប្រាក់ពាន់លានដុល្លាររបស់រុស្ស៊ី ដែលបញ្ចេញដោយក្រសួងហិរញ្ញវត្ថុអាមេរិក នៅថ្ងៃទី៣០ ខែមករា។ ក្នុងប្រតិកម្មដែលធ្វើឡើងតែប៉ុន្មានម៉ោងក្រោយការចេញផ្សាយបញ្ជីនេះ លោក ពូទីន បានហៅសកម្មភាពរបស់អាមេរិកជារឿងល្ងិតល្ងង់ និងបង្ហាញពីការរេរាចុះឡើងនៃនយោបាយអាមេរិក។
លោក Dmitry Peskov អ្នកនាំពាក្យលោក ពូទីន, នាយករដ្ឋមន្ត្រី ឌីមីទ្រី ម៉េដវ៉េដេវ, ឧបនាយករដ្ឋមន្ត្រីទីមួយ Igor Shuvalov, រដ្ឋមន្ត្រីការបរទេស Sergey Lavrov និងរដ្ឋមន្ត្រីការពារជាតិ Sergey Shoigu ស្ថិតក្នុងចំណោមឥស្សរជននយោបាយរុស្ស៊ីដែលមានឈ្មោះក្នុងបញ្ជីអាមរិក។ សេដ្ឋីធំៗរបស់រុស្ស៊ីជាច្រើន ទាំងប្រធានក្រុមហ៊ុនរដ្ឋ និងម្ចាស់សហគ្រាសឯកជន ក៏គេចមិនផុតពីភ្នែករបស់ក្រសួងហិរញ្ញវត្ថុអាមេរិក។
យ៉ាងណាមិញ គេមិនឃើញមានឈ្មោះលោកប្រធានាធិបតី ពូទីន ក្នុងបញ្ជីនេះឡើយ។ ឆ្លើយតបនឹងសំណួរថា មានអារម្មណ៍ដូចម្ដេចពេលគ្មានឈ្មោះនឹងគេ លោក ពូទីន បានឆ្លើយរបៀបឌឺដងថា លោកពិតជាសោកស្ដាយ។ បើទីភ្នាក់ងារព័ត៌មាន TASS ក្នុងជំនួបមួយនៅថ្ងៃទី៣០ ខែមករា ប្រធានាធិបតីរុស្ស៊ីចាត់ទុកទង្វើរបស់អាមេរិក ជាការមិនរាប់អានមិត្តភក្តិ និងធ្វើឲ្យទំនាក់ទំនងរុស្ស៊ី-អាមេរិក ដែលល្អក់កករស្រាប់កាន់តែយ៉ាប់យ៉ឺនថែមទៀត។
ទោះជាមិនខ្វល់នឹងបញ្ជីឈ្មោះនេះមែន មេដឹកនាំរុស្ស៊ីក៏ឆ្លៀតរិះគន់នយោបាយរបស់ក្រុងវ៉ាស៊ីនតោនដែលមិនច្បាស់លាស់ និងឆ្កួតឡប់ ហើយមិនដឹងថា ខ្លួនចង់បានអ្វីឲ្យប្រាកដ។ លោក ពូទីន បានយកករណីអាមេរិកដាក់រុស្ស៊ីក្នុងបញ្ជីទណ្ឌកម្មជាមួយអ៊ីរ៉ង់ និងកូរ៉េខាងជើង តែអាមេរិកផ្ទាល់បែរជាស្នើឲ្យរុស្ស៊ីជួយដោះស្រាយសំណុំរឿងនុយក្លេអ៊ែររបស់ក្រុងព្យុងយ៉ាង និងរកច្រកចេញក្នុងជម្លោះជាមួយក្រុងតេហេរ៉ង់ទៅវិញ។
ដោយឡែកលោកនាយករដ្ឋមន្ត្រី នាយករដ្ឋមន្ត្រី ម៉េដវ៉េដេវ ដែលមានឈ្មោះក្នុងបញ្ជីរបស់អាមេរិក បែរជាយករឿងនេះទៅធ្វើជារឿងលេងសើចទៅវិញ។ ក្រោយជំនួបជាមួយនាយករដ្ឋមន្ត្រីបែលហ្ស៊ិក Charles Michel លោក ម៉េដវ៉េដេវ និយាយថា បុគ្គលដែលគ្មានឈ្មោះក្នុងបញ្ជីក្រេមឡាំង (Kremlin List) របស់អាមេរិក គួរតែលាលែងពីតំណែងទៅ៕
Tag:
រុស្ស៊ី
អាមេរិក
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com