អន្តរជាតិ
ប្រទេសរំលោភសិទ្ធិមនុស្សខ្លាំងជាងគេ៖ អាមេរិកថាកូរ៉េខាងជើង ឯកូរ៉េខាងជើងថាអាមេរិក
× អាមេរិក និងកូរ៉េខាងជើងបានរិះគន់គ្នាទៅវិញទៅមកជុំវិញការបំពានសិទ្ធិមនុស្ស។ ក្នុងឱកាសថ្លែងទៅកាន់សភានៅថ្ងៃទី៣០ ខែមករា ប្រធានាធិបតីអាមេរិក ដូណាល់ ត្រាំ បានថ្កោលទោសកូរ៉េខាងជើងថាជារដ្ឋដែលរំលោភសិទ្ធិមនុស្សខ្លាំងជាងគេរបស់ពិភពលោក គ្មានរបបដឹកនាំណាប្រៀបបាន។ ស្របគ្នានោះ សារព័ត៌មានកូរ៉េខាងជើងក៏បានផ្សាយរបាយការណ៍សិទ្ធិមនុស្សមួយ ដោយចោទអាមេរិកថា ជាប្រទេសបំពានសិទ្ធិមនុស្សធំជាងគេដូចគ្នា។
សារព័ត៌មានរដ្ឋកូរ៉េខាងជើង KCNA នៅថ្ងៃទី៣១ ខែមករា បានផ្សាយសៀវភៅស្ដីពីការបំពានសិទ្ធិមនុស្សនៅអាមេរិក ខណៈប្រធានាធិបតី ដូណាល់ ត្រាំ ចាប់ផ្ដើមថ្លែងសុន្ទរកថាប្រចាំឆ្នាំទៅកាន់សភា ដែលក្នុងនោះលោកក៏បានរិះគន់ស្ថានភាពសិទ្ធិមនុស្សរបស់ក្រុងព្យុងយ៉ាង។ លោក ត្រាំ និយាយថាគ្មានរបបណាធ្វើទុក្ខបុកម្នេញប្រជាជនខ្លួនឯងសាហាវព្រៃផ្សៃជាងរបបផ្ដាច់ការឃោរឃៅនៅកូរ៉េខាងជើងឡើយ។
តាមពិតទៅ ស្ថានភាពសិទ្ធិមនុស្សនៅកូរ៉េខាងជើង ជាមុខសញ្ញារិះគន់របស់អាមេរិក និងអង្គការសហប្រជាជាតិជាច្រើនឆ្នាំមកហើយ។ ក្រុងវ៉ាស៊ីនតោន តែងចេញផ្សាយរបាយការណ៍ប្រចាំឆ្នាំស្ដីពីសិទ្ធិមនុស្សជុំវិញពិភពលោក ហើយក្រុងព្យុងយ៉ាងតែងស្ថិតក្នុងចំណោមប្រទេសដែលទទួលចំណាត់ទាបជាងគេរហូត។ ប៉ុន្តែរបាយការណ៍សិទ្ធិមនុស្សរបស់ក្រុងព្យុងយ៉ាង បែរជាផ្ដោតតែលើអាមេរិកតែមួយគត់ទៅវិញ។
បើតាមទីភ្នាក់ងារព័ត៌មាន AFP របាយការណ៍របស់កូរ៉េខាងជើងបានហៅអាមេរិកជាអ្នកការពារ ប្រជាធិបតេយ្យ និងជាជើងឯកសិទ្ធិមនុស្ស ប៉ុន្តែអាមេរិកមិនអាចលាក់អត្តសញ្ញាណពិតប្រាកដ ដែលជាអ្នកបំពានសិទ្ធិមនុស្សខ្លាំងជាងគេបានឡើយ។ កូរ៉េខាងជើងអះអាងថា ជំងឺរើសអើស និងការស្អប់គ្នា បានជ្រៀតចូលសង្គមអាមេរិក ហើយនិន្នាការបែបនេះកើនឡើងជាលំដាប់តាំងពីកាន់អំណាចរបស់លោក ត្រាំ មកនោះ។
«វណ្ណៈកណ្ដាលនៅអាមេរិកកំពុងអណ្ដែតត្រសែតក្នុងមហាសមុទ្រនៃសុបិន្តអាក្រក់ ព្រោះត្រូវបានបាត់បង់ការងារ ផ្ទះសម្បែង ហើយកំពុងប្រឈមមុខការកើនឡើងតម្លៃសុខាភិបាល។ ប៉ុន្តែមន្ត្រីគ្រាក់ៗរបស់លោក ត្រាំ គឺជាមហាសេដ្ឋីលុយវាល់លានដុល្លារ និងជាម្ចាស់ក្រុមហ៊ុនធំៗ ដែលទទួលប្រាក់ចំណេញពីនយោបាយប្រឆាំងប្រជាជនរបស់រដ្ឋបាលលោក ត្រាំ »។ នេះជាការរៀបរាប់ពីស្ថានភាពសិទ្ធិមនុស្សនៅអាមេរិកក្នុងសៀវភៅសរបស់កូរ៉េខាងជើង។
សូមបញ្ជាក់ថា កាលពីឆ្នាំ២០១៤ របាយការណ៍សិទ្ធិមនុស្សរបស់អង្គការសហប្រជាជាតិ ដែលចេញផ្សាយរៀងរាល់បីឆ្នាំម្ដង ចោទកូរ៉េខាងជើងថាបានប្រព្រឹត្តការរំលោភបំពានសិទ្ធិមនុស្សធ្ងន់ធ្ងរ ដែលមិនអាចប្រៀបផ្ទឹមបានលើលោកនេះ។ របាយការណ៍នេះ គឺជាលទ្ធផលនៃការសម្ភាសជនភៀសខ្លួនកូរ៉េខាងជើងជាច្រើនរយនាក់។ ប៉ុន្តែរបបដឹកនាំកូរ៉េខាងជើងបានហៅរបាយការណ៍នេះជារឿងប្រឌិតដោយអាមេរិក និងសម្ព័ន្ធមិត្តរបស់ខ្លួនទៅវិញ៕
Tag:
កូរ៉េខាងជើង
អាមេរិក
ដូណាល់ ត្រាំ
សិទ្ធិមនុស្ស
© រក្សាសិទ្ធិដោយ thmeythmey.com