អន្តរជាតិ
ឥណ្ឌូណេស៊ី សង្ឃឹមថា គោលនយោបាយ«America First» មិនមានន័យថា «America Alone» រូបភាព៖ Xinhua
× ក្រុងហ្សាការតា បានកោតសរសើរពីសមិទ្ធផលរបស់ក្រុងវ៉ាស៊ីនតោន ដែលបានចូលរួមចំណែកក្នុងវិស័យពាណិជ្ជកម្ម និងសេដ្ឋកិច្ចពិភពលោក តាមរយៈគោលនយោបាយពាណិជ្ជកម្មសេរី។ ក៏ប៉ុន្តែ ក្រុងហ្សាការតា ក៏ព្រួយបារម្ភចំពោះគោលនយោបាយពាណិជ្ជកម្មចុងក្រោយរបស់ក្រុងវ៉ាស៊ីនតោន ដែលមានចរិកចង្អៀតចង្អល់ ថាអាចបំផ្លាញពិភពលោក ។
រដ្ឋមន្ត្រីសេដ្ឋកិច្ចឥណ្ឌូណេស៊ី លោកស្រី Sri Mulyani Indrawati នៅថ្ងៃ ២៩ មករា បានទទូចឲ្យរដ្ឋាភិបាលអាមេរិក បោះបង់គោលនយោបាយពាណិជ្ជកម្មបែបគាំពារនិយម ដែលអាចបំផ្លាញពិភពលោក និងជាពិសេសនោះ បំផ្លាញនូវដំណើរការ ដែលបង្កើតឡើងកន្លងមកក្នុងការកាត់បន្ថយភាពក្រីក្រសកល ។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី The Jakarta Globe ។
តែយ៉ាងណា លោកស្រីរដ្ឋមន្ត្រីក៏មានសុទិដ្ឋិនិយមចំពោះគោលនយោបាយពន្ធរបស់អាមេរិក ដែលកំពុងតែជះឥទ្ធិលមកលើបណ្តាប្រទេសសេដ្ឋកិច្ចអាស៊ីធំៗមួយចំនួន។ លោកស្រីជឿថា វានឹងមិនបណ្តាលឲ្យមានសង្គ្រាមពាណិជ្ជកម្មឡើយ។ ផ្ទលោកស្រីរដ្ឋមន្ត្រី ក៏បានសំឡឹងឃើញពីមធ្យោបាយ ដែលអាមេរិកអាចអនុវត្តបាន ក្រៅពីគោលនយោបាយពាណិជ្ជកម្មគាំពារនិយម ។
« វា អាចមានការអនុវត្តមួយ ឬពីរផ្លូវផ្សេងទៀត ដែលអ្នក (អាមេរិក) អាចធ្វើដើម្បីកែតម្រូវ ក៏ប៉ុន្តែ សូមកុំបំផ្លាញនូវសមិទ្ធផល ដែលបានបង្កើតកន្លងមក បានយ៉ាងល្អទាំងសម្រាប់អាមេរិក និងពិភពលោក ។ ... យើង សង្ឃឹមថា អ្វីដែលលោកប្រធានាធិបតី ត្រាំ លើកឡើងថា ការតម្កល់ប្រយោជន៍អាមេរិកជាធំ (America First) មិនមែនមានន័យថា អាមេរិកម្នាក់ឯងឡើយ (America Alone) នោះទេ » ។ នេះគឺជាលើកឡើងរបស់លោកស្រី Sri Mulyani Indrawati ។
សូមជម្រាបផងដែរថា គោលនយោបាយតម្កល់ប្រយោជន៍អាមេរិកជាធំជាគោលនយោបាយការបរទេសរបស់លោក ដូណាល់ ត្រាំ ដែលវាសំដៅការពារផលប្រយោជន៍អាមេរិកទូទៅ ដែលរាប់បញ្ចូលទាំងការអនុវត្តនយោបាយគាំពារនិយាម និងដំឡើងពន្ធនាំចូលជាដើម។ គេបារម្ភថា គោលនយោបាយនេះអាចបង្កើតសង្គ្រាមពាណិជ្ជកម្មដែរ។
វាមានលទ្ធភាពនៃការផ្ទុះសង្គ្រាមពាណិជ្ជគម្មនោះ ក៏ព្រោះតែ ប្រទេសដែលដៃគូរកស៊ីធំៗរបស់អាមេរិក រួមមានទាំងចិន និងសម្ព័ន្ធអាមេរិក កូរ៉េខាងត្បូង និងជប៉ុន សុទ្ធតែប្រឈមមុខបញ្ហា ។ ចិន ក៏ថែមទាំងបានព្រមានឲ្យអាមេរិកអនុវត្តនយោបាយពាណិជ្ជកម្មឲ្យស្មើភាព ៕
Tag:
ឥណ្ឌូណេស៊ី
អាមេរិក
អាស៊ាន
© រក្សាសិទ្ធិដោយ thmeythmey.com