អន្តរជាតិ
លោក ត្រាំ ប្រកាសរក្សាមន្ទីរឃុំឃាំងអាមេរិកនៅហ្កាន់តាណាម៉ូ លោក ដូណាល់ ត្រាំ កំពុងថ្លែងទៅកាន់សភា (រូបភាព៖ Xinhua)
× នៅថ្ងៃទី៣០ ខែមករា ប្រធានាធិបតីអាមេរិក ដូណាល់ ត្រាំ បានចេញបញ្ជាឲ្យបន្តបើកទីតាំងឃុំខ្លួនហ្កាន់តាណាម៉ូ ដែលគ្រប់គ្រងដោយយោធាអាមេរិក។ លោក ត្រាំ ប្រកាសពីបញ្ជានេះ នាឱកាសថ្លែងសុន្ទរកថាចំពោះមុខសភាទាំងពីរ។ ការចេញបញ្ជានេះ គឺជាដើរផ្ទុយពីនយោបាយរបស់អតីតរដ្ឋបាលប្រធានាធិបតី បារ៉ាក់ អូបាម៉ា ដែលប៉ុនប៉ងបិទទីតាំងដ៏អសោចន៍នេះ ព្រោះរងការរិះគន់ខ្លាំងលើការរំលោភសិទ្ធិមនុស្សធ្ងន់ធ្ងរ។
ក្នុងសុន្ទរកថានៅមុខសភាជាលើកដំបូងនៅយប់ថ្ងៃទី៣០ ខែមករា លោក ដូណាល់ ត្រាំ បានបញ្ជាក់ពីការរក្សាពាក្យសន្យារបស់ខ្លួនក្នុងការបន្តដំណើការកន្លែងឃុំឃាំងនៅហ្កាន់តាណាម៉ូ។ មុនពេលថែ្លងសុន្ទរកថានេះ លោក ត្រាំ និយាយថា លោកបានចុះហត្ថលេខាលើបទបញ្ជាមួយដែលបង្គាប់ឲ្យរដ្ឋមន្ត្រីការពារជាតិ ជេម ម៉ាធីស សិក្សាឡើងវិញគោលនយោបាយឃុំខ្លួនរបស់យោធា និងបន្តបើកទីតាំងឃុំខ្លួនដែលនៅជាប់ទឹកដីគុយបា។
ចំពោះសមាជិកសភាទាំងពីរ សមាជិករដ្ឋាភិបាល បណ្ដាមេទ័ពនានា លោក ត្រាំ ហាក់ចោទប្រកាន់រដ្ឋបាលអាមេរិកមុនៗថា បានដោះលែងក្រុមភេរវករគ្រោះថ្នាក់រាប់រយនាក់ដោយល្ងីល្ងើ ហើយពួកគេក៏ប្រយុទ្ធជាមួយទាហានអាមេរិកវិញ។ ប្រធានាធិបតីអាមេរិកបានលើកយកករណីមេភេរវករ al-Baghdadi ដែលកំពុងដឹកនាំក្រុមរដ្ឋឥស្លាមធ្វើព្យុះធ្វើភ្លៀងនៅមជ្ឈិមបូព៌ា និងស្ថិតពីក្រោយការវាយប្រហារជាច្រើននៅជុំវិញពិភពលោក។
យ៉ាងណាមិញ លោក ត្រាំ ប្រកាសថា អាមេរិកនឹងបង្កើនវិធានការប្រឆាំងភេរវករ ព្រោះពួកគេជាក្រុមសកម្មជនខុសច្បាប់ មិនមែនជាឧក្រិដ្ឋជនទេ។ ក្នុងន័យនេះ ប្រធានាធិបតីរូបនេះក៏លើកឡើងដែរថា ភេរវករជាច្រើនដែលចាប់ខ្លួនទាំងនៅទឹកដីអាមេរិក ឬក៏នៅបរទេសក្ដី នឹងត្រូវបញ្ជូនទៅកាន់គុកហ្កាន់តាណាម៉ូ ដើម្បីសួរចម្លើយ។
គុកហ្កាន់តាណាម៉ូ ត្រូវបានបង្កើតក្រោយហេតុការណ៍វាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១ ដើម្បីឃុំឃាំង។ មនុស្សប្រមាណ៧០០នាក់ ត្រូវបានឃុំខ្លួនដោយគ្មានចោទប្រកាន់ ឬការកាត់ទោសអ្វីទាំងអស់។ រដ្ឋបាលអាមេរិកជំនាន់នោះរងការរិះគន់ខ្លាំងដោយសារគុកនេះ ព្រោះតែមានការរំលោភសិទ្ធិមនុស្សធ្ងន់ធ្ងរ។ មកដល់អាណត្តិលោក បារ៉ាក់ អូបាម៉ា អ្នកជាប់ឃុំឃាំងជាច្រើនត្រូវបានផ្ទេរទៅកាន់កន្លែងឃុំខ្លួនផ្សេង ឬប្រទេសកំណើតវិញ។
នៅឆ្នាំ២០០៩ លោក អូបាម៉ា បានចេញបញ្ជាបិទគុកនេះ តែមិនបានសម្រេច ព្រោះមានមតិជំទាស់ច្រើនពីសមាជិកសភា។ បច្ចុប្បន្ន អ្នកទោសចំនួន៤១នាក់ទៀតកំពុងជាបឃុំនៅហ្កាន់តាណាម៉ូ ប៉ុន្តែចំនួននេះទំនងកើនឡើង ក្រោយលោក ត្រាំ បើកផ្លូវឲ្យយោធាបញ្ជូនភេរវករដែលចាប់បានទៅកាន់ទីនោះ។ កាលពីឆ្នាំមុន លោកធ្លាប់ពិចារណាបញ្ជូនជនសង្ស័យពាក់ព័ន្ធករណីភេរវកកម្មទៅកាន់គុកយោធាទៀតផង៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com