កីឡាអន្តរជាតិ
អន្តរជាតិ
ឧស្សហកម្មបាល់ទាត់រងផលប៉ះពាល់ព្រោះតែការចំណាយដ៏ច្រើនលើភ្នាក់ងារកីឡា
× លោក Gianni Infantino ប្រធានសហព័ន្ធកីឡាបាល់ទាត់អន្តរជាតិ (FIFA) មានការព្រួយបារម្ភយ៉ាងខ្លាំងអំពីចំនួនទឹកប្រាក់យ៉ាងច្រើនសន្ធឹកសន្ធាប់ដែលហូរចេញពីឧស្សាហកម្មកីឡាបាល់ទាត់ទៅលើថ្លៃសេវារបស់ភ្នាក់ងារទិញដូរកីឡាករសម្រាប់ក្លិបក្នុងតំបន់អឺរ៉ុបនាពេលបច្ចុប្បន្ន។
ក្លិបកីឡាបាល់ទាត់ក្នុងក្របខណ្ឌ Premier League បានចំណាយលើការផ្ទេរកីឡាករសម្រាប់ខែមករាឆ្នាំ២០១៨នេះក្នុងចំនួនទឹកប្រាក់ ៤៣០លានផោន (ប្រមាណ៦១០លានដុល្លារ) រាប់ទាំងការចំណាយនៅថ្ងៃចុងក្រោយ ១៥០លានផោន (ប្រហែល២១២លានដុល្លារ)ផង។ នេះជាការវិនិយោគក្នុងចំនួនទឹកប្រាក់ច្រើនបំផុតលើការដោះដូរកីឡាករ ដែលមិនទាន់គិតពីថ្លៃសេវា (ថ្លៃទឹកតែ) សម្រាប់ភ្នាក់ងារដែលបញ្ចុះបញ្ចូលកីឡាករទាំងអស់នោះផង។
កាលពីរដូវកាល ២០១៦-២០១៧ ក្រុមខ្លាំងៗនៃក្របខណ្ឌកំពូលអង់គ្លេសបានចំណាយប្រាក់ ១៧៤លានផោន (ជាង២៤៧លានដុល្លារ) ដល់ក្រុមភ្នាក់ងារ លើការផ្ទេរកីឡាករ។
ការចំណាយលើក្រុមភ្នាក់ងារដ៏ច្រើននេះ បានធ្វើឲ្យលោក Infantino ព្រួយបារម្ភពីលំហូរទឹកប្រាក់ចេញពីឧស្សាហកម្មបាល់ទាត់ ដែលអាចប៉ះពាល់ដល់ការចំណាយរបស់ក្លិប និងជះឥទ្ធិពលដល់កីឡាករផង។
លោកប្រធាន FIFA រូបនេះបានលើកឡើងពីក្តីបារម្ភរបស់ខ្លួនថា៖«ប្រាក់កម្រៃដែលបង់ទៅឲ្យឈ្មួញកណ្តាល (ភ្នាក់ងារ) បន្តកើនឡើង ខណៈដែលចំនួនទឹកប្រាក់ដែលត្រូវបង់ទៅឲ្យក្លិបដែលបានរួមចំណែកដល់ការអប់រំ និងការបណ្តុះបណ្តាលកីឡាករត្រូវបានធ្លាក់ចុះ។ យើងត្រូវដោះស្រាយបញ្ហានេះដោយបើកចំហ»៕
Tag:
បាល់ទាត់
ភ្នាក់ងារទិញដូរកីឡាករ
FIFA
© រក្សាសិទ្ធិដោយ thmeythmey.com