អាស៊ាន មិនទាន់អាចកំណត់ពេលចុងក្រោយដើម្បីសម្រេច«ក្រមប្រតិបត្តិសមុទ្រចិនខាងត្បូង»ឡើយ

អន្តរជាតិ

អាស៊ាន មិនទាន់អាចកំណត់ពេលចុងក្រោយដើម្បីសម្រេច«ក្រមប្រតិបត្តិសមុទ្រចិនខាងត្បូង»ឡើយ

09, Feb 2018 , 11:10 am

រូបភាព

រូបភាព៖ គេហទំព័រអាស៊ាន

ដោយ:

កិច្ចប្រជុំចង្អៀតរដ្ឋមន្ត្រីការបរទេសអាស៊ាន ដែលមានសិង្ហបុរីជាប្រធានវិលជុំ បានបញ្ចប់ជាមួយលទ្ធផ្លែផ្កា និងដំណើរឆ្ពោះទៅមុខ។ ប្រមុខការទូតរបស់អាស៊ានបានលើកឡើងពីបញ្ហាប្រឈមធំៗជាច្រើនសម្រាប់តំបន់យកទៅជជែកពិភាក្សា ក្នុងនោះមានជម្លោះអធិបតេយ្យសមុទ្រចិនខាងត្បូង។

«យើងបានផ្លាស់ប្តូរយោបល់លើបញ្ហាក្នុងតំបន់ និងអន្តរជាតិ ដែលរាប់បញ្ចូលទាំងបញ្ហាភេរវកម្ម, ការគំរាមកំហែងតាមប្រព័ន្ធអ៊ីនធឺណិត និងបទល្មើសឆ្លងដែន ក៏ដូចជាការស្ថានការណ៍នៅតំបន់មជ្ឈិមបូព៌ា ,ឧបទ្វីបកូរ៉េ និងសមុទ្រចិនខាងត្បូង»។ រដ្ឋមន្ត្រីការបរទេសអាស៊ានបានលើកឡើងដូច្នេះក្នុងសេចក្តីថ្លែងការណ៍រួមរបស់ខ្លួនក្រោយបញ្ចប់កិច្ចប្រជុំចង្អៀតពីថ្ងៃទី៤ដល់ថ្ងៃទី៦ កុម្ភៈ ។

តាមរយៈសេចក្តីថ្លែងការណ៍រួមកម្រាស់ ៥ ទំព័រ រដ្ឋមន្ត្រីអាស៊ាន បានបញ្ជាក់ពីសារៈសំខាន់នៃការរក្សា និងលើកកម្ពស់សន្តិភាព, សន្តិសុខ, ស្ថិរភាព, សុវត្ថិភាពនិងសេរីភាពនៃការហោះហើរលើសមុទ្រចិនខាងត្បូង ក៏ដូចជា មើលឃើញពីផលប្រយោជន៍ ក្នុងការធ្វើឲ្យសមុទ្រចិនខាងត្បូង ក្លាយជាសមុទ្រសន្តិភាព, ស្ថិរភាព និងវិបុលភាព ។

អ្វីគួរកត់សម្គាល់នោះ អាស៊ាន ដែលកំពុងតែមានសិង្ហបុរីជាប្រធាន បានកត់សម្គាល់ពីការព្រួយបារម្ភរបស់ប្រទេសសមាជិកជុំវិញការធ្វើសកម្មភាព និងកសាងកោះសិប្បនិម្មិតនៅក្នុងតំបន់មានជម្លោះដែលបានធ្វើឲ្យភាគីបាត់បង់ទំនុកចិត្ត និងការជឿជាក់គ្នា ក៏ដូចជាបង្កជាភាពតានតឹងនៅក្នុងតំបន់។ តែយ៉ាងណា អាស៊ាន មិនបានថ្កោលទោស និងបញ្ជាក់ឈ្មោះប្រទេស ដែលកំពុងតែបង្កបញ្ហានៅក្នុងសេចក្តីថ្លែងការណ៍នោះឡើយ ។

ជុំវិញបញ្ហានេះផងដែរ រដ្ឋមន្ត្រីការបរទេសអាស៊ាន ក៏បានឯកភាពគ្នាក្នុងការប្រកាន់យកគោលការណ៍ « យោគយល់គ្នាទៅវិញទៅមកលើពេលកំណត់ នៃការសម្រេចឲ្យបានក្រមប្រតិបត្តិសមុទ្រចិនខាងត្បូង» ។ វាមានន័យថាសមាជិកអាស៊ាន នៅមិនទាន់ហ៊ានកំណត់ ពេលណាមួយ ដើម្បីបញ្ចប់ការចរចាលើក្រមប្រតិបត្តិសមុទ្រចិនខាងត្បូងផងដែរ ។ សូម្បីតែប្រធានអាស៊ានផ្ទាល់ ក៏មិនហ៊ានធានាថា អាចបញ្ចប់ការចរចាលើក្រមប្រតិបត្តិនេះបានពេលណា ។

សូមរម្លឹកផងដែរថា បញ្ហាសមុទ្រចិនខាងត្បូង គឺជាជម្លោះអធិបតេយ្យមួយ ដែលមានរដ្ឋពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយចិន ។ ជម្លោះនេះ បានអូសបន្លាយដោយគ្មានដំណោះស្រាយរួម ជាច្រើនទសវត្សរ៍មកហើយ ។

នៅចុងឆ្នាំ២០១៧កន្លងទៅ ដែលជាពេលហ្វីលីពីនជាប្រធានអាស៊ាន ភាគីទាំងពីរចិន និងអាស៊ាន ចុះហត្ថលេខាលើក្របខណ្ឌនៃក្រមប្រតិបត្តិសមុទ្រចិនខាងត្បូងដែលជាគ្រោងឆ្អឹងនៃកិច្ចព្រមព្រៀង។ ភាគីក៏ចាប់ផ្តើមការចរចាជាផ្លូវការលើក្រមប្រតិបត្តិសមុទ្រចិនសមុទ្រ ដើម្បីកំណត់ថាក្រមនេះ គួរដាក់បញ្ចូលបទបញ្ញត្តិបែបណាដើម្បីគ្រប់គ្រងសកម្មភាពនៅក្នុងតំបន់នោះប្រកបដោយប្រសិទ្ធភាព និងអាចអនុវត្តបានទាំងអស់គ្នានោះ ៕