ជាទូទៅ ការឈឺចាប់មានពីរប្រភេទគឺឈឺចាប់ស្រួច្សរាវ ដែលមានរយៈពេលខ្លី តែខ្លាំង និងឈឺចាប់រ៉ាំរ៉ៃដែលមានរយៈពេលពីរបីសប្បាយ។ ជាទូទៅ វាជាសញ្ញាដែលបញ្ជាក់ថា រាងកាយកំពុងតែមានរបួស ឬការបង្ករោគហើយ។ ការឈឺចាប់រ៉ាំរ៉ៃអាចមានរយៈពេលយូរ និងបន្តជាប់ក្រោយពីរបួសបានជាហើយក៏ដោយ។ វាមានមធ្យោបាយច្រើនណាស់ក្នុងការបំបាត់ការឈឺចាប់ដូចជា ការលេបថ្នាំ វិធីបំបាត់ការឈឺបែបធម្មជាតិ និងការផ្លាស់ប្តូររបៀបរស់នៅ។
ការប្រើវិធីព្យាបាលដោយខ្លួនឯងតាមបែបធម្មជាតិ
ស្អំទឹកក្តៅ៖ វិធីនេះល្អសម្រាប់កន្លែងណាមួយនៃរាងកាយមានភាពតឹងខ្លាំង៖
• ចូរចាក់ទឹកក្តៅក្នុងដប់ទឹក បន្ទាប់មករុំជាមួយកន្សែង ហើយយកវាទៅស្អំនៅលើស្បែកដោយផ្ទាល់
• ភាពក្តៅនឹងជួយបង្កើនលំហូរឈាមទៅកន្លែងដែលស្អំនោះ
• រឿងនេះល្អជាពិសេសក្នុងការបំបាត់ឈឺលើករណីសាច់ដុំដែលរឹង ការតឹងខ្នង ឬឈឺចាប់ពេលមករដូវ
បំបាត់ឈឺដោយស្អំទឹកត្រជាក់៖ ការស្អំបែបនេះនឹងធ្វើឲ្យស្ពឹកដល់កន្លែងឈឺចាប់ ហើយក៏បន្ថយការហើមដែរ។
• ចូរប្រើថង់ទឹកកកដោយដាក់ទឹកកកក្នុងនោះហើយរុំជាមួយកន្សែងហើយស្អំលើស្បែកដោយផ្ទាល់
• ចូរស្អំបែបនេះ ១០នាទី បន្ទាប់មកយកចេញវិញដើម្បីកុំឲ្យស្ពឹកខ្លាំងពេក។ អ្នកក៏អាចស្អំបែបនេះម្តងទៀតនៅថ្ងៃស្អែកដែរ។
• វិធីនេះនឹងជួយដល់សន្លាក់ដែលក្តៅ ហើម ឬរលាក ជាំ ឬការរបួសតិចតួចផ្សេងៗទៀតបាន
វិធីព្យាបាលដោយឬសឈើ៖ ថ្វីបើរឿងនេះមិនត្រូវបានធ្វើតេស្តអ្វីច្រើនមែន តែអ្នកខ្លះនិយាយថាវាមានប្រយោជន៍ដែរ។ យកល្អគួរតែកុំធ្វើបែបនេះអីបើសិនជាអ្នកមានផ្ទៃពោះ៖
• ខ្ញីប្រហែលជាជួយបន្ថយការរលាក
• រមៀតប្រហែលជាបន្ថយការរលាក ជួយដល់ការរលាកសន្លាក់ និងបន្ថយការក្រហាយដើមទ្រូង។ មិនត្រូវប្រើវាឡើយបើសិនជាអ្នកមានជំងឺថង់ទឹកប្រមាត់
ចាក់ម្ជុរវិទ្យាសាស្ត្រ៖ របៀបដែលម្ជុរវិទ្យាសាស្ត្របំបាត់ការឈឺចាប់គឺមិនទាន់មានការយល់ដឹងច្បាស់លាស់នៅឡើយទេ ប៉ុន្តែវាប្រហែលជាភ្ញោចដល់រាងកាយដើម្បីបញ្ចេញសារធាតុបំបាត់ការឈឺចាប់បែបធម្មជាតិឈ្មោះថា Endorphins។
គ្រប់គ្រងការឈឺចាប់ជាមួយនឹង Biofeedback៖ វាគឺជាពេលវេលាដែលអ្នកព្យាបាលដោយចលនាភ្ជាប់អ្នកជាមួយនឹងឧបករណ៍ដែលអាចប្រាប់ថា រាងកាយមានប្រតិកម្មបែបណាទៅលើចលនាធម្មតាក្នុងរាងកាយ។ បន្ទាប់មកគេនឹងប្រើប្រាស់ព័ត៌មាននេះដើម្បីផ្ចង់អារម្មណ៍លើការធ្វើឲ្យរាងកាយអ្នកមានការប្រែប្រួល៖
• មនុស្សយើងអាចរៀនធ្វើឲ្យសាច់ដុំធូរស្រាលឡើងវិញ
• វិធីព្យាបាលនេះនឹងផ្តល់ជាព័ត៌មានអំពីភាពតឹងរបស់សាច់ដុំ សីតុណ្ហភាពរាងកាយ ការឆ្លើយតបនឹងញើស និងចង្វាក់បេះដូង
ការភ្ញោចដោយចរន្តអគ្គិសនី៖ វិធីសាស្ត្រមួយនេះ ជាការប្រើប្រាស់កុំព្យូទ័របញ្ជូនចរន្តអគ្គិសនីតូចៗចូលទៅក្នុងរាងកាយតាមរយៈអេឡិចត្រូត ដែលអាចធ្វើឲ្យសាច់ដុំកន្ត្រាក់បាន។ អត្ថប្រយោជន៍របស់វាមានដូចជា៖
• មានចលនាសន្លាក់កាន់តែល្អជាងមុន
• មិនសូវមានការរឹងជាប់របស់សាច់ដុំ
• បង្កើនភាពរឹងមាំ
• បន្ថយការបាត់បង់កំហាប់ឆ្អឹង
• របត់ឈាមរត់កាន់តែល្អ
ការលាបថ្នាំ
លាបថ្នាំបំបាត់ការឈឺចាប់៖ អ្នកអាចប្រើថ្នាំលាបលើកន្លែងដែលឈឺចាប់ដោយផ្ទាល់បាន។ វាមានធាតុផ្សំច្រើនប្រភេទខុសៗគ្នា ជាពិសេសធាតុផ្សំដែលសកម្មតែម្តងដូចជា៖
• Capsaicin ដែលវាជាសារធាតុមានក្នុងម្ទេស ហើយក៏ធ្វើឲ្យហឹរផងដែរ។ វាជួយការពារកុំឲ្យសរសៃប្រសាទបញ្ជូនសញ្ញាឈឺចាប់បាន។
• Salicylates ជាប្រភេទក្រែមដែលមានថ្នាំអាស្ពីរីន និងបំបាត់ការរលាក និងឈឺចាប់បាន។
• Counterirritant ជាប្រភេទក្រែមដែរ ដែលមានសារធាតុម៉ង់តុល ដើម្បីជួយឲ្យមានអារម្មណ៍ក្តៅ ឬត្រជាក់
• ថ្នាំទាំងនេះច្រើនតែត្រូវបានគេប្រើប្រាស់ដើម្បីបន្ថយការឈឺចាប់នៅសន្លាក់
ថ្នាំបន្ថយការរលាក៖ ថ្នាំប្រភេទ Non-steroidal Anti-inflammatory Medications នឹងជួយការពារកុំឲ្យរាងកាយបង្កើតសារធាតុបង្កការរលាកបាន។ ថ្នាំទាំងនោះអាចមានដូចជា៖
• Aspirin
• Ketoprofen
• Naproxen Sodium
• ថ្នាំទាំងនេះអាចមានប្រសិទ្ធភាពបន្ថយការឈឺចាប់ដោយសារជំងឺរលាកឆ្អឹងខ្ចីក្នុងសន្លាក់ ឈឺសាច់ដុំ ឈឺខ្នង មានបញ្ហាធ្មេញ ជំងឺរលាកសន្លាក់ហ្គោដ ការឈឺចាប់ពេលមករដូវ ការឈឺសន្លាក់ដោយសារតែក្តៅខ្លួន ឬឈឺក្បាល
• ទោះបីជាយ៉ាងណាក៏ដោយ ចូរពិគ្រោះជាមួយគ្រូពេទ្យជានិច្ចបើសិនជាអ្នកត្រូវការប្រើថ្នាំអ្វីមួយ។
ជួបគ្រូពេទ្យបើសិនជាមានការបង្ករោគ ឬរបួសដែលមិនអាចព្យាបាលនៅផ្ទះបាន៖ គ្រូពេទ្យអាចចេញជាការព្យាបាលដើម្បីជួយឲ្យរបួស ឬជំងឺអ្នកឆាប់ជា ហើយថ្នាំក៏អាចបន្ថយការឈឺចាប់បានល្អដែរ៖
• ចូរទៅជួបគ្រូពេទ្យលើករណីមានរបួសលើរាងកាយដូចជា ថ្លោះគ្រិច បាក់បែកឆ្អឹង ឬរបួសជ្រៅៗ។ គ្រូពេទ្យអាចនឹងប្រើបង់រុំ ឬដាក់រណបឆ្អឹងដែលបាក់ ឬកាត់សាច់រលួយចោលដើម្បីជម្រុញដល់ការជារបួសជាដើម។ បើសិនជាអ្នកត្រូវការថ្នាំបំបាត់ឈឺចាប់ខ្លាំងៗ គ្រូពេទ្យអាចនឹងចេញឲ្យប្រើបាន។
• ចូរស្វែងរកការព្យាបាលពីគ្រូពេទ្យភ្លាមបើសិនជាអ្នកមានការបង្ករោគធ្ងន់ធ្ងរដូចជា ការបង្ករោគនៅផ្លូវដង្ហើមធ្ងន់ធ្ងរដូចជា រលាកសួត ឬរលាកទងសួត ការបង្ករោគនៅត្រចៀក ឬភ្នែក ជំងឺកាមរោគ ឈឺពោះខ្លាំងក្លាដែលជាសញ្ញាបញ្ជាក់អំពីការបង្ករោគក្នុងពោះ។ គ្រូពេទ្យនឹងចេញជាថ្នាំផ្សះខ្លាំងៗដើម្បីព្យាបាល។
ពិភាក្សាលើការប្រើថ្នាំជាមួយគ្រូពេទ្យ៖ បើសិនជាមិនមានអ្វីមានប្រសិទ្ធភាពទេ ហើយអ្នកនៅតែឈឺចាប់ខ្លាំងទៀត គ្រូពេទ្យអាចនឹងប្តូរថ្នាំថ្មីឲ្យប្រើដូចជាពពួក Morphine ឬ Codeine ជាដើម។
• ថ្នាំទាំងនេះអាចញៀនបាន។ ដូច្នេះចូរប្រើវាទៅតាមតែវេជ្ជបញ្ជាបានហើយ។
បំបាត់ការឈឺចាប់នៅសន្លាក់រ៉ាំរ៉ៃជាមួយថ្នាំចាក់ Cortisone ៖ ថ្នាំចាក់ប្រភេទនេះច្រើនតែត្រូវបានគេចាក់ដោយផ្ទាល់ទៅក្នុងសន្លាក់ដែលឈឺចាប់ខ្លាំង។ វាច្រើនតែមានសារធាតុ Corticosteroid និងថ្នាំស្ពឹកនៅនឹងកន្លែង។
• វិធីព្យាបាលនេះមានប្រសិទ្ធភាពលើករណីជំងឺដូចជា រលាកសន្លាក់ហ្គោដ ចង្កោមរោគសញ្ញាគៀបសរសៃនៅករដៃ រលាកសរសៃចងសាច់ដុំ និងផ្សេងៗទៀត
• ដោយសារតែការចាក់ថ្នាំទាំងនេះអាចបង្កការខូចខាតដល់ឆ្អឹងខ្ចីក្នុងសន្លាក់ ដូច្នេះគេអាចផ្តល់ការចាក់ថ្នាំបែបនេះតែ ៣ ទៅ៤ដងប៉ុណ្ណោះក្នុងមួយឆ្នាំ។
ពិភាក្សាលើការប្រើថ្នាំប្រឆាំងការបាក់ទឹកចិត្តដើម្បីបំបាត់ឈឺចាប់៖ ថ្នាំទាំងនេះប្រហែលជាជួយបង្កើនសារធាតុគីមីនៅក្នុងឆ្អឹងកងខ្នងដែលអាចបន្ថយការបញ្ជូនសញ្ញាឈឺចាប់បាន៖
• វាប្រហែលជាត្រូវការរយៈពេលពីរបីសប្តាហ៍មុនពេលផ្តល់នូវការបំបាត់ឈឺចាប់បាន
• វាអាចមានប្រយោជន៍លើការព្យាបាលការរលាកសន្លាក់ ខូចសរសៃប្រសាទ ការឈឺចាប់ដោយសារការឈឺឆ្អឹងកងខ្នង ការឈឺចាប់ដោយសារដាច់សរសៃឈាមខួរក្បាល ឈឺក្បាល ឈឺខ្នង និងឈឺក្នុងអាងត្រគាក
• ថ្នាំប្រឆាំងការបាក់ទឹកចិត្តភាគច្រើនដែលគេប្រើដើម្បីគ្រប់គ្រងការឈឺចាប់នោះគឺ Tricyclics។
បន្ថយការឈឺចាប់តាមរយៈការផ្លាស់ប្តូររបៀបរស់នៅ
សម្រាក៖ នៅពេលអ្នកនៅតែមានភាពសកម្ម រាងកាយអាចនឹងប្រើថាមពលដោយផ្ទាល់ដើម្បីជួយឲ្យរបួសជា។ ចូរផ្តល់ពេលវេលាដល់រាងកាយដើម្បីជាសះស្បើយតាមរយៈការគេងគ្រប់គ្រាន់រាល់យប់។ ចូរគេងយ៉ាងហោចណាស់ ៨ម៉ោងក្នុងមួយយប់៖
• តមការហាត់ប្រាណដែលប្រើកម្លាំងខ្លាំងៗដូចជាការរត់ខណៈពេលដែលរាងកាយជាពីរបួស
• ចៀសវាងការស្ថិតក្នុងស្ថានភាពតានតឹងច្រើន។
ព្យាបាលដោយចលនា៖ បើសិនជាគ្រូពេទ្យដឹងថា វាអាចមានប្រយោជន៍ គាត់ប្រហែលជាណែនាំឲ្យអ្នកជួបជាមួយគ្រូពេទ្យជំនាញខាងព្យាបាលចលនាដើម្បីដោះស្រាយបញ្ហារបស់អ្នកហើយ។ ការពញយាបាលដោយចលនាអាចជួយអ្នកប្រើប្រាស់ការហាត់ប្រាណដើម្បី៖
• ពង្រឹងដល់សាច់ដុំដែលខ្សោយ
• បង្កើនចលនារបស់សន្លាក់
• ជួយឲ្យរបួសឆាប់ជា
• វាច្រើនតែមានប្រសិទ្ធភាពលើករណីជំងឺសាច់ដុំនិងឆ្អឹង សាច់ដុំសរសៃប្រសាទ បេះដូងសួត និងជំងឺផ្សេងៗទៀត។
គ្រប់គ្រងអារម្មណ៍ជាមួយនឹងវិធីសាស្ត្របន្ធូរអារម្មណ៍៖ ការឈឺចាប់អាចបង្កឡើងដោយការថប់អារម្មណ៍ ស្ត្រេស បាក់ទឹកចិត្ត និងខឹង ដែលអារម្មណ៍ទាំងនេះអាចធ្វើឲ្យរាងកាយមានការប្រែប្រួលដូចជា ភាពតឹងរបស់សាច់ដុំតែម្តង។ ចូរព្យាយាមប្រើវិធីបន្ធូរអារម្មណ៍ដូចជា៖
• ហាត់ប្រាណបន្ធូរអារម្មណ៍
• ដកដង្ហើមជ្រៅៗ
• តាំងសមាធិ
• ហាត់យូហ្គា
• ហាត់ក្បាច់តៃជិ
• ម៉ាស្សា
ជួបអ្នកជំនាញខាងចិត្តសាស្ត្រ៖ ការដែលទៅជួបគ្រូពេទ្យខាងជំងឺផ្លូវចិត្តនឹងជួយអ្នកយល់ដឹងអំពីអារម្មណ៍ខ្លួនឯងកាន់តែល្អ ហើយក៏ព្យាបាលវាបានដែរ។ បើសិនជាអ្នកមានបញ្ហារាងកាយដោយសារតែស្ត្រេសខាងផ្លូវអារម្មណ៍ដូចជា ការតឹងសាច់ដុំបង្កឲ្យឈឺចាប់ រឿងនេះប្រហែលជាជួយអ្នកសម្គាល់ដឹងពីមូលហេតុរបស់វា ហើយក៏បង្ការវាបានដែរ។
ការព្យាបាលអាកប្បកិរិយាឆ្លាតវៃ៖ ការព្យាបាលបែបនេះនឹងជួយដល់អ្នកជំងឺយកឈ្នះដល់ភាពលំបាក ឬដោះស្រាការឈឺចាប់ដែលពួកគេមិនអាចចៀសវាងបាន។ ការសិក្សាបានបង្ហាញថា វិធីពញយាបាលមួយនេះមានប្រយោជន៍សម្រាប់ជំងឺជាច្រើនដូចជា ការឈឺខ្នងរ៉ាំរ៉ៃតែម្តង។ គ្រូពេទ្យនឹងជួយអ្នក៖
• សម្គាល់ដឹងនូវអ្វីដែលធ្វើឲ្យអ្នកឈឺចាប់
• ដឹងអំពីអ្វីដែលអ្នកជឿជាក់លើស្ថានភាពខ្លួនឯង
• យល់ដឹងអំពីមធ្យោបាយដែលការគិតរបស់អ្នកអាចជួយខ្លួនឯងបាន
• លើកទឹកចិត្តអ្នកដើម្បីបង្កើតនូវការគិតផ្សេង និងថ្មីដើម្បីជួយឲ្យជីវិតរស់នៅកាន់តែល្អជាមុន៕
ផ្ដល់សិទ្ធដោយ៖www.health.com.kh