ពីនេះ ពីនោះ
ទឹកជំនន់មានសារៈសំខាន់ណាស់ សម្រាប់ដល់អ្នកធ្វើចម្ការតាមដងទន្លេមេគង្គ
× លោក គង់ អឿន អាយុ ៧២ឆ្នាំ ជាកសិករម្នាក់នៅក្នុងស្រុកកៀនស្វាយ ខេត្តកណ្តាល ដែលពឹងផ្អែកទាំងស្រុងលើទឹកទន្លេមេគង្គ ដើម្បីស្រោចស្រពដំណាំរបស់គាត់។
តាំងពីគាត់នៅក្មេង រហូតមកដល់ពេលនេះ លោក គង់ អឿន ពឹងផ្អែកទាំងស្រុងទៅលើទឹកទន្លេមេគង្គ សម្រាប់ការធ្វើកសិកម្ម។ មិនតែប៉ុណ្ណោះ ឪពុកម្តាយរបស់គាត់ កាលនៅមានជីវិត ព្រមទាំងសាច់ញាតិរបស់គាត់ ក៏ជាកសិករដែលពឹងផ្អែកប្រភពទឹកពីទន្លេមេគង្គ ដើម្បីស្រោចស្រពដំណាំចិញ្ចឹមជីវិតដែរ។
លោក គង់ អឿន បានមានប្រសាសន៍ថា៖«ខ្ញុំចាប់ផ្តើមដាំដំណាំផ្សេងៗ ដូចជាល្ហុង ប៉េងប៉ោះ និងពោត ក្នុងពេលទឹកបានស្រកចុះអស់ ក្នុងខែវិច្ឆិកា។ យើងអាចប្រមូលផលដំណាំ ជាពិសេសល្ហុង រហូតដល់រដូវទឹកជំនន់ចូលមកដល់ នាខែកក្កដា»។
លោកបន្តថា៖ «ខ្ញុំមានអាជីពតែមួយគត់ គឺរបរធ្វើកសិកម្ម នៅតាមដងទន្លេមេគង្គ និងនៅលើកោះក្នុងទន្លេមេគង្គ។ ឆ្នាំខ្លះ កម្រិតកម្ពស់ទឹកនៅក្នុងទន្លេមេគង្គមិនឡើងខ្ពស់ ខ្ញុំក៏ទទួលបានប្រាក់ចំណេញតិចតួច ពីការងារធ្វើកសិកម្មរបស់ខ្ញុំផងដែរ។ ដូច្នេះកម្រិតកម្ពស់ទឹកក្នុងទន្លេមេគង្គ មានជាប់ទាក់ទងយ៉ាងសំខាន់ ចំពោះជីវភាពគ្រួសារខ្ញុំ»។
លោក គង់ អឿន ពន្យល់ថានៅពេលកម្ពស់ទឹកនៅក្នុងទន្លេមេគង្គឡើងខ្ពស់ បាននាំមកនូវដីល្បាប់ ប្រកបដោយជីជាតិចូលទៅក្នុងចម្ការរបស់គាត់។ ដូច្នេះ គាត់ក៏មិនសូវចំណាយប្រាក់ លើការទិញជីដាក់ដំណាំច្រើនទៀតដែរ។ ជាមួយគ្នានេះ កម្រិតទឹកក្នុងទន្លេមេគង្គឡើងខ្ពស់ វាអាចសម្លាប់ស្មៅ និងដើមឈើតូចៗ ដែលគ្មានប្រយោជន៍ និងជួយបំផ្លាញជម្រកសត្វកណ្តុរផងដែរ។ ការប្រែប្រួលអាកាសធាតុ និងការកសាងទំនប់វារីអគ្គិសនីនៅខ្សែទឹកខាងលើ អាចមានជាប់ទាក់ទងទៅនឹងកម្រិតកម្ពស់ទឹកនៅក្នុងអាងទន្លេមេគង្គ៕
(អត្ថបទ និងរូបភាពដោយ Chhut Chheana USAID Wonders of the Mekong)
© រក្សាសិទ្ធិដោយ thmeythmey.com