អន្តរជាតិ
កូរ៉េខាងជើងផ្ញើ «សារសម្ងាត់» ឲ្យអាមេរិកតាមកូរ៉េខាងត្បូង មេដឹកនាំកូរ៉េខាងជើង គីម ជុងអ៊ុន ចាប់ដៃមន្រ្តីកូរ៉េខាងត្បូង (រូបភាព៖ Reuters)
× ទីប្រឹក្សាសន្តិសុខជាតិរបស់ប្រធានាធិបតីកូរ៉េខាងត្បូង Chung Eui-yong នឹងធ្វើដំណើរទៅកាន់រដ្ឋធានីវ៉ាស៊ីនតោននៅសប្ដាហ៍នេះ ដើម្បីរាយការណ៍ពីលទ្ធផលទស្សនកិច្ចនៅកូរ៉េខាងជើង។ កូរ៉េខាងជើងក៏បានផ្ដាំផ្ញើឲ្យលោក Chung Eui-yong ជួយនាំសាររបស់ខ្លួនទៅប្រាប់អាមេរិកផងដែរ ប៉ុន្តែមន្ត្រីកូរ៉េខាងត្បូងរូបនេះមិនបញ្ជាក់ពីអត្ថន័យរបស់សារនោះឡើយ តែទំនងជាជំហរចង់ចាប់ផ្ដើមចរចាជាមួយអាមេរិក។
ទើបបញ្ចប់ទស្សនកិច្ចពីរថ្ងៃនៅកូរ៉េខាងជើង ប្រេសិតពិសេសប្រធានាធិបតីកូរ៉េខាងត្បូងលោក Chung Eui-yong ត្រូវបន្តដំណើរទៅអាមេរិករយៈពេលពីរថ្ងៃទៀត។ មន្ត្រីវិមានប្រធានាធិបតី Cheong Wa Dae បាននិយាយនៅថ្ងៃទី៧ ខែមីនាថា លោក Chung Eui-yong នឹងធ្វើទស្សនកិច្ចអាមេរិកចាប់ពីថ្ងៃទី៨ ខែមីនា ក្នុងគោលដៅផ្ដល់ព័ត៌មានលម្អិតជុំវិញទស្សនកិច្ចរបស់លោកនៅកូរ៉េខាងជើងទៅឲ្យមន្ត្រីអាមេរិក។
ដំណើរទស្សនកិច្ចរបស់លោកប្រតិភូកូរ៉េខាងត្បូងនៅរដ្ឋធានីព្យុងយ៉ាង ទទួលបានលទ្ធផលគួរឲ្យភ្ញាក់ផ្អើលខ្លាំង។ ក្នុងជំនួបលើកដំបូងជាមួយមន្ត្រីកូរ៉េខាងត្បូង ចាប់តាំងពីការឡើងកាន់អំណាចនៅចុងឆ្នាំ២០១១មក លោក គីម ជុងអ៊ុន បង្ហាញឆន្ទៈចង់ចរចាជាមួយអាមេរិក និងត្រៀមបោះបង់ចោលកម្មវិធីនុយក្លេអ៊ែរ ក្នុងករណីដែលសន្តិសុខរបស់របបដឹកនាំលោកត្រូវបានធានាត្រឹមត្រូវ។ ក្នុងពេលចរចាជាមួយអាមេរិក កូរ៉េខាងជើងសន្យាមិនបាញ់សាកល្បងអាវុធនុយក្លេអ៊ែរ ឬមីស៊ីលអ្វីនោះឡើយ។
បន្ថែមពីលើឆន្ទៈចង់ចរចា កូរ៉េខាងជើងក៏មានសារសម្ងាត់មួយសម្រាប់អាមេរិក និងបានប្រាប់ឲ្យលោក Chung Eui-yong ជួយប្រាប់មន្ត្រីក្រុងវ៉ាស៊ីនតោនផង។ បើតាមទីភ្នាក់ងារព័ត៌មាន Yonhap លោក Chung បានបញ្ជាក់ក្នុងសន្និសីទសារព័ត៌មាននៅថ្ងៃទី៦ ខែមីនា ថា៖ «យើងមិនអាចបញ្ចេញអ្វីគ្រប់យ៉ាងឲ្យប្រព័ន្ធផ្សព្វផ្សាយឡើយ តែយើងមានព័ត៌មានសម្ងាត់របស់កូរ៉េខាងជើង ដែលត្រូវប្រាប់អាមេរិកដោយផ្ទាល់»។
ក្រៅពីអាមេរិក ប្រតិភូកូរ៉េខាងត្បូងដែលមានវត្តមានប្រធានចារកម្មជាតិដែរនោះ នឹងធ្វើដំណើរទៅកាន់ចិន រុស្ស៊ី និងជប៉ុនទៀត ដើម្បីពន្យល់ និងរាយការណ៍ពីលទ្ធផលនៃការចរចាជាមួយកូរ៉េខាងជើង។ ជារួម ប្រទេសទាំងអស់នេះ គឺជាភាគីពាក់ព័ន្ធដោយផ្ទាល់ក្នុងសំណុំរឿងនុយក្លេអ៊ែររបស់កូរ៉េខាងជើង តាមរយៈយន្តការចរចា៦ភាគី។ ប៉ុន្តែតុចរចា៦ភាគីនេះ បានជាប់គាំងតាំងពីចុងឆ្នាំ២០០៨មកម្ល៉េះ។ ជាមួយនឹងការបន្ទន់ឥរិយាបថរបស់ក្រុងព្យុងយ៉ាង ការចរចានេះទំនងមានដង្ហើមដកឡើងវិញហើយ។
ប្រធានាធិបតីអាមេរិក ដូណាល់ ត្រាំ ហាក់មានសុទិដ្ឋនិយមចំពោះការវិវត្តស្ថានការណ៍ឧបទ្វីបកូរ៉េ ក្រោយលោក គីម ជុងអ៊ុន បង្ហាញឆន្ទៈចង់ចរចាជាមួយអាមេរិកលើការបោះបង់អាវុធនុយក្លេអ៊ែរ។ សម្រាប់លោក ត្រាំ ការផ្លាសប្ដូរអាកប្បកិរិយារបស់កូរ៉េខាងជើង គឺជាលទ្ធផលនៃទណ្ឌកម្មជាបន្តបន្ទាប់ ក៏ដូចជាឥទ្ធិពលរបស់ចិនដែរ។ យ៉ាងណា ប្រធានាធិបតីអាមេរិកនៅមិនទាន់ជឿជាក់ទាំងស្រុងលើកូរ៉េខាងជើង ដែលចូលចិត្តនិយាយបាតដៃខ្នងដៃឡើយ៕
Tag:
កូរ៉េខាងជើង
កូរ៉េខាងត្បូង
អាមេរិក
© រក្សាសិទ្ធិដោយ thmeythmey.com