អាមេរិកប្រាប់រដ្ឋអាហ្វ្រិកឲ្យប្រយ័ត្នចំពោះលុយកំចីរបស់ចិន

អន្តរជាតិ

អាមេរិកប្រាប់រដ្ឋអាហ្វ្រិកឲ្យប្រយ័ត្នចំពោះលុយកំចីរបស់ចិន

09, Mar 2018 , 9:19 pm

រូបភាព

រដ្ឋមន្រ្តីការបរទេសអាមេរិក រិច ធីល័រសិន ចាប់ដៃប្រធានគណៈកម្មការអាហ្វ្រិក Moussa Faki (រូបភាព៖ AFP)

ដោយ: តន ចាន់រិទ្ធារ៉ា

ក្នុងដំណើរទស្សនកិច្ចការទូតលើកដំបូងនៅអាហ្វ្រិក រដ្ឋមន្ត្រីការបរទេសអាមេរិក រិច ធីល័រសិន បានប្រាប់ឲ្យរដ្ឋអាហ្វ្រិកត្រូវប្រយ័ត្នប្រយែងចំពោះការខ្ចីលុយពីចិន ព្រោះវាអាចប៉ះពាល់ដល់អធិបតេយ្យរបស់ពួកគេ។ ចិន ដែលពង្រីកឥទ្ធិពលចូលតំបន់អាហ្វ្រិកខ្លាំង បានក្លាយជាប្រភពហិរញ្ញវត្ថុដ៏ធំរបស់រដ្ឋអាហ្វ្រិកដែលក្រីក្រ។ ការបើកដៃឲ្យប្រទេសអាហ្វ្រិកខ្ចីប្រាក់សន្ធឹកសន្ធាប់ និងការបោះទុនវិនិយោគលើគម្រោងធំៗ ធ្វើឲ្យលោកខាងលិចបារម្ភពីការបាត់បង់ឥទ្ធិពលរបស់ខ្លួននៅទ្វីបមួយនេះ។

អេត្យូពី គឺជាគោលដៅទីមួយនៃដំណើរទស្សនកិច្ច៥ប្រទេសនៅតំបន់អាហ្វ្រិករបស់រដ្ឋមន្ត្រីការបរទេសអាមេរិក រិច ធីល័រសិន ។ គោលដៅសំខាន់នៃបេសកកម្មការទូតលើកទីមួយនៅអាហ្វ្រិករបស់លោក ធីល័រសិន នឹងផ្ដោតការប្រឆាំងអំពើភេរវកម្ម លើកកម្ពស់សន្តិភាព អភិបាលកិច្ចល្អ និងការគោរពសិទ្ធិមនុស្សជាដើម។ គោលដៅសំខាន់មួយទៀតនោះ គឺអូសទាញរដ្ឋអាហ្វ្រិកឲ្យចាកឆ្ងាយពីឥទ្ធិពលទឹកប្រាក់ជំនួយ និងការវិនិយោគរបស់ចិន។

នៅរដ្ឋធានីអាឌីសអាបេបានៅថ្ងៃទី៨ ខែមីនា លោក ធីល័រសិន បានប្រាប់ឲ្យបណ្ដាប្រទេសអាហ្វ្រិក ត្រូវគិតឲ្យវែងឆ្ងាយចំពោះការទទួលលុយរបស់ចិន ដែលអាចបង្កជាបញ្ហាដល់ខ្លួនឯងវិញ។ ប្រមុខការទូតអាមេរិករូបនេះបញ្ជាក់ថា វាជារឿងសំខាន់ដែលប្រទេសអាហ្វ្រិកពិចារណាលក្ខខណ្ឌកិច្ចព្រមព្រៀងឲ្យម៉ត់ចត់ និងមិនត្រូវបោះបង់អធិបតេយ្យខ្លួនឡើយ។ ប៉ុន្តែលោក ធីល័រសិន បកស្រាយថា ការណែនាំរបស់មិនមែនមានន័យថា អាហ្វ្រិកមិនអាចទទួលលុយចិននោះទេ។

តាមពិតទៅ អាមេរិក គឺម្ចាស់ជំនួយមនុស្សធម៌ដ៏ធំរបស់អាហ្វ្រិក។ ប៉ុន្តែពីមួយឆ្នាំទៅមួយឆ្នាំ ចិនបានបង្កើនឥទ្ធិពលរបស់ខ្លួនជាមួយប្រទេសអាហ្វ្រិក ជះលុយរាប់ពាន់លានដុល្លារជាជំនួយ និងការវិនិយោគ ពង្រឹងចំណងសេដ្ឋកិច្ចរហូតក្លាយជាដៃគូពាណិជ្ជកម្មធំជាងគេរបស់អាហ្វ្រិកនៅឆ្នាំ២០០៩ ។ ឯកម្មករចិនរាប់ពាន់នាក់កំពុងធ្វើការនៅក្នុងគម្រោងហេដ្ឋារចនាសម្ព័ន្ធរបស់ក្រុមហ៊ុនចិន។ ប្រមុខការទូតអាមេរិកក៏បានរិះគន់ចិនត្រង់ចំណុចនេះ និងវិធីសាស្ត្រផ្ដល់កំចីរបស់ចិន។

«ការវិនិយោគរបស់ចិន មិនបានបង្កើតការងារក្នុងស្រុកគួរឲ្យកត់សម្គាល់ឡើយ។ ប្រសិនបើប្រទេសមួយទទួលកំចីចិន ហើយមានបញ្ហា ប្រទេសនោះនឹងបាត់បង់ការគ្រប់គ្រងលើហេដ្ឋារចនាសម្ព័ន្ធ ឬធនធានរបស់ខ្លួន ពេលគ្មានលទ្ធភាពសងបំណុលវិញ»។ នេះជាសម្ដីរបស់មន្ត្រីការទូតអាមេរិក ផ្សាយដោយទីភ្នាក់ងារព័ត៌មាន Reuters និងបានរំពឹងថា ចិនអាចអនុវត្តតាមគោលការណ៍អន្តរជាតិ និងគោរពអធិបតេយ្យប្រទេសផ្សេង។

ចេញពីអេត្យូពី ប្រមុខការទូតអាមេរិកនឹងបន្តដំណើរទៅកាន់កេនយ៉ា ជីប៊ូទី ឆាដ និងនីហ្ស៊េរីយ៉ាទៀត។ ប្រទេសទាំងនេះកំពុងប្រយុទ្ធប្រឆាំងក្រុមជ្រុលនិយមដែលមានទំនាក់ទំនងជាមួយក្រុមរដ្ឋឥស្លាម និងកំពុងអុកឡុកសន្តិសុខតំបន់ខ្លាំង។ អាមេរិកបានផ្ដល់ជំនួយច្រើនឲ្យរដ្ឋអាហ្វ្រិកដើម្បីទប់ស្កាត់ការកើនឡើងឥទ្ធិពលរបស់ក្រុមភេរវកម្មដែលបង្កការគំរាមកំហែងឥតឈប់ឈរ៕