«កម្មវិធីបារាំងពីរសប្ដាហ៍នៅភ្នំពេញ» អបអរមិត្តភាពបារាំង-កម្ពុជា

ជាតិ

«កម្មវិធីបារាំងពីរសប្ដាហ៍នៅភ្នំពេញ» អបអរមិត្តភាពបារាំង-កម្ពុជា

16, Mar 2018 , 8:39 am

រូបភាព

ដោយ: ប៉ូ សាគុន

ស្ថានទូតបារាំងប្រចាំកម្ពុជា រួមសហការជាមួយសភាពាណិជ្ជកម្មនិងឧស្សាហកម្មបារាំង-កម្ពុជា និងវិទ្យាស្ថានបារាំងនៅកម្ពុជា នឹងរៀបចំព្រឹត្តិការណ៍វប្បធម៌ វិទ្យាសាស្ត្រ និងសេដ្ឋកិច្ចជាច្រើនទៀត ដើម្បីបង្ហាញពីវប្បធម៌បារាំងនិងកម្ពុជា ក៏ដូចជាជំនាញឯកទេសរបស់ក្រុមហ៊ុនបារាំង។

ក្នុងគោលបំណងរឹតចំណងមិត្តភាពរវាងកម្ពុជា និងបារាំង ស្ថានទូតបារាំងនឹងរៀបចំកម្មវិធី បារាំងពីរសប្ដាហ៍នៅភ្នំពេញ ពីថ្ងៃទី១៧ ដល់ថ្ងៃទី៣០ ខែមីនា២០១៨។ កម្មវិធីនេះនឹងបង្ហាញសាធារណជន ពីវប្បធម៌បារាំងនិងកម្ពុជា ការទទួលទានអាហារពេលល្ងាចបែបបារាំង និងការបង្ហាញពីស្នាដៃសិល្បៈសហសម័យរបស់សិល្បករកម្ពុជា។ ការតាំងបង្ហាញផលិតផល និងសេវារបស់ក្រុមហ៊ុនបារាំង និងការប្រារព្វទិវាស្រាវជ្រាវបារាំង-កម្ពុជា ដើម្បីលើកស្ទួយការងារស្រាវជ្រាវ និងអាជីពវិទ្យាសាស្ត្រនៅកម្ពុជា។

កម្មវិធីដំណើរត្រាច់ចរសិល្បៈ ធ្វើនៅថ្ងៃ២៤និង២៥មីនា ចាប់ពីម៉ោង៨ព្រឹកដល់១២ និងរសៀលពីម៉ោង៣ដល់៦ល្ងាច ចូលរួមដោយសេរីនៅស្ថានទូតបារាំងប្រចាំប្រទេសកម្ពុជា។ កម្មវិធីកម្សាន្តលើនាវាជាមួយក្រុមហ៊ុននិងនិស្សិត ថ្ងៃទី២៦មីនាម៉ោង៦កន្លះដល់៨យប់ ចូលរួមដោយឥតគិតថ្លៃ ទីកន្លែងទូក Kanika។ ការពិភាក្សាតុមូលស្ដីពីការការពារស្នាដៃច្នៃប្រឌិតនៅកម្ពុជា ថ្ងៃទី២៦មីនាម៉ោង១០ដល់១១កន្លះ ចូលរួមដោយសេរីនៅវិទ្យាស្ថានបច្ចេកវិទ្យាកម្ពុជាអគារ Campus Numeriqueថ្មី។ ការបង្ហាញពីផ្សារផលិតផលបារាំង ថ្ងៃទី២៧មីនាម៉ោង៦កន្លះ ចូលរួម១៥ដុល្លារ ទីកន្លែងក្លឹប Dib។ ការសម្ពោធពិព័រណ៍ Lola Reboud និងស្ទូឌីយោរូបភាព ថ្ងៃទី២៩មីនាម៉ោង៦កន្លះ ចូលរួមដោយសេរី នៅវិទ្យាស្ថានបារាំងនៅកម្ពុជា និងទិវាស្រាវជ្រាវបារាំងកម្ពុជា ថ្ងៃទី២៩និង៣០មីនា នៅវិទ្យាស្ថានបច្ចេកវិទ្យាកម្ពុជា ចូលរួមដោយសេរី តែត្រូវចុះឈ្មោះមុន។

ព័ត៌មានលម្អិតសូមចូលទៅកាន់ហ្វេសប៊ុករបស់ស្ថានទូត (https://www.facebook.com/france.cambodge)