លោក ឯម រៀម ចាក់ផ្ដៅជារូបផ្លែឈើទាលរម្លឹកកុមារភាព និងចង់ឲ្យខ្មែរបង្កើនការប្រើប្រាស់ផ្ដៅ

ជាតិ

សិល្បះ

លោក ឯម រៀម ចាក់ផ្ដៅជារូបផ្លែឈើទាលរម្លឹកកុមារភាព និងចង់ឲ្យខ្មែរបង្កើនការប្រើប្រាស់ផ្ដៅ

25, Mar 2018 , 11:59 am

រូបភាព

ដោយ: ប៉ូ សាគុន

លោក ឯម រៀម ជាសិល្បករសហសម័យដែលមានទេពកោសល្យមួយរូប។ ថ្មីៗនេះ លោកបានយកផ្ដៅមកចាក់ជារូបផ្លែឈើទាល ដើម្បីរម្លឹកកុមារភាពរបស់ខ្លួន និងដើម្បីឱ្យពលរដ្ឋខ្មែរ ងាកមកប្រើប្រាស់ផលិតផលពីផ្តៅឡើងវិញ ក៏ដូចជាចង់ឲ្យអ្នកផលិតផ្តៅ បន្ថែមការច្នៃប្រឌិត ដើម្បីលក់បានតម្លៃថ្លៃ និងមានតម្លៃអប់រំផង។

លោក ឯម រៀម ធ្លាប់មានស្នាដៃផ្នែកចម្លាក់ គំនូរ និងស្នាដៃសហសម័យជាច្រើន ព្រមទាំងជាអ្នកច្នៃម៉ូដសម្លៀកបំពាក់ និងគ្រឿងអលង្ការផងដែរ។ ស្នាដៃរបស់លោក ត្រូវបានដាក់តាំងបង្ហាញ នៅក្នុងកម្មវិធីជាច្រើនទាំងក្នុង និងក្រៅប្រទេស។

អត្ថបទទាក់ទង

លោក ឯម រៀម ចោលឱកាសការងារនៅបារាំង មកតម្កើងសិល្បៈច្នៃម៉ូដនៅខ្មែរ

ថ្មីៗនេះ លោកបានចំណាយពេល៣ខែ បង្កើតស្នាដៃសហសម័យមួយទៀត គឺចាក់ផ្ដៅជារូបផ្លែឈើទាល។ ប៉ុន្តែអ្នកច្នៃម៉ូដរូបនេះថា ស្នាដៃថ្មីនេះ មិនដូចរូបផ្លែឈើទាលទាងស្រុង លោកគ្រាន់តែយកគំរូពីផ្លែឈើទាល ហើយបញ្ចូលជាបែបសហសម័យ។

លោក ឯម រៀម ចាក់ផ្ដៅជារូបផ្លែឈើទាលនេះ ដើម្បីរម្លឹកអនុស្សវរីយ៍កាលវ័យកុមាររបស់ខ្លួន និងផ្សព្វផ្សាយឲ្យប្រជាពលរដ្ឋខ្មែរងាកមកប្រើប្រាស់វត្ថុដែលធ្វើពីផ្ដៅឡើយវិញ ក៏ដូចជាដើម្បី លើកទឹកចិត្តដល់អ្នកធ្វើផ្ដៅជារបស់របរប្រើប្រាស់ផ្សេងៗ បង្កើនការច្នៃប្រឌិត ដើម្បីទទួលបានចំណូលច្រើនជាងមុន។ លោក ឯម រៀម បញ្ជាក់ថា៖«ខ្ញុំចង់បំផុសឱ្យប្រជាពលរដ្ឋខ្មែរ ងាកមកប្រើប្រាស់របស់របរ ដែលធ្វើពីផ្ដៅវិញ ព្រោះវាជាផលិតផលខ្មែរ ហើយចំណែកអ្នកធ្វើ ដែលធ្លាប់តែចាក់ផ្ដៅធ្វើកញ្ច្រែង ឬវត្ថុប្រើប្រាស់លក្ខណៈតូចៗ ខ្ញុំសូមលើកទឹកចិត្តឱ្យងាកមកចាក់ផ្ដៅតាមបែបសហសម័យរូបរាងធំៗ ដើម្បីអាចលក់ទៅក្រៅប្រទេស និងទទួលបានតម្លៃថ្លៃ»។

អ្នកច្នៃម៉ូឌដ៏មានទេពកោសល្យរូបនេះ ក៏បានរម្លឹកទៅដល់អ្នកទទួលផលពីវល្លិ៍ផ្ដៅថា មុននឹងកាប់ផ្ដៅយកទៅប្រើការ អ្នកកាប់គប្បីសិក្សាពីរបៀបកាប់ និងអាយុរបស់វល្លិ៍ផ្ដៅ ដើម្បីទាញផលពីវាបានជានិរន្តរ៍ផងដែរ។ «មុននឹងកាប់ផ្តៅយកមកប្រើប្រាស់ គួរតែសិក្សាពីរបៀបកាប់ និងអាយុកាលរបស់វា ព្រោះបើយើងចេះតែកាប់ទៅវានឹងងាប់ វាដូចជាឬស្សីអីចឹង វាមានកូនតូចៗខ្ចីៗកើតមកទៀត បើយើងមិនចេះកាប់វានឹងផុតពូជ»៕ នេះជាការបញ្ជាក់របស់បណ្ឌិត ឯម រៀម៕