កីឡាអន្តរជាតិ
អន្តរជាតិ
World Cup៖ ប៉េរូ បង្ហាញវត្តមានសារជាថ្មីក្រោយខកខានអស់រយៈពេល៣៦ឆ្នាំ
×
ក្រុមកីឡាបាល់ទាត់ជម្រើសជាតិប៉េរូបានកៅអីទៅរុស្ស៊ីនៃការប្រកួតពានរង្វាន់ FIFA World Cup ឆ្នាំ២០១៨ ស្ថិតនៅពូល C ដែលត្រូវជួបក្រុមជើងឯកឆ្នាំ១៩៩៨ បារាំង អូស្ត្រាលី និងដាណឺម៉ាក។ សម្រាប់ក្រុមមកពីអាមេរិកឡាទីនមួយនេះ ជាការការបង្ហាញវត្តមានលើកទី៥ បើគិតទាំងលើកនេះ និងជាការចូលរួមលើកដំបូងផងដែរបន្ទាប់ពីអាក់ខានជាង៣ទសវត្សរ៍មកហើយ ពោលគឺតាំងពីឆ្នាំ ១៩៨២មក។
អ្នកចាត់ការទូទៅ៖ លោក Ricardo Gareca (អាហ្សង់ទីន)
អតីតខ្សែប្រយុទ្ធក្រុមជម្រើសជាតិអាហ្សង់ទីន Gareca ត្រូវបានតែងតាំងជាអ្នកចាត់ការទូទៅជម្រើសជាតិប៉េរូនៅឆ្នាំ ២០១៥ ក្រោយធ្លាប់មានបទពិសោធន៍ដឹកនាំក្លិបជាច្រើននៅទូទាំងទ្វីបអាមេរិកខាងត្បូង។ អ្នកចាត់ការវ័យ៦០ឆ្នាំ ដែលមានរហស្សនាម El Tigre (The Tiger) បានបង្កើតប្រវត្តិសាស្ត្រសម្រាប់ប្រទេសប៉េរ៉ូ ក៏ដូចជាក្រុមជម្រើសជាតិ អាចឈានទៅកាន់ការប្រកួត World Cup ជាលើកដំបូងរបស់ពួកគេក្នុងរយៈពេល ៣៦ឆ្នាំ។
កីឡាករឆ្នើម៖ ខ្សែប្រយុទ្ធ Jefferson Farfan
ទោះបីជាខ្សែប្រយុទ្ធរូបនេះមានវ័យចំណាស់បន្តិចក៏ដោយ តែ Farfan បានក្លាយជាតួរអង្គសំខាន់ដែលអាចនាំប៉េរូបានកៅអីទៅរុស្ស៊ីឆ្នាំ២០១៨។ សមាជិកក្រុម Lokomotiv Moscow រូបនេះតែងតែរួមចំណែកក្នុងការរកគ្រាប់បាល់ក្នុងការប្រកួតសំខាន់ ជាពិសេសការឈ្នះប៉ារ៉ាហ្គាយក្នុងវគ្គជម្រុះតាមពូល និងជ័យជម្នះលើក្រុមនូវែលសេឡង់ក្នុងវគ្គ Play-off ដើម្បីឆ្ពោះទៅ World Cup ដែលជាកាលបង្ហាញខ្លួនលើកដំបូងរបស់ពួកគេ។
ប្រវត្តិក្នុង World Cup៖
នេះជាវត្តមានលើកទី ៥ សម្រាប់ក្រុមដែលបានកៅអីមកពីតំអាមេរិកឡាទីន ក្រោយចូលរួម៤លើករួចមកហើយក្នុងឆ្នាំ ១៩៣០, ១៩៧០, ១៩៧៨ និង ១៩៨២។ ការបង្ហាញខ្លួនល្អជាងគេគឺនៅឆ្នាំ ១៩៧០ និង១៩៧៨ ដែលអាចឈានដល់វគ្គ ១/៨ ផ្តាច់ព្រ័ត្រ។ ប៉េរូ ស្ថិតក្នុងចំណាត់ថ្នាក់ទី ១១ពិភពលោកក្នុងតារាង FIFA Ranking នាពេលបច្ចុប្បន្ននេះ។
កម្មវិធីប្រកួត៖
-១៦ មិថុនា៖ ប៉េរូ vs ដាណឺម៉ាក (ម៉ោង ១១យប់)
-២១ មិថុនា៖ បារាំង vs ប៉េរូ (ម៉ោង ១០យប់)
-២៦ មិថុនា៖ អូស្ត្រាលី vs ប៉េរូ (ម៉ោង ៩យប់)
2-team.jpg Tag:
បាល់ទាត់
FIFA World Cup
ប៉េរូ
GroupC
© រក្សាសិទ្ធិដោយ thmeythmey.com