ដេអិនប្តេជ្ញាបង្កើនការហ្វឹកហាត់ ត្រៀមប្រជែងជើងឯកសីដក់ថ្នាក់ជាតិ

កីឡាជាតិ

ជាតិ

ដេអិនប្តេជ្ញាបង្កើនការហ្វឹកហាត់ ត្រៀមប្រជែងជើងឯកសីដក់ថ្នាក់ជាតិ

01, Apr 2018 , 9:19 pm

រូបភាព

ក្រុមសីដក់ដេអិន(អាវផ្កាខ្មៅលាយផ្កាឈូក)ប្រកួតជាមួយក្រុមក្រសួងការពារជាតិក្នុងវគ្គផ្តាច់ព្រ័ត្រ, រូបភាពទាំងអស់ពីហ្វេសប៊ុកអគ្គនាយកដ្ឋានកីឡា

ដោយ:

ក្រុមសីដក់ដេអិនបានគ្រងជើងឯកពានរង្វាន់សម្ព័ន្ធសីដក់ប្រចាំឆ្នាំ២០១៨ ក្រោយយកឈ្នះក្រុមសីដក់ក្រសួងការពារជាតិ ៣-១ នាការប្រកួតវគ្គផ្តាច់ព្រ័ត្រកាលពីថ្ងៃអាទិត្យសប្តាហ៍មុន។ លោក ស្រូយ សុវណ្ណរ៉ា ប្រធានក្លិបសីដក់ដេអិនបានប្តេជ្ញាថា ខ្លួននឹងខិតខំហ្វឹកហាត់អភិវឌ្ឍន៍សមត្ថភាព ដើម្បីត្រៀមប្រជែងជើងឯកថ្នាក់ជាតិប្រចាំឆ្នាំ២០១៨ នាពេលខាងមុខនេះ។

ក្លិបសីដក់ដេអិន ដែលប្រើសួនច្បារក្តាន់ពីរតាមបណ្តោយផ្លូវសហព័ន្ធរុស្ស៊ីជាកន្លែងហ្វឹកហាត់បានប្តេជ្ញាថា ខ្លួននឹងបង្កើនការហ្វឹកហាត់ទ្វេដងដើម្បីអភិវឌ្ឍន៍សមត្ថភាព សម្រាប់ត្រៀមប្រជែងដណ្តើមជើងឯកថ្នាក់ជាតិប្រចាំឆ្នាំ២០១៨ នាអំឡុងខែកក្កដា ខាងមុខ។ ការប្តេជ្ញានេះ បន្ទាប់ពីដេអិនគ្រងជើងឯកពានរង្វាន់សម្ព័ន្ធសីដក់លើកទី១ ក្រោយយកឈ្នះក្រុមក្រសួងការពារជាតិ ៣-១នាការប្រកួតវគ្គផ្តាច់ព្រ័ត្រកាលពីថ្ងៃអាទិត្យ ទី២៥ មីនា សប្តាហ៍មុន។

ក្នុងបទសម្ភាសជាមួយអ្នកសារព័ត៌មាន លោក ស្រូយ សុវណ្ណរ៉ា ប្រធានក្លិបសីដក់ដេអិនដែលមានកីឡាករភាគច្រើនជាមន្ត្រីរាជការ និងបុគ្គលិកក្រុមហ៊ុនឯកជនបានរៀបរាប់យ៉ាងដូច្នេះថា៖«ក្រុមសីដក់ដេអិន ត្រូវបានប្រមូលផ្តុំដោយមហាជន មន្ត្រីរាជការ កងកម្លាំងប្រដាប់អាវុធ និងបុគ្គលិក។ ពួកយើងតែងតែប្រមូលផ្តុំគ្នាហ្វឹកហាត់នៅម្តុំក្តាន់ពីរចន្លោះពី១ទៅ២ម៉ោងក្នុង១ថ្ងៃ។ ប៉ុន្តែចាប់ពីពេលនេះ យើងនឹងឆ្លៀតពេលមកហ្វឹកហាត់ជុំគ្នាឲ្យបានច្រើនជាងនេះ ដើម្បីពង្រឹងគុណភាពលេងឲ្យបានកាន់តែល្អ»។

បច្ចុប្បន្នក្រៅពីកីឡាករឈុតធំ ក្លិបសីដក់ដេអិនមានយុវជនចំនួន១០រូបដែលកំពុងហ្វឹកហាត់ជាប្រចាំជាមួយខ្លួន។ ហើយក្លិបនេះក៏មានគម្រោងផ្សព្វផ្សាយ ដើម្បីបំផុសបំផុលដល់យុវជនឲ្យមកចូលរួមវិស័យកីឡានេះឲ្យកាន់តែច្រើនផងដែរ។

ការប្រកួតសីដក់ជ្រើសរើសជើងឯកពានរង្វាន់សម្ព័ន្ធសីដក់លើកទី១មានក្លិប-សមាគមចូលរួមចំនួន៩រួមមានក្រសួងការពារជាតិ, ព្រះខ័នរាជ, គ្លីនិកហំសីហៈ, យុវខេមរា, បានលុង, ដេអិន, ទន្លេបាសាក់, មេគង្គកីឡា, និងក្លិបកីឡាសីដក់អូឡាំពិក។ ក្រោយឆ្លងកាត់ការប្រកួតជាង៣សប្តាហ៍ចាប់ពីថ្ងៃទី៣-២៥ មីនា ក្លិបសីដក់ដេអិនទទួលបានចំណាត់ថ្នាក់លេខ១ រីឯលេខ២បានទៅក្រសួងការពារជាតិ ខណៈលេខ៣បានទៅក្លិបហំសីហៈ និងលេខ៤បានទៅក្លិបសីដក់ព្រះខ័នរាជ។

ជាមួយគ្នានេះ លោក មាស សារិន ប្រធានសហព័ន្ធកីឡាសីដក់ និងឈិនឡូនកម្ពុជាជំរុញឲ្យក្លិបដែលទទួលបានចំណាត់ថ្នាក់បង្កើនការហ្វឹកហាត់ ហើយក្លិបមិនទទួលបានចំណាត់ថ្នាក់ប្រឹងប្រែងអភិវឌ្ឍន៍សមត្ថភាពបន្ថែម ដើម្បីត្រៀមប្រជែងជើងឯកលើកក្រោយៗទៀត។

លោកបានបន្ថែមថា៖«នៅឆ្នាំ២០១៩ យើងអាចបង្កើតឲ្យមានព្រឹត្តិការណ៍លើឆ្នេរខ្សាច់ ព្រោះយុទ្ធសាស្ត្រទៅស៊ីហ្គេមឆ្នាំ២០២៣ យើងត្រូវមានការប្រកួតច្រើនជាងនេះ ដើម្បីផ្តល់ឱកាសឲ្យអត្តពលិកយើងមានការប្រកួតកាន់តែច្រើន ដើម្បីឈានទៅសម្រេចទិសដៅរបស់យើង គឺយើងត្រូវឈ្នះមេដាយមាស ឬប្រាក់ នៅស៊ីហ្គេមឆ្នាំ២០២៣»៕