បេក្ខជនជាង១០រូប ដាក់ពាក្យសុំធ្វើជាសមាជិកព្រឹទ្ធសភា នីតិកាល៤

ជាតិ

បេក្ខជនជាង១០រូប ដាក់ពាក្យសុំធ្វើជាសមាជិកព្រឹទ្ធសភា នីតិកាល៤

02, Apr 2018 , 7:59 pm

រូបភាព

លោក ឡេង ប៉េងឡុង អគ្គលេខាធិការនិងជាអ្នកនាំពាក្យរដ្ឋសភា។ រូបភាពពីរដ្ឋសភា

ដោយ: ថ្មីៗ

បេក្ខជនជាង១០រូប បានដាក់ពាក្យទៅកាន់រដ្ឋសភា ដើម្បីធ្វើជាសមាជិកព្រឹទ្ធសភា ក្នុងនីតិកាលទី៤នេះ។ នេះបើតាមលោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា។

លោក ឡេង ប៉េងឡុង ប្រាប់សារព័ត៌មានថ្មីៗតាមទូរសព្ទថា គណៈកម្មាធិការអចិន្ត្រៃយ៍រដ្ឋសភា នឹងបើកិច្ចប្រជុំ នៅថ្ងៃទី៣ ខែមេសា ឆ្នាំ២០១៨ ដើម្បីជ្រើសរើសបក្ខជន២រូប ក្នុងចំណោមបេក្ខជនទាំងអស់នោះ។ លោក បន្តថា បន្ទាប់ពីជ្រើសរើសបានហើយ រដ្ឋសភា នឹងបើកកិច្ចប្រជុំនាពេលខាងមុខ ដើម្បីបោះឆ្នោតផ្តល់សេចក្តីទុកចិត្តដល់បេក្ខជនទាំង២រូប ឲ្យធ្វើជាសមាជិកព្រឹទ្ធសភាជាផ្លូវការ។

សមាជិកព្រឹទ្ធសភាក្នុងនីតិកាលទី៤នេះ មាន៦២រូប ដែលកាលពីនីតិកាលមុន មានតែ៦១រូប។ ក្នុងចំណោមសមាជិកព្រឹទ្ធសភាទាំង៦២រូប ៥៨រូប កើតចេញពីការបោះឆ្នោតអសកល ២រូប ត្រូវបានតែងតាំងដោយព្រះមហាក្សត្រ និង២រូបទៀត ត្រូវបានជ្រើសតាំងដោយរដ្ឋសភា។

សមាជិកព្រឹទ្ធសភាទាំង៥៨ ដែលកើតចេញពីការបោះឆ្នោតអសកល កាលពីថ្ងៃទី២៥ ខែកុម្ភៈ ឆ្នាំ២0១៨ កន្លងទៅ សុទ្ធតែមកពីគណបក្សប្រជាជនកម្ពុជាទាំងទាំងអស់។ ចំណែកឯ គណបក្សដទៃ មិនបានទទួលអាសនៈក្នុងព្រឹទ្ធសភា សម្រាប់នីតិកាលទី៤នេះឡើយ៕