ជាតិ
លោក ឡាយ វណ្ណៈ កំពុងស្ថិតក្នុងតុលាការ ដើម្បីបំភ្លឺពីមរណភាពរបស់លោកស្រី ចេវ សុវឌ្ឍនា រូបភាព៖ សមត្ថកិច្ច ឈរការពារនៅខាងក្រៅ បន្ទាប់ពីបញ្ចូនលោក ឡាយ វណ្ណៈ ចូលទៅខាងក្នុងតុលាការរាជធានីភ្នំពេញ
× លោក ឡាយ វណ្ណៈ អភីតបាលខេត្តតាកែវ ត្រូវបានសមត្ថកិច្ចនៃក្រសួងមហាផ្ទៃ បញ្ជូនទៅដល់អយ្យការអមសាលាដំបូងរាជធានីភ្នំពេញហើយ នៅរសៀលថ្ងៃទី២ ខែមេសា ឆ្នាំ២0១៨នេះ ដើម្បីបំភ្លឺនៅចំពោះមុខព្រះរាជអាជ្ញា។ តុលាការ សង្ស័យថា លោក ឡាយ វណ្ណៈ ជាប់ពាក់ព័ន្ធនឹងមរណភាពរបស់លោកស្រី ចេវ សុវឌ្ឍនា ដែលជាស្រីកំណាន់របស់លោក។
លោកព្រះរាជអាជ្ញារង សៀង សុខ ជាអ្នកចេញដីកាបង្គាប់ឲ្យឃាត់ខ្លួនលោក ឡាយ វណ្ណៈ។ សមត្ថកិច្ច បានឃាត់ខ្លួនលោក ឡាយ វណ្ណៈ កាលពីថ្ងៃ១ ខែមេសា ហើយក៏បញ្ជូនទៅកាន់នាយកដ្ឋានព្រហ្មទណ្ឌនៃក្រសួងមហាផ្ទៃ។ ការឃាត់ខ្លួនលោក ឡាយ វណ្ណៈ គឺធ្វើឡើងបន្ទាប់ពីលោក ឡាយ ណារិទ្ធ ស្នងការរងខេត្តតាកែវ ដែលជាបងប្រុសបង្កើតរបស់លោក រួមទាំងអ្នកពាក់ព័ន្ធចំនួនទៀត ត្រូវបានឃាត់ខ្លួន ហើយត្រូវបានព្រះរាជអាជ្ញា សួរចម្លើយរួចមក ជុំវិញសំណុំរឿងនេះ។
គួររម្លឹកថា លោកស្រី ចែវ សុវឌ្ឍនា មានវ័យ៣៦ឆ្នាំ ត្រូវបានគេប្រទះឃើញស្លាប់ ដោយស្ថានភាពចងក នៅក្នុងផ្ទះ ដែលស្ថិតក្រុងដូនកែវ ខេត្តតាកែវ កាលពីចុងខែមករា ឆ្នាំ២០១៨។ ប៉ុន្តែសមត្ថកិច្ច សង្ស័យថា មរណភាពរបស់ស្ត្រីខាងលើ មិនមែនដោយសារការធ្វើអត្តឃាតនោះទេ តែទំនងជាអំពើឃាតកម្ម៕
Tag:
ចែវ សុវឌ្ឍនា
ឡាយ វណ្ណៈ
© រក្សាសិទ្ធិដោយ thmeythmey.com