គ្រូបង្វឹកបឹងកេតថា ឃួន ឡាបូរ៉ាវី អាចមានអនាគតល្អ បើបានលេងនៅលីគកំពូលថៃ

កីឡាជាតិ

ជាតិ

គ្រូបង្វឹកបឹងកេតថា ឃួន ឡាបូរ៉ាវី អាចមានអនាគតល្អ បើបានលេងនៅលីគកំពូលថៃ

02, Apr 2018 , 4:47 pm

រូបភាព

ដោយ:

ខ្សែប្រយុទ្ធជើងចាស់ ឃួន ឡាបូរ៉ាវី បានចាកចេញពីកម្ពុជា ទៅធ្វើតេស្តសមត្ថភាពជាមួយក្លិបក្របខណ្ឌលីគកំពូលមួយរបស់ថៃ កាលពីព្រឹកថ្ងៃទី២ ខែមេសា ឆ្នាំ២០១៨។ ជាមួយគ្នានេះ លោក ហៅ សុជាតិ គ្រូបង្វឹកក្រុមបឹងកេតបានចាត់ទុកការទៅធ្វើតេស្តរបស់ ឡាបូរ៉ាវី នេះថា ជាឱកាសដ៏ល្អ ដើម្បីឲ្យរូបគេដឹងពីកម្រិតសមត្ថភាព។ លើសពីនេះ លោកបានលើកឡើងថា ឡាបូរ៉ាវី នឹងមានអនាគតកាន់តែល្អប្រសើរ បើមានឱកាសលេងឲ្យក្លិបក្របខណ្ឌលីគកំពូលថៃ ដែលមានកម្រិតប្រកួតប្រជែងខ្ពស់ជាងកម្ពុជា។

គ្រូបង្វឹកជួយឲ្យបឹងកេតលើកពានក្របខណ្ឌលីគកំពូលកម្ពុជាឆ្នាំ២០១៧ លោក ហៅ សុជាតិ បានអះអាងថា ឃួន ឡាបូរ៉ាវី នឹងមានអនាគតកាន់តែល្អប្រសើរទាំងកម្រិតបច្ចេកទេស និងជីវភាព បើមានឱកាសលេងឲ្យក្លិបក្របខណ្ឌលីគកំពូលរបស់ថៃ។ ការអះអាងបែបនេះ ដោយសារក្លិបនីមួយៗក្នុងក្របខណ្ឌលីគកំពូលថៃសុទ្ធតែមានសមត្ថភាពខ្ពស់ និងមានការប្រកួតប្រជែងខ្លាំង។

«បើសិន ឃួន ឡាបូរ៉ាវី ជាប់ក្នុងការធ្វើតេស្តនៅប្រទេសថៃ វាជាឱកាសមួយដ៏ល្អមែនទែនសម្រាប់គាត់ ព្រោះបរិយាកាសនៅថៃល្អជាងនៅកម្ពុជាទាំងសមត្ថភាព និងការប្រកួតប្រជែង។ ហើយក្លិបនីមួយៗក្នុងក្របខណ្ឌកំពូលរបស់គេសុទ្ធតែមានសមត្ថភាពខ្ពស់បើធៀបនឹងកម្ពុជា»។ នេះជាការលើកឡើងរបស់លោក ហៅ សុជាតិ ដែលបានបន្ថែមថា ទន្ទឹមនឹងមានផលល្អសម្រាប់ ឡាបូរ៉ាវី វាអាចមានផលប៉ះពាល់តិចតួចសម្រាប់ក្លិបបឹងកេត ដែលត្រូវការខ្សែប្រយុទ្ធកម្ពុជាក្នុងការប្រជែងជើងឯកពានរង្វាន់សម្តេច ហ៊ុន សែន និងក្របខណ្ឌលីគកំពូលកម្ពុជា។

ក្នុងបទសម្ភាសជាមួយសារព័ត៌មានថ្មីៗគ្រូបង្វឹករូបនេះបានបង្ហាញពីក្តីកង្វល់យ៉ាងដូច្នេះថា៖«ខ្ញុំគិតថា រឿងផលប៉ះពាល់វាត្រូវតែមាន ព្រោះបឹងកេតកំពុងខ្វះធនធានខ្សែប្រយុទ្ធជនជាតិខ្មែរក្នុងការប្រជែងពានរង្វាន់សម្តេច ហ៊ុន សែន។ តែទោះបីដឹងថា វាមានផលប៉ះពាល់ យើងត្រូវតែផ្តល់ឱកាសឲ្យកីឡាករ ព្រោះនៅថៃគាត់អាចមានឱកាសល្អជាងនៅកម្ពុជា»។

លោក ហៅ សុជាតិ គ្រូបង្វឹកក្រុមបឹងកេត

កាលពីព្រឹកថ្ងៃទី២ ខែមេសា ឆ្នាំ២០១៨ កីឡាករ ឃួន ឡាបូរ៉ាវី បានចាកចេញពីកម្ពុជាទៅធ្វើតេស្តសមត្ថភាពជាមួយក្លិបដែលពុំទាន់បង្ហាញឈ្មោះមួយក្នុងក្របខណ្ឌលីគកំពូលរបស់ថៃ។ បច្ចុប្បន្ន ឃួន ឡាបូរ៉ាវី កំពុងលេងឲ្យក្លិបបឹងកេតដែលជាសមាជិកក្របខណ្ឌលីគកំពូលកម្ពុជា។ រូបគេ ក៏ជាសមាជិកនៃក្រុមជម្រើសជាតិកម្ពុជាផងដែរ ហើយពីពេលថ្មីរូបគេសម្រេចបានពីរគ្រាប់សម្រាប់ក្រុមជម្រើសជាតិ ដោយ១គ្រាប់រកបានក្នុងជំនួបមិត្តភាពជាមួយឡាវ និង១គ្រាប់ក្នុងជំនួបជាមួយអាហ្វហ្គានីស្ថាន។

ក្រោយការចាកចេញរបស់ លោក ស៊ីវ ថា ក្លិបជើងឯកក្របខណ្ឌលីគកំពូលកម្ពុជាឆ្នាំ២០១៧ មួយនេះ ពុំទាន់រកបានប្រធានថ្មី ដើម្បីដឹកនាំក្លិបនៅឡើយទេ។ ហើយក្លិបនេះ ក៏ពុំទាន់មានទីលានផ្តាល់ខ្លួនផងដែរ ដោយបច្ចុប្បន្នយកពហុកីឡដ្ឋានជាតិធ្វើជាម្ចាស់ផ្ទះបណ្តោះអាសន្ន៕