អន្តរជាតិ
ស៊ូជី អំពាវនាវឲ្យប្រជាជនមីយ៉ាន់ម៉ារក្សាឯកភាពជាតិ និង គោរពបំណងសហគមន៍អន្តរជាតិ
× ទីប្រឹក្សារដ្ឋមីយ៉ាន់ម៉ាលោកស្រី អ៊ុងសាន ស៊ូជី ចុងសប្តាហ៍នេះបានអំពាវនាវឲ្យប្រជាជនមីយ៉ាន់ម៉ាបន្តរួបរួមសាមគ្គី និងឯកភាពគ្នា ស្របពេលដែលប្រទេសជាតិកំពុងប្រឈមបញ្ហាច្រើនជំពូកទាំងក្នុងស្រុក និងក្រៅស្រុក។ អ្វីដែលគួរឲ្យកត់សម្គាល់នោះលោកស្រីក៏ទទូចឲ្យប្រជាជនគោរពបំណងសហគមន៍អន្តរជាតិ។
ក្នុងខួបពីរឆ្នាំក្រោយពេលដែលគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រីឡើងកាន់អំណាច លោកស្រី អ៊ុងសាន ស៊ូជី បានថ្លែងសុន្ទរកថាទៅកាន់ប្រជាជាតិមីយ៉ាន់ម៉ានាថ្ងៃអាទិត្យទី ១ ខែមេសា ដោយអំពាវនាវឲ្យប្រជាជនមីយ៉ាន់ម៉ារក្សាការឯកភាពគ្នាឲ្យបានរឹងមាំ។
យោងតាមសារព័ត៌មាន Japan Times លោកស្រី ស៊ូជី បានរៀបរាប់ពីបញ្ហាប្រឈមដែលរដ្ឋាភិបាលលោកស្រីកំពុងជួបប្រទះ ដែលបញ្ហានោះមានទាំងក្នុងស្រុក និងក្រៅស្រុកផង។
ក្រៅស្រុកគឺសម្ពាធបរទេសពាក់ព័ន្ធជម្លោះនៅរដ្ឋ Rakhine ហើយក្នុងស្រុកវិញនោះ គេរិះគន់គោលនយោបាយកំណែទម្រង់របស់រដ្ឋាភិបាលលោកស្រីដែលមិនមានប្រសិទ្ធភាពអាចជំរុញកំណើនសេដ្ឋកិច្ចដែលយឺតយ៉ាវ បាននោះ។ ប៉ុន្តែលោកស្រី ស៊ូជី ជឿជាក់ថា បញ្ហាគ្រប់យ៉ាងមីយ៉ាន់ម៉ាអាចដោះស្រាយបានកាលណាបើមានឯកភាពជាតិនិងការរួបរួមគ្នានោះ។
លោកស្រីបានថ្លែងដូច្នេះ៖«ពិភពលោកផ្តោតសំខាន់លើបញ្ហានៅរដ្ឋ Rakhine ឥឡូវនេះ។ ប៉ុន្តែយើងក៏ត្រូវការការអភិវឌ្ឍប្រកបដោយសន្តិភាពក្នុងប្រទេសយើងដែរ។ យើងកំពុងប្រឈមបញ្ហាទាំងក្នុងនិងក្រៅប្រទេស។ ហើយយើងកំពុងប្រឹងប្រែងអភិវឌ្ឍនយោបាយ សង្គម និងសេដ្ឋកិច្ចដូចគ្នា»។
លោកស្រី ស៊ូជីក៏បានអំពាវនាវឲ្យប្រជាជនមីយ៉ាន់ម៉ាគោរពបំណង និងទស្សនវិស័យរបស់សហគមន៍អន្តរជាតិផងដែរ ប៉ុន្តែលោកស្រីមិនបានបញ្ជាក់ថា លោកស្រីចង់សំដៅលើអ្វីឡើយ។ ក្រៅពីនេះលោកស្រីក៏ឆ្លៀតលើកឡើងពីគោលដៅអាទិភាពក្នុងការបញ្ចប់ជម្លោះប្រដាប់អាវុធរវាងយោធា និងក្រុមឧទ្ទាមភាគតិចដែលកើតឡើងចាប់ពីប្រទេសនេះប្រកាសឯករាជ្យពីអង់គ្លេសឆ្នាំ ១៩៤៨ មកនោះ។
តាមពិតទៅ រដ្ឋាភិបាលស៊ីវិលរបស់លោកស្រី ស៊ូជី បានរងសម្ពាធខ្លាំងពីសហគមន៍អន្តរជាតិដោយសារការប្រើប្រាស់សកម្មភាពយោធាដើម្បីប្រឆាំងប្រជាជនរ៉ហ៊ីងយ៉ា និងធ្វើឲ្យប្រជាជននេះជិត ប្រាំពីរសែននាក់ត្រូវរត់ភៀសខ្លួនទៅបង់ក្លាដែសដើម្បីគេពីការធ្វើទុក្ខបុកម្នេញ។ ខាងស្ថាប័នសិទ្ធិមនុស្ស រដ្ឋបាលអាមេរិក និងអង្គការសហប្រជាតិបានចាត់ទុកប្រតិបត្តិការយោធាប្រឆាំងជនជាតិរ៉ូហ៊ីងយ៉ា ជាការបោសសម្អាតជនជាតិភាគតិច ហើយវាអាចស្ថិតក្នុងបទឧក្រិដ្ឋប្រឆាំងមនុស្សជាតិផង។
ត្រឡប់មកវិញ ថ្វីបើរដ្ឋាភិបាលស៊ីវិលដឹកនាំដោយលោកស្រី ស៊ូជី មែន ប៉ុន្តែរដ្ឋាភិបាលនេះមិនមានអំណាចលើយោធាដែលកំពុងធ្វើទុក្ខបុកម្នេញជនជាតិភាគតិចរ៉ូហ៊ីងយ៉ាឡើយ។ ដូច្នេះហើយ ការបន្តថ្កោលទោសឬ ដាក់សម្ពាធពីសំណាក់សហគមន៍អន្តរជាតិលើលោកស្រី ស៊ូជី និងរដ្ឋាភិបាលស៊ីវិល ក៏មិនមានឥទ្ធិពលលើការបញ្ចប់ជម្លោះជាតិសាសន៍នេះដែរ វាលែងតែមានការដាក់សម្ពាធលើក្រុមយោធាកាន់តែខ្លាំង៕
Tag:
អ៊ុងសាន ស៊ូជី
មីយ៉ាន់ម៉ា
Rakhine
© រក្សាសិទ្ធិដោយ thmeythmey.com