សង្ក្រាន្តឆ្នាំច មកដល់នៅវេលាម៉ោង៩ និង១២នាទី ព្រឹកថ្ងៃសៅរ៍នេះ

ជាតិ

សង្រ្កាន្តឆ្នាំថ្មី

សង្ក្រាន្តឆ្នាំច មកដល់នៅវេលាម៉ោង៩ និង១២នាទី ព្រឹកថ្ងៃសៅរ៍នេះ

14, Apr 2018 , 5:30 am

រូបភាព

ដោយ: ថ្មីៗ

មហាសង្ក្រាន្តឆ្នាំច សំរឹទ្ធិស័ក ពុទ្ធសករាជ២៥៦២ នឹងចូលមកដល់វេលាម៉ោង៩ និង១២នាទីព្រឹកថ្ងៃសៅរ៍ ១៤រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០១៨ ។ នេះបើតាមសៀវភៅមហាសង្ក្រាន្ត ដែលចងក្រងដោយលោក អ៊ឹម បូរិន្ទ នាយកនៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ។

ទេពធីតាមហាសង្ក្រាន្តប្រចាំឆ្នាំ ដែលនឹងយាងចុះមកបន្តវេនរក្សាមនុស្សលោកនេះ គឺព្រះនាង «មហោធរៈទេវី» បុត្រទី៧របស់កបិលមហាព្រហ្ម។ គ្រឿងទ្រង់ និងគ្រឿងប្រើរបស់ព្រះនាងរួមមាន អម្ពរពណ៌ខៀវ សៀតផ្កាត្រកៀត ព្រះហស្តស្តាំទ្រង់ចក្រ ព្រះហស្តឆ្វេង ទ្រង់ត្រីសូល៍។

ចំពោះភក្សាហារ ព្រះនាងសោយសាច់ទ្រាយ ដែលជាសត្វព្រៃពពួកឈ្លូស រីឯពាហណៈ ជាយានវិញ គឺមយូរា (ស្តេចក្ងោក) ដែលមនុស្សលោកប្រៀបធៀបទៅនឹងយន្តហោះ សម្រាប់ធ្វើដំណើរឆ្លងពីប្រទេសមួយទៅប្រទេសមួយ។

កម្មវិធីចូលឆ្នាំទាំង៣ថ្ងៃ៖

១. ថ្ងៃទី១ គឺថ្ងៃវារៈមហាសង្ក្រាន្ត ថ្ងៃសៅរ៍ ១៤ រោច ខែចេត្រ ត្រូវនឹងថ្ងៃ ១៤ ខែមេសា គ.ស ២០១៨ វេលាម៉ោង ៩ និង ១២ នាទីព្រឹក ជាថ្ងៃចូលឆ្នាំចរ សំរឹទ្ធស័ក។

២. ថ្ងៃទី ២ វារៈវ័នបត ថ្ងៃអាទិត្យ ១ កើត ខែពិសាខ ត្រូវនឹងថ្ងៃទី ១៤ ខែមេសា គ.ស ២០១៨ ។

៣. ថ្ងៃទី វារៈឡើងស័ក ថ្ងៃច័ន្ទ ២ កើត ខែពិសាខ ត្រូវនឹងថ្ងៃទី ១៦ ខែមេសា គ.ស ២០១៨ វេលាម៉ោង ១២ និង ៥៩ នាទី និង២៤ វិនាទី គម្រប់ជាសង្ក្រាន ៣ ថ្ងៃ៕