អន្តរជាតិ
ការអភិវឌ្ឍលឿន និងមានកំណើនទេសចរខ្ពស់ អ្នកវិនិយោគវៀតណាមសំរុកទិញដីនៅកោះត្រល់ រូបភាព Vietair.TV
× អ្នកវិនិយោគធំៗរបស់វៀតណាម កំពុងតែនាំគ្នាសំរុកទៅទិញដីនៅលើកោះត្រល់ (Phú Quốc) ដែលជាតំបន់ទេសចរណ៍ស្នូលរបស់វៀតណាម ។ លំហូរអ្នកមានរបស់វៀតណាមទៅកាន់ទីនោះ ដោយពួកគេ រំពឹងថា នឹងទទួលបានផលចំណេញច្រើនលើការវិនិយោគនៅទីនោះ ដ្បិត រដ្ឋាភិបាលវៀតណាម ក៏គ្រោងដាក់កោះត្រល់ ជាតំបន់សេដ្ឋកិច្ច-រដ្ឋបាលរបស់ខ្លួនផងនោះ ។
តាមការចុះផ្សាយរបស់សារព័ត៌មានវៀតណាម Vietnam News នៅថ្ងៃ១៣ មេសា ការឡើងថ្លៃ និងការទិញ-លក់ដីនៅលើកោះត្រល់ កំពុងតែក្លាយជាប្រធានបទមួយដ៏ពេញនិយមសម្រាប់បរិការណ៍អចលវត្ថុវៀតណាម ។ ការឡើងថ្លៃនេះ ផ្តើមឡើងក្រោយពីមានអ្នកវិនិយោគវៀតណាមភាគច្រើនមកពីរដ្ឋធានីហាណូយ និងហូជីមិញចាប់ផ្តើមសំរុកទិញដីនៅទីនោះក្នុងតម្លៃខ្ពស់ស្ទើរតែមិនជឿ ។
បើតាមប្រភពព័ត៌មានដដែលនោះ ភ្នាក់ងារអចលនវត្ថុវៀតណាមមួយរូប បានអះអាងថា តម្លៃដីនៅតំបន់សំខាន់នៃកោះត្រល់ បានកើនឡើងខ្ពស់ខ្លាំង ដោយក្នុងនោះ គ្រាន់តែទំហំដី មួយពាន់ម៉ែត្រការ៉េប៉ុណ្ណោះ មានតម្លៃរហូតដល់ ៤,៣៨ លានដុល្លារប៉ុណ្ណោះ ។
ចលនានេះ បានធ្វើឲ្យមានការទិញ-លក់ដីយ៉ាងសកម្មក្នុងមួយថ្ងៃទៅមួយថ្ងៃ ។ តាម Vietnam News ពេលខ្លះ ដីតែមួយកន្លែងទេ ក៏ប៉ុន្តែមានការផ្លាស់ប្តូរម្ចាស់គ្នាជាច្រើននាក់ត្រឹមតែក្នុងមួយថ្ងៃប៉ុណ្ណោះ ដ្បិតពួកគេ បានទិញ-លក់ពីមួយទៅមួយ ដោយឥតឈប់ឈរ ។
យ៉ាងណា ការផុសផុលនេះ ក៏បានបង្កឲ្យមានភាពមិនប្រក្រតីតាមរូបភាពជម្លោះ និងការក្លែងបន្លំឯកសារដើម្បីលក់ដីខុសច្បាប់មួយចំនួនផងដែរ ។ តាមការអះអាងរបស់គណៈកម្មាធិការកោះត្រល់លោក មក Đinh Khoa Toàn មានបណ្តឹងជាងពីររយហើយ បានប្តឹងមកលោកពាក់ព័ន្ធនឹងជម្លោះដីធ្លី ។
សូមជម្រាបផងដែរថា កោះត្រល់ ត្រូវបានវៀតណាមចាត់ទុកថាជាកោះគជ់របស់ខ្លួន ។ តាមរយៈកោះនេះ វៀតណាមអាចរកចំណូលក្នុងវិស័យទេសចរណ៍ជាច្រើនលានដុល្លារក្នុងរយៈពេលប៉ុន្មានឆ្នាំក្រោយនេះ ។ គ្រាន់តែឆ្នាំ២០១៧ កោះ ដែលស្ថិតក្នុងគោលដៅអាទិភាពសម្រាប់ការអភិវឌ្ឍរបស់រដ្ឋាភិបាលវៀតណាមមួយនេះ បានទាក់ទាញភ្ញៀវទេសចររហូតដល់ ១,៩៦ លាន ឯណោះ ៕
© រក្សាសិទ្ធិដោយ thmeythmey.com