អន្តរជាតិ
គុយបា៖ ស្អែកជាថ្ងៃបញ្ចប់នៃសករាជនយោបាយ «កាស្ត្រូ» រូបភាព៖ AFP
× ថ្ងៃព្រហស្បតិ៍ទី ១៩ ខែមេសា លោក រ៉ាអ៊ូល កាស្ត្រូ នឹងចុះចេញពីតំណែងជាប្រធានាធិបតីគុយបា ដោយប្រជាជនភាគច្រើនរំពឹងថា វានឹងមានការផ្លាស់ប្តូរគួរឲ្យកត់សម្គាល់ក្នុងសង្គមគុយបាជាពិសេសកំណែទម្រង់នយោបាយ និងសេដ្ឋកិច្ច។ យ៉ាងណាមិញ លោក រ៉ាអ៊ូលនឹងនៅរក្សាតំណែងជាប្រធានគណបក្សកុម្មុយនីស្តដ៏មានឥទ្ធិពលនៅក្នុងរដ្ឋការីប៊ីននេះក្រោយចេញពីតំណែង។
សករាជនយោបាយថ្មីគ្មានអ្នកនយោបាយត្រកូលកាស្ត្រូនឹងចាប់ផ្តើមឡើងនៅទឹកគុយបា នៅថ្ងៃព្រហស្បតិ៍ទី ១៩ ខែមេសា នៅពេលដែលប្រធានាធិបតីគុយបាលោក រ៉ាអ៊ូល កាស្ត្រូ លាលែងពីតំណែងជាប្រមុខរដ្ឋគុយបានេះ។
យោងតាមសារព័ត៌មាន AFP លោក រ៉ាអ៊ូល កាស្ត្រូ បានថ្លែងកាលខែមុនពេលលោកផ្តល់សុន្ទរកថាចុងក្រោយទៅកាន់ប្រជាជាតិដូច្នេះ៖«យើងបានដើរលើផ្លូវដ៏វែងឆ្ងាយ កូនចៅរបស់យើងក៏ដូច្នេះដែរ។ ក្មេងៗនៅពេលបច្ចុប្បន្ន និងនៅអនាគតនឹងរីករាយ»។
លោក រ៉ាអ៊ូល បានឡើងកាន់តំណែង កាលពីឆ្នាំ ២០០៦ ដោយជំនួសបងប្រុសលោក ហ្វីដែល កាស្ត្រូដែលគេស្គាល់ថាជាជនបដិវត្តន៍ដ៏ល្បីល្បាញដែលដណ្តើមអំណាចកាលពីឆ្នាំ ១៩៥៩ ។
កាលពីខែមុន គុយបាបានបោះឆ្នោតជ្រើសរើសសមាជិកសភាថ្មីដែលមានសមាជិកសរុប ៦០៥នាក់។ ហើយនៅថ្ងៃព្រហស្បតិ៍ស្អែកនេះ ខណៈដែលលោក រ៉ាអ៊ូល កាស្ត្រូចុះចេញពីតំណែង សភាគុយបាក៏ត្រូវ ជ្រើសរើសប្រធានក្រុមប្រឹក្សារដ្ឋផងដែរដើម្បីជំនួសតំណែងលោកផងដែរ។ គេរំពឹងថា លោក Miguel Díaz-Canel វ័យ ៥៧ឆ្នាំ ដែលបច្ចុប្បន្នជាអនុប្រធានាធិបតី និងជាដៃស្តាំរបស់លោក រ៉ាអ៊ូលតាំងពីឆ្នាំ ២០០៣ មកនោះនឹងក្លាយជាប្រធានាធិបតីថ្មី។
ការផ្លាស់ប្តូរមេដឹកនាំនៅគុយបានេះផ្តល់ក្តីសង្ឃឹមច្រើនដល់ប្រជាជនគុយបាគ្រប់ស្រទាប់វណ្ណៈជាពិសេសអ្នកដែលមានក្តីស្រមៃចង់បានការផ្លាស់ប្តូរសេដ្ឋកិច្ច និងនយោបាយនៅក្នុងប្រទេសនោះ។ គេរំពឹងថា មេដឹកនាំថ្មីអាចនឹងមានលទ្ធភាពជំរុញការកែទម្រង់ប្រព័ន្ធដឹកនាំសង្គមនិយមដែលស្ថិតក្រោមបក្សតែមួយនេះទៅរបបដឹកនាំពហុបក្ស ហើយនិងមានការកែទម្រង់សេដ្ឋកិច្ចដើម្បីជំរុញការអភិវឌ្ឍប្រទេសជាតិផង។
យ៉ាងណាក៏ដោយ បើទោះបីជាលោក រ៉ាអ៊ូល ចុះចេញពីតំណែងជាប្រមុខរដ្ឋក៏ដោយ លោកនឹងនៅបន្តតំណែងជាប្រធានបក្សកុម្មុនីស្តដ៏មានឥទ្ធិពលដដែលរហូតដល់ឆ្នាំ ២០២១ឯណោះនៅពេលដែលលោកមានអាយុ ៩០ឆ្នាំ។ តិចឬច្រើនលោកនៅតែមានលទ្ធភាពរក្សាឥទ្ធិពលនៅក្នុងការដឹកនាំជាពិសេសការផ្លាស់ប្តូរនយោបាយ និងការអនុវត្តគោលនយោបាយនៅក្នុងប្រទេសផងដែរ៕
Tag:
រ៉ាអ៊ូល កាស្ត្រូ
គុយបា
© រក្សាសិទ្ធិដោយ thmeythmey.com