អន្តរជាតិ
អារ៉ាប៊ីសាអូឌីតពិភាក្សាជាមួយអាមេរិកដើម្បបញ្ជូនកងទ័ពទៅរក្សាស្ថិរភាពនៅស៊ីរី
× រដ្ឋាភិបាលអារ៉ាប៊ីសាអូឌីតលើកឡើងថា ខ្លួនកំពុងស្ថិតក្នុងការពិភាក្សាជាមួយអាមេរិកដើម្បីឈានទៅបញ្ជូនកងទ័ពអារ៉ាប៊ីសាអូឌីតទៅជួយរក្សាស្ថិរភាពនៅស៊ីរី។ ការបង្ហើបពីគម្រោងពង្រាយទ័ពទៅស៊ីរីនេះ កើតឡើងស្របពេលដែលរដ្ឋបាលអាមេរិកមានចេតនាចង់ដកកងទ័ពអាមេរិកពីស៊ីរី និងចង់ឲ្យប្រទេសក្នុងតំបន់ចែករម្លែកបន្ទុកហិរញ្ញវត្ថុនិងយោធាក្នុងបញ្ហាជម្លោះស៊ីរីផងដែរ។
រដ្ឋមន្ត្រីការបរទេសអារ៉ាប៊ីសាអូឌីត Adel al-Jubeir បានអះអាងថា ក្រុងរីយ៉ាដ និងវ៉ាស៊ីនតោនកំពុងពិភាក្សាគ្នាជុំវិញការពង្រាយកងទ័ពទៅកាន់ស៊ីរី ស្របពេលដែលលោក ដូណាល់ ត្រាំ ព្យាយាមស្វែងរកវិធីសាស្ត្រដើម្បីរក្សាស្ថិរភាពនៅទឹកដីស៊ីរី។ ក្រោមគម្រោងរក្សាស្ថិរភាពស៊ីរី ដែលអនុវត្តនៅតំបន់ដែលត្រូវបានរំដោះពីក្រុមសកម្មប្រយោជន៍ វានឹងមានការបោសសម្អាតមីន និងកសាងឡើងវិញនូវហេដ្ឋរចនាសម្ព័ន្ធនៅស៊ីរីផងដែរ។
យោងតាមសារព័ត៌មាន Washington Post លោក Jubeir បានថ្លែងដូច្នេះ៖ «យើងស្ថិតក្នុងការពិភាក្សាគ្នាជាមួយអាមេរិក និងតាំងពីពេលដែលសង្គ្រាមស៊ីរីផ្ទុះឡើង យើងបានបង្ហាញបំណងបញ្ជូនទ័ពទៅស៊ីរី»។
បើតាមសម្តីរបស់ប្រមុខការទូតអារ៉ាប៊ីសាអូឌីតនេះ ក្នុងរដ្ឋបាលលោក បារ៉ាក់ អូបាម៉ា អារ៉ាប៊ីសាអូឌីតធ្លាប់ស្នើសុំបញ្ជូនកងទ័ពខ្លួនទៅកាន់ប្រទេសស៊ីរីផងដែរ ប៉ុន្តែកាលនោះអាមេរិកមិនបានទទួលយកសំណើនេះឡើយ។ ដូច្នេះហើយបានជារដ្ឋសេដ្ឋីប្រេងមួយនេះបន្តពិភាក្សាជាមួយរដ្ឋបាលអាមេរិកពាក់ព័ន្ធបញ្ហានេះ។
រដ្ឋបាលលោក ត្រាំ បានបញ្ជាក់ហើយថា ខ្លួនចង់ឃើញប្រទេសពាក់ព័ន្ធក្នុងឈូងសមុទ្រពែក្សចេញមុខចែករម្លែកការចំណាយហិរញ្ញវត្ថុ និងរម្លែកបន្ទុកយោធាដើម្បីធានាស្ថិរភាពនៅក្នុងតំបន់ ខណៈដែលអាមេរិកមានចេតនាចង់បន្ថយឬដកទ័ពចេញពីស៊ីរីនោះ។
សេតវិមានអាមេរិកបានបញ្ជាក់ជាថ្មីនៅដើមសប្តាហ៍នេះថា លោក ត្រាំ នៅតែចង់ឃើញមានការដកទ័ពចេញឆាប់រហ័សពីស៊ីរី ខណៈដែលប្រធានាធិបតីបារាំងលោក អេម៉ានុយអែល ម៉ាក្រងបានផ្តល់យោបល់ឲ្យលោករក្សាទុកកងទ័ពអាមេរិកក្នុងរយៈពេលវែងផងដែរនោះ។ ប៉ុន្តែលោកក៏ចង់ឃើញកម្ចាត់ក្រុមភេរវជនរដ្ឋឥស្លាមទាំងស្រុង និង បន្តឃ្លាំមើលសកម្មភាពអ៊ីរ៉ង់នៅមជ្ឈិបូព៌ាថែមទៀត។
ទាក់ទិនបន្ទុកហិរញ្ញវត្ថុ និងយោធាដែលអាមេរិកលើកឡើងនេះ ប្រមុខការទូតអារ៉ាប៊ីសាអូឌីតខាងលើបានសង្កត់ធ្ងន់ថា ក្រុងរីយ៉ាដនៅបន្តរក្សាការប្តេជ្ញាចិត្តក្នុងការជួយចែករម្លែកបន្ទុកទាំងនោះរួមគ្នាដើម្បីដោះស្រាយបញ្ហាប្រឈមផង។
ដោយឡែកគេមិនទាន់ដឹងច្បាស់នៅឡើយទេថា អារ៉ាប៊ីសាអូឌីត នឹងបញ្ជូនទ័ពទៅស៊ីរីនៅពេលណា និងមានគោលដៅអ្វីឲ្យពិតប្រាកដនោះ។ ប៉ុន្តែមកដល់ពេលបច្ចុប្បន្នអារ៉ាប៊ីសាអូឌីតបានប្រកាសផ្លាស់ប្តូរជំហរចំពោះរដ្ឋាភិបាលស៊ីរី។ រជ្ជទាយាទអារ៉ាប៊ីសាអូឌីត Mohammed bin Salman បានថ្លែងក្នុងបទសម្ភាសន៍ជាមួយទស្សនាវដ្តី Times ប្រទេសរបស់ទ្រង់ទទួលស្គាល់ស្ថានភាពជាក់ស្តែងនៅស៊ីរី ហើយទទួលស្គាល់ថា ប្រធានាធិបតី បាសា អាល់អាសាដ មិនអាចធ្លាក់ពីតំណែងងាយស្រួលឡើយ៕
Tag:
អារ៉ាប៊ីសាអូឌីត
ស៊ីរី
អាមេរិក
© រក្សាសិទ្ធិដោយ thmeythmey.com