ប្រវត្តិជំនួបកំពូលពីរលើករវាងមេដឹកនាំកូរ៉េពីរនៅព្យុងយ៉ាង

អន្តរជាតិ

ប្រវត្តិជំនួបកំពូលពីរលើករវាងមេដឹកនាំកូរ៉េពីរនៅព្យុងយ៉ាង

24, Apr 2018 , 4:22 pm

រូបភាព

លោក គីម ដេជុង (ឆ្វេង) ជួបជាមួយលោក គីម ជុងអ៊ីល ក្នុងឆ្នាំ២០០០ និងលោក រ៉ូ មូយុន (ស្ដាំ) ជួបជាមួយលោក គីម ជុងអ៊ីល ក្នុងឆ្នាំ២០០៧ (រូបភាព AFP)

ដោយ: តន ចាន់រិទ្ធារ៉ា

មេដឹកនាំកំពូលកូរ៉េខាងជើង គីម ជុងអ៊ុន នឹងដើរឆ្លងកាត់ខ្សែព្រំដែនខណ្ឌចែកឧបទ្វីបកូរ៉េត្រង់ខ្សែស្របទី៣៨ ដើម្បីទៅជួបប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី២៧ ខែមេសា។ នេះជាជំនួបមេដឹកនាំកូរ៉េលើកទីបី រាប់ចាប់តាំងពីសង្គ្រាមបង្ហូរឈាមបងប្អូនកូរ៉េចប់នៅឆ្នាំ១៩៥៣ មក។ កម្មវិធីនុយក្លេអ៊ែរកូរ៉េខាងជើង និងការបញ្ចប់សង្គ្រាមជាអចិន្ត្រៃយ៍រវាងកូរ៉េទាំងពីរ ជាប្រធានបទសំខាន់នៃជំនួបមេដឹកនាំកូរ៉េលើកទីបីនេះ។

ខុសប្លែកពីជំនួបពីរលើកមុន ជំនួបមេដឹកនាំកូរ៉េលើកទីបី នឹងធ្វើនៅទឹកដីកូរ៉េខាងត្បូងវិញ។ អាគារសន្តិភាព ដែលមានទីតាំងនៅខាងត្បូងខ្សែព្រំដែនបែកចែងកូរ៉េទាំងពីរ នឹងទទួលស្វាគមន៍មេដឹកនាំកូរ៉េខាងជើង គីម ជុងអ៊ុន នៅថ្ងៃទី២៧ ខែមេសាខាងមុខ។ ពីរលើកមុន អតីតប្រធានាធិបតីកូរ៉េខាងត្បូង គីម ដេជុង និង រ៉ូ មូយុន បានធ្វើដំណើរទៅកាន់រដ្ឋធានីព្យុងយ៉ាងដើម្បីជួបជាមួយអតីតមេដឹកនាំកូរ៉េខាងជើង គីម ជុងអ៊ីល ។

ក្នុងអាណត្តិរបស់អតីតប្រធានាធិបតីទាំងពីរនេះ នយោបាយពន្លឺព្រះអាទិត្យរបស់កូរ៉េខាងត្បូងបានធ្វើឲ្យទំនាក់ទំនងជាមួយកូរ៉េខាងជើងស្គាល់ភាពល្អប្រសើរ បន្ទាប់ពីបែកបាក់ដោយសារសង្គ្រាមមកនោះ។ ក្នុងជំនួបនៅទឹកដីកូរ៉េខាងជើង កូរ៉េទាំងពីរបានសន្យាគ្នាជាច្រើនជាពិសេសការកាត់បន្ថយភាពតានតឹង និងការបង្រួបបង្រួមឧបទ្វីបកូរ៉េ។

ជំនួបលើកទី១ បញ្ចប់ដោយរឿងអាស្រូវ

នៅខែមិថុនា ឆ្នាំ២០០០ ប្រធានាធិបតីកូរ៉េខាងត្បូង គីម ដេជុង បានធ្វើទស្សនកិច្ចទៅកាន់រដ្ឋធានីព្យុងយ៉ាង និងជួបចរចាជាមួយមេដឹកនាំកូរ៉េខាងជើង គីម ជុងអ៊ីល ។ នោះ គឺជាជំនួបលើកដំបូងបង្អស់រវាងមេដឹកនាំកូរ៉េទាំងសងខាង ក្រោយសង្គ្រាមចប់នៅឆ្នាំ១៩៥៣ ។ ក្នុងការជួបតទល់ដែលផ្សាយផ្ទាល់នៅកូរ៉េខាងត្បូង លោក គីម ជុងអ៊ីល បានបង្កការភ្ញាក់ផ្អើលខ្លាំង ដោយបានទៅស្វាគមន៍លោក គីម ដេជុង ដល់ព្រលានយន្តហោះតែម្ដង។

លោក គីម ដេជុង ចាប់ដៃលោក គីម ជុងអ៊ីល ក្នុងជំនួបមេដឹកនាំកូរ៉េលើកទី១ (រូបភាព AFP)

«ខ្ញុំពិតជារីករាយដែលបានជួបលោក។ ខ្ញុំចង់មកជាយូរមកហើយ»។ នេះជាសម្ដីរបស់ប្រធានាធិបតីកូរ៉េខាងត្បូងទៅកាន់មេដឹកនាំកូរ៉េខាងជើង។ លោក គីម ជុងអ៊ីល ក៏ឆ្លើយវិញថា៖ «យើងគឺជាជនជាតិកូរ៉េដូចគ្នា»។ បន្ទាប់មក មេដឹកនាំកូរ៉េទាំងពីរក៏បានជិះឡានជាមួយគ្នា កាត់វិថីនានាក្នុងរដ្ឋធានីព្យុងយ៉ាង។ ក្នុងពិធីពិសារអាហារថ្ងៃត្រង់ចុងក្រោយ មេដឹកនាំទាំងពីរក៏បានច្រៀងចម្រៀងបង្ហាញពីការបង្រួបបង្រួមកូរ៉េផងដែរ។

ក្នុងជំនួបលើកទីមួយនេះ កូរ៉េទាំងពីរបានចុះហត្ថលេខាលើកិច្ចព្រមព្រៀងកាត់បន្ថយភាពតានតឹង និងជំរុញការប្រឹងប្រែងដើម្បីការរួបរួមគ្នា និងជាពិសេសនោះ ជំរុញការបង្កើតសន្តិភាពជាអចិន្ត្រៃយ៍នៅឧបទ្វីបកូរ៉េ។ ភាគីទាំងពីរក៏បានឯកភាពរៀបចំឲ្យក្រុមគ្រួសារកូរ៉េដែលបែកខ្ញែកដោយសារសង្គ្រាមជួបគ្នាវិញដែរ។ ដោយសារការប្រឹងប្រែងនេះ លោក គីម ដេជុង បានឈ្នះពានរង្វាន់ណូបែលសន្តិភាព។

យ៉ាងណាមិញ ក្រោមជំនួបបញ្ចប់ទៅនោះ ក៏លេចធ្លាយរឿងអាស្រូវកូរ៉េខាងត្បូងផ្ដល់ចំនួន៥០០លានដុល្លារទៅឲ្យកូរ៉េខាងជើងជាសម្ងាត់។ ទឹកប្រាក់ដ៏ច្រើននេះត្រូវបានផ្ដល់តាមរយៈក្រុមហ៊ុន Hyundai មុនជំនួបរវាងលោក គីម ដេជុង និងលោក គីម ជុងអ៊ីល ។ ក្រុមអ្នករិះគន់ក៏ហៅជំនួបលើកទីមួយនៃមេដឹកនាំកូរ៉េជាការជួបគ្នាដើម្បីប្រាក់។ នេះបើតាមការផ្សាយរបស់ទីភ្នាក់ងារព័ត៌មាន AFP ។

ជំនួបលើកទី២ ធ្វើឡើងក្រោយកូរ៉េខាងជើងសាកល្បងនុយក្លេអ៊ែលើកដំបូង

ជំនួបលើកទី២ របស់មេដឹកនាំកូរ៉េទាំងពីរក្នុងខែតុលា ឆ្នាំ២០០៧ បន្តធ្វើនៅរដ្ឋធានីព្យុងយ៉ាងទៀត។ ការជួបទល់មុខរវាងប្រធានាធិបតីកូរ៉េខាងត្បូង រ៉ូ មូយុន និងលោក គីម ជុងអ៊ីល ធ្វើឡើង ខណៈដែលការចរចា ៦ភាគីកំពុងធ្វើឡើងយ៉ាងក្ដៅគគុក បន្ទាប់ពីកូរ៉េខាងជើងសាកល្បងនុយក្លេអ៊ែរលើកដំបូងរបស់ខ្លួននៅឆ្នាំ២០០៦ ។

លោក រ៉ូ មូយុន និងលោក គីម ជុងអ៊ីល នាជំនួបមេដឹកនាំកូរ៉េលើកទី២ (រូបភាព AFP)

លោក រ៉ូ មូយុន និងភរិយា បានដើរឆ្លងកាត់ព្រំដែនកូរ៉េទាំងពីរចម្ងាយ៣០ម៉ែត្រ មុននឹងបន្តដំណើរតាមរថយន្តឆ្ពោះទៅកាន់រដ្ឋធានីព្យុងយ៉ាង។ មេដឹកនាំកូរ៉េទាំងពីរបានចុះហត្ថលេខាលើសេចក្ដីថ្លែងការណ៍រួមដោយជំរុញឲ្យឧបទ្វីបកូរ៉េក្លាយជាតំបន់គ្មាននុយក្លេអ៊ែរ និងបង្កើតសន្ធិសញ្ញាបញ្ចប់សង្គ្រាមអចិន្ត្រៃយ៍តែម្ដង។ កូរ៉េទាំងពីរក៏ឯកភាពគ្នាមិនឲ្យមានការប្រឈមមុខផ្នែកយោធា ដោះស្រាយបញ្ហាដោយការចរចា និងជំរុញការធ្វើពាណិជ្ជកម្ម ការធ្វើដំណើរ ក៏ដូចជាការផ្លាស់ប្ដូរទៅមកផង៕