កីឡាអន្តរជាតិ
អន្តរជាតិ
UCL៖ Real បានកៅអីទៅវគ្គផ្តាច់ព្រ័ត្រនៅក្រុងកៀវ ក្រោយស្មើ Bayern ២-២ ក្រុមកីឡាករ Real Madrid អបអរក្រោយបានកៅអីទៅវគ្គផ្តាច់ព្រ័ត្រ។ រូបថត AFP
× Real Madrid បានកៅអីទៅកាន់វគ្គផ្តាច់ព្រ័ត្រនៃពានរង្វាន់ UEFA Champions League បន្ទាប់ពីប្រកួតស្មើគ្នា ២-២ ជាមួយ Bayern Munich នាជំនួប វគ្គពាក់កណ្តាលផ្តាច់ព្រ័ត្រ ជើងទី២ នៅរាត្រីថ្ងៃទី១ ឧសភា។
ក្នុងការប្រកួតនៅទឹកដី Santiago Bernabeu ក្រុមភ្ញៀវ Bayern Munich អាចរកគ្រាប់បាល់នាំមុខមុនដោយកីឡាករ Joshua Kimmich តាំងពី៣នាទីដំបូងនៃវគ្គទី១ មុនពេល Karim Benzema រកគ្រាប់បាល់តាមស្មើឲ្យម្ចាស់ជើងឯកចាស់វិញនៅនាទី១១ ពីការបញ្ជូនបាល់យ៉ាងល្អពីមិត្តរួមក្រុម Marcelo។
ចូលដល់តង់ទី២ ត្រឹមនាទីដំបូង Benzema ដដែលបានរកគ្រាប់បាល់នាំមុខវិញបន្ទាប់ពីអ្នកចាំទី Steven Ulreich របស់ Bayern ភ្លាត់ស្នៀតនៅមុខទី ហើយ James Rodriguez ដែលខ្ចីជើងពី Real ជាអ្នកស៊ុតតាមស្មើវិញនៅនាទី៦៣ ដែលក្រុមទាំងពីរបញ្ចប់ទៅក្នុងលទ្ធផល ២-២។
ក្រុមរបស់លោក Zinedine Zidane បាននាំមុខក្រុមជើងឯកលីកកំពូលអាល្លឺម៉ង់ Bayern Munich ក្នុងលទ្ធផល ២-១ កាលពីប្រកួតជើងទីមួយក្នុងទឹកដី Allianz Arena។ ដូច្នេះលទ្ធផលសរុបទាំងពីរជើងក្រុមម្ចាស់ជើងឯកអឺរ៉ុប ១២សម័យមានគ្រាប់បាល់នាំមុន៤ទល់នឹង៣ អាចឈានទៅកាន់វគ្គផ្តាច់ព្រ័ត្រដើម្បីដណ្តើមពានលំដាប់ទី១អឺរ៉ុបនេះ ៣រដូវកាលជាប់គ្នា។
ក្រុមអធិរាជស នឹងត្រូវរង់ចាំការប្រកួតរវាង Liverpool និង Roma ដែលត្រូវជួបគ្នាជើងទី២ នៅរាត្រីថ្ងៃទី២ ខែឧសភានេះ ដើម្បីរកក្រុមណាដែលអាចឈានទៅកាន់វគ្គផ្តាច់ព្រ័ត្រដែលនឹងធ្វើឡើងនៅទីក្រុងកៀវ ប្រទេសអ៊ុយក្រែន នាថ្ងៃទី ២៦ ខែឧសភា ឆ្នាំ២០១៨៕
Tag:
បាល់ទាត់
UEFA Champions League
Real Madrid
Bayern Munich
© រក្សាសិទ្ធិដោយ thmeythmey.com