ខ្សែប្រយុទ្ធ Diego Costa បានបញ្ចប់ក្តីសង្ឃឹមចុងក្រោយរបស់លោក Arsene Wenger ដោយការស៊ុតបាល់បញ្ចូលទី១គ្រាប់យកឈ្នះ Arsenal ១-០ ដើម្បីជួយ Atletico Madrid ឡើងទៅកាន់វគ្គផ្តាច់ព្រ័ត្រពានរង្វាន់ UEFA Europa League។
ការប្រកួតជាលើកទី ២៥០ នៃក្របខណ្ឌអឺរ៉ុប របស់អ្នកចាត់ការសញ្ជាតិបារាំងក្នុងនាមជាអ្នកចាត់ការទូទៅក្រុម Arsenal ជាលើកចុងក្រោយ និងចង់នាំក្រុមនេះបានកៅអី Champions League រដូវកាលក្រោយ ត្រូវបានបំផ្លាញទាំងស្រុងដោយសារថ្វីជើងរបស់ Costa។
ខ្សែប្រយុទ្ធសញ្ជាតិអេស្ប៉ាញ ដែលផ្ទេរពី Chelsea ត្រឡប់មក Atletico Madrid វិញនៅដើមរដូវកាលនេះអាចរកគ្រាប់បាល់ជ័យជម្នះលើក្រុមកាំភ្លើងធំ ១-០ ក្នុងការប្រកួតជើងទី២ វគ្គពាក់កណ្តាលផ្តាច់ព្រ័ត្រ នៅរាត្រីថ្ងៃទី៣ ខែឧសភា។
ជ័យជម្នះរបស់ AT-Madrid បានបញ្ចប់ក្តីសង្ឃឹមរបស់អ្នកចាត់ការវ័យ៦៨ឆ្នាំ ក្នុងការចាកចេញពីក្រុមកាំភ្លើងធំជាមួយការបន្សល់ស្នាដៃចុងក្រោយ ដោយជួយក្រុមបានកៅអី Champions League សម្រាប់រដូវកាលក្រោយ ដ្បិតឈរនៅចំណាតថ្នាក់ទី៦ ក្នុងតារាង Premier League មាន៥៧ពិន្ទុ តាមពីក្រោយក្រុមលេខ៤ Tottenham Hostspur រហូត១៤ពិន្ទុ ខណៈសល់៣ប្រកួតទៀតនឹងត្រូវបញ្ចប់រដូវកាល។