កីឡាអន្តរជាតិ
អន្តរជាតិ
Wenger ចង់មានប្រវត្តិសាស្ត្រល្អចុងក្រោយ ដោយនាំ Arsenal ឲ្យបានកៅអី UCL
× លោក Arsene Wenger បានប្តេជ្ញាថានឹងបង្កើតប្រវត្តិសាស្ត្រដ៏អស្ចារ្យចុងក្រោយជាមួយ Arsenal ដោយនាំក្រុមរហស្សនាមកាំភ្លើងធំនេះត្រឡប់ទៅកាន់ក្របខណ្ឌ UEFA Champions League ឲ្យបាននៅរដូវកាលក្រោយ។ នេះបើយោងតាមការផ្សាយរបស់ Sky Sports។
Arsenal នឹងធ្វើដំណើរទៅជួប Atletico Madrid ក្នុងការប្រកួតជើងទី២ វគ្គពាក់កណ្តាលផ្តាច់ព្រ័ត្រ ពានរង្វាន់ UEFA Europa League ដែលធ្វើឡើងនៅកីឡដ្ឋាន Wanda Metropolitano ថ្ងៃទី៣ ខែឧសភា វេលាម៉ោង ២:០៥នាទី [ម៉ោងនៅកម្ពុជា] ដើម្បីប្រជែងយកកៅអីទៅកាន់វគ្គផ្តាច់ព្រ័ត្រ។
កាលពីជើងទី១នៅទឹកដី Emirates ក្រុមរបស់លោក Arsene Wenger ទទួលបានលទ្ធផលត្រឹមស្មើ ១-១ ប៉ុណ្ណោះបើទោះ Atletico Madrid មានគ្នាតែ១០នាក់ក៏ដោយ។ ប៉ុន្តែយ៉ាងណាអ្នកចាត់ការសញ្ជាតិបារាំងរូបនេះបានប្តេជ្ញាចិត្តរួចហើយថានឹងនាំ Arsenal លើកពានលំដាប់ទី២របស់ទ្វីបអឺរ៉ុបឲ្យបានសម្រាប់ក្លិបជាលើកចុងក្រោយ។
ការគ្រប់គ្រងរយៈពេល ២២ ឆ្នាំរបស់ Wenger ក្នុងនាមជាអ្នកចាត់ការទូទៅក្រុមកាំភ្លើងធំ នឹងត្រូវបញ្ចប់នៅចុងរដូវនេះ។ ក្លិបដែលមានមូលដ្ឋានក្នុងក្រុងឡុងដ៍មានភាគរយច្រើនមិនបានលេង Champions League រដូវកាលក្រោយម្តងទៀត ដ្បិតឈរនៅចំណាតថ្នាក់ទី៦ ក្នុងតារាង Premier League មាន៥៧ពិន្ទុ តាមពីក្រោយក្រុមលេង៤ Tottenham Hostspur ១៤ពិន្ទុ ខណៈសល់៣ប្រកួតទៀតនឹងត្រូវបញ្ចប់រដូវកាល។
ប៉ុន្តែការឈ្នះពាន Europa League នឹងធ្វើឲ្យ Arsenal វិលត្រលប់ទៅកាន់ក្របខណ្ឌលំដាប់ទី១អឺរ៉ុបវិញបាននៅរដូវកាលក្រោយ ហើយនេះជាអ្វីដែលអ្នកចាត់ការវ័យ ៦៨ឆ្នាំចង់បាន នៅក្រោយពេលបញ្ចប់ការកាន់តំណែង។
«ខ្ញុំចង់បញ្ចប់ការងាររបស់ខ្ញុំឲ្យបានល្អ»។ Wenger បាននិយាយបែបនេះនៅមុនការប្រកួតជើងទី២នៅរាត្រីនេះ ហើយលោកបន្ថែមថា៖«ខ្ញុំជឿជាក់ថាអ្វីៗនឹងប្រសើរ ដរាបណាខ្ញុំនៅកន្លែងនេះជាមួយការប្តេជ្ញាចិត្ត និងថាមពលរបស់ខ្ញុំ។ ខ្ញុំចង់ដើរចេញពី Arsenal ហើយគិតគូរហូតដល់ថ្ងៃចុងក្រោយ ដោយផ្ដោតតែលើ Arsenal តែមួយគត់។ នៅពេលដែលការងាររបស់ខ្ញុំនៅ Arsenal ត្រូវបញ្ចប់ ខ្ញុំចង់ឃើញកន្លែងដែលខ្ញុំត្រូវចាកចេញត្រូវបញ្ចប់ជាមួយប្រវត្តិសាស្ត្រដ៏ល្អ»។
ចំណែកមួយគូទៀត Marseille ដែលបានយកឈ្នះ FC Red Bull Salzburg ក្នុងលទ្ធផល ២-០ សម្រាប់ការប្រកួតជើងទី១នោះ នឹងធ្វើដំណើរទៅកាន់កីឡដ្ឋាន Red Bull Arena Salzburg វិញសម្រាប់ការប្រកួតជើងទី២នៅម៉ោងដំណាលគ្នាជាមួយក្រុមខាងលើដែរ៕
Tag:
បាល់ទាត់
Arsene Wenger
Arsenal
UEFA Europa League
© រក្សាសិទ្ធិដោយ thmeythmey.com