អន្តរជាតិ
ប្រធាន ADB ដាស់តឿនប្រទេសអាស៊ី «ប្រយ័ត្នលង់ខ្លួនដោយសារខ្ចីលុយច្រើនពេក» ប្រធានធនាគារអភិវឌ្ឍអាស៊ី Takehiko Nakao (រូបភាព Xinhua)
× ប្រធានធនាគារអភិវឌ្ឍអាស៊ី (ADB) ព្រមានប្រទេសតំបន់អាស៊ីជុំវិញការខ្ចីលុយពីចិនក្រោមក្របខណ្ឌគំនិតផ្ដួចផ្ដើមខ្សែក្រវាត់ និងផ្លូវ។ ទោះជាចាត់ទុកគំនិតផ្ដួចផ្ដើមនេះជារឿងល្អក្ដី លោក Takehiko Nakao បានដាស់តឿនឲ្យប្រទេសតំបន់អាស៊ី កុំខ្ចីលុយច្រើនហួសហេតុដើម្បីកសាងហេដ្ឋារចនាសម្ព័ន្ធក្នុងស្រុក។ ការខ្ចីលុយដោយមិនបានគិតគូរច្បាស់លាស់ អាចនាំទៅរកធ្លាក់ចូលក្នុងវិបត្តិបំណុលមិនខាន ក្នុងករណីមិនមានលទ្ធភាពសងវិញនោះ។
បើគ្មានលទ្ធភាពសងគេវិញ កុំខ្ចីលុយច្រើនពេក ប្រយ័ត្នវ័ណ្ឌក។ នេះសម្ដីដាស់តឿនរបស់ប្រធានធនាគារអភិវឌ្ឍអាស៊ី (ADB) លោក Takehiko Nakao សម្រាប់ប្រទេសតំបន់អាស៊ី ដែលខ្ចីលុយពីប្រទេសផ្សេងដើម្បីអភិវឌ្ឍហេដ្ឋារចនាសម្ព័ន្ធរបស់ខ្លួន។ លោក Nakao បានលើកយកករណីគំនិតផ្ដួចផ្ដើមខ្សែក្រវាត់ និងផ្លូវ ដែលជាគម្រោងកសាងហេដ្ឋារចនាសម្ព័ន្ធមានទំហំទឹកប្រាក់រាប់ពាន់លានដុល្លារ ដែលបង្កើតដោយប្រធានាធិបតីចិន ស៊ី ជិនភីង ។
ក្នុងកិច្ចប្រជុំមួយនៅហ្វីលីពីននៅថ្ងៃទី៣ ខែឧសភា លោក Nakao ប្រាប់អ្នកសារព័ត៌មានថា គំនិតផ្ដួចផ្ដើមរបស់ចិន ជាកម្មវិធីសំខាន់មួយដើម្បីភ្ជាប់តំបន់ ក៏ដូចជាពង្រីកសមាហរណកម្ម និងកិច្ចសហប្រតិបត្តិការទូទាំងអាស៊ី។ លោកក៏បានប្រកាសជំហរចូលរួមជាមួយគម្រោងអភិវឌ្ឍនេះ នៅពេលចាំបាច់។ យ៉ាងណាមិញ លោកក៏ព្រមានពីការខ្ចីលុយច្រើនហួសហេតុពីគម្រោងនេះដើម្បីការកសាងហេដ្ឋារចនាសម្ព័ន្ធនានា។
បើតាមសារព័ត៌មាន Nikkei Asian Review ប្រធានធនាគារអភិវឌ្ឍអាស៊ីជនជាតិជប៉ុនរូបនេះបញ្ជាក់ថា ប្រសិនបើប្រទេសណាខ្ចីលុយច្រើនពេកសម្រាប់គម្រោងហេដ្ឋារចនាសម្ព័ន្ធណាមួយដោយមិនគិតគូរម៉ត់ចត់ពីភាពស្ថិតស្ថេរ និងការសិក្សាពីផលប្រយោជន៍នៃគម្រោងនោះទេ វានឹងបង្កើតបញ្ហានៅពេលសងលុយវិញ។ លោកសង្កត់ធ្ងន់ទៀតថា យើងក៏ត្រូវគិតពីបញ្ហានិរន្តរភាពនៃបំណុលឲ្យបានប្រាកដប្រជាបំផុត។
តាមពិតទៅ គំនិតផ្ដួចផ្ដើមខាងលើរបស់ចិន រងការរិះគន់ជាញឹកញយមកហើយ ជាពិសេសប្រតិកម្មពីលោកខាងលិច។ នេះក៏ព្រោះតែគម្រោងនេះអាចអនុញ្ញាតឲ្យមានការខ្ចីលុយក្នុងទំហំទឹកប្រាក់ ស្របពេលប្រទេសខ្ចីលុយជារដ្ឋក្រីក្រមិនសូវសម្បូរធនធាន ដែលត្រូវការប្រាក់ដើម្បីផ្គត់ផ្គត់គម្រោងអភិវឌ្ឍរបស់ខ្លួន។ ដោយហេតុនេះទើបគេបារម្ភថា ប្រទេសទាំងនោះនឹងធ្លាក់ក្នុងអន្ទាក់បំណុលមិនខាន ដោយសារមិនអាចសងលុយម្ចាស់បំណុលបាន។
ឆ្លើយតបពាក្យរិះគន់ ចិនក៏មិនបាននៅស្ងៀមដែរ និងបានឆ្លើយតបវិញជារឿយដែរ។ សម្រាប់ក្រុងប៉េកាំង គំនិតផ្ដួចផ្ដើមរបស់លោក ស៊ី គឺជាកិច្ចសហប្រតិបត្តិការថ្មីក្នុងតំបន់ និងពិភពលោកដែលផ្ដល់ប្រយោជន៍ជាទូទៅ។ លើសពីនេះ ចិនក៏មិនមែនផ្ដល់កម្ចីដោយបានគិតពីស្ថិរភាពបំណុលរបស់ប្រទេសដែលខ្ចីលុយរបស់ខ្លួន ហើយម្យ៉ាងទៀតចិនបានគិតគូរពីគោលការណ៍ស្មើភាព និងគោរពគ្នាទៅវិញទៅមកទៀតផង៕
Tag:
អាស៊ី
ចិន
ADB
BRI
Takehiko Nakao
© រក្សាសិទ្ធិដោយ thmeythmey.com