កីឡាអន្តរជាតិ
អន្តរជាតិ
Premier League៖ Liverpool បានកៅអីទៅ UCL ឯ Swansea ធ្លាក់ទៅក្របខណ្ឌទី២
× ការប្រកួតចុងក្រោយនៃក្របខណ្ឌ Premier League របស់អង់គ្លេស បានបន្សល់នូវអនុស្សារីយ៍ជាច្រើន ជ័យជម្នះរបស់ Liverpool បានធ្វើឲ្យ Chelsea បាត់បង់ឱកាសទៅលេងក្របខណ្ឌ Champions League នៅរដូវកាលក្រោយ។ Swansea ត្រូវធ្លាក់ទៅលេងនៅក្របខណ្ឌ Championship។ Arsenal បានជ័យជម្នះក្នុងការដឹកនាំចុងក្រោយរបស់លោក Arsene Wenger សម្រាប់រយៈពេល២២ឆ្នាំ។
Manchester City ដែលទើបលើកពាន Premier League រដូវកាលនេះ ជាផ្លូវការ បានបន្តកំណត់ត្រានៃជ័យជម្នះរបស់ខ្លួន ដោយ Gabriel Jesus បានស៊ុតបាល់បញ្ចូលទីនាទីចុងក្រោយលើម្ចាស់ផ្ទះ Southampton ។ លទ្ធផល ១-០ នេះ បាននាំឲ្យ Manchester City រកបានរហូតដល់ទៅ១០០ពិន្ទុជាកំណត់ត្រា។
នៅ Old Trafford ខ្សែប្រយុទ្ធ Marcus Rashford បានស៊ុតបាល់បញ្ចូលទីនាំជ័យជម្នះ ១-០ សម្រាប់ម្ចាស់ផ្ទះ Manchester United លើ Watford។ Michael Carrick បានបង្ហាញខ្លួនលើកទី៤៦៤ និងជាលើកចុងក្រោយ ដោយកីឡាករវ័យ៣៦ឆ្នាំរូបនេះ នឹងចូលរួមក្នុងក្រុមគ្រូបង្វឹករបស់បិសាចក្រហមនារដូវកាលក្រោយ។
ស្របពេលជាមួយគ្នា Tottenham Hotspur បានយកឈ្នះ Leicester City ក្នុងការប្រកួតដែលមានការស៊ុតបាល់បញ្ចូលទីសរុប៩គ្រាប់។ ទោះបីជាយ៉ាងណាក៏ដោយ ការរកបាន២គ្រាប់បន្ថែមរបស់ Harry Kane ក្នុងជ័យជម្នះ ៥-៤ មិនអាចធ្វើឲ្យរូបគេដណ្តើមបានស្បែកជើងមាសប្រចាំរដូវកាលនោះឡើយ។
ឱកាសដែល Kane កាន់តែខកនោះ គឺដោយសារតែ Mohamed Salah បន្តបង្កើនរកគ្រាប់បាល់ស៊ុតបញ្ចូលទី១គ្រាប់ទៀតក្នុងជ័យជម្នះ ៤-០ លើភ្ញៀវ Brighton។ ជោគជ័យរបស់ Liverpool ធ្វើឲ្យពួកគេទទួលបានកៅអីដោយស្វ័យប្រវត្តិសម្រាប់ពានរង្វាន់ Champions League នារដូវកាលក្រោយ បើទោះបីជាលទ្ធផលវគ្គផ្តាច់ព្រ័ត្រ UCL របស់ពួកគេជាមួយ Real Madrid ទទួលបានបែបណាក៏ដោយ។ Salah ដែលជាប់ជាកីឡាករឆ្នើមប្រចាំរដូវកាល បានស៊ុតបាល់បញ្ចូលទីជាកំណត់ត្រារហូតដល់ទៅ៣២គ្រាប់ ខណៈ Kane មាន៣០គ្រាប់។
តាមពិតទៅលទ្ធផលរបស់ Liverpool បានកំណត់ទីតាំងរបស់ Chelsea រួចទៅហើយ ប៉ុន្តែតោខៀវខ្លួនឯង ក៏បានខកខានរកពិន្ទុបន្ថែមផងដែរ។ ពួកគេបានចាញ់ម្ចាស់ផ្ទះ Newcastle រហូតដល់ទៅ៣គ្រាប់។ Chelsea ត្រូវធ្លាក់ទៅលេងក្នុងក្របខណ្ឌ Europa League។ ជាមួយគ្នានេះ អ្នកគាំទ្រសារិកាព្រៃ បាននាំគ្នាលើកបដាសុំឲ្យលោក Rafael Benitez បន្តការដឹកនាំក្រុម។ គ្រូបង្វឹកអេស្ប៉ាញរូបនេះ ក៏ជាអ្នកនាំ Chelsea ឈ្នះ Europa League ផងដែរ កាលពី៥ឆ្នាំមុន។
Arsenal ដែលត្រូវលេងក្នុងក្របខណ្ឌ Europa League ពីររដូវកាលជាប់គ្នាក្នុងនាមជាក្រុមលេខ៦នោះ បានយកឈ្នះម្ចាស់ផ្ទះ Huddersfiled ១-០ នាវត្តមានដឹកនាំចុងក្រោយរបស់លោក Arsene Wenger។ វាជាការប្រកួតលើកទី១២៣៥ដែលគ្រូបង្វឹកបារាំងរូបនេះ បានដឹកនាំកាំភ្លើងធំ។ អ្នកគាំទ្រក្រុមទាំងពីរសុទ្ធតែបង្ហាញពីក្តីស្រឡាញ់របស់ខ្លួនចំពោះលោក Arsene ដែលបានប្រឡូកអាជីពជាមួយ Arsenal អស់រយៈពេល២២ឆ្នាំ។
Burnley បានដែលកក់កៅអីនៅ Europa League ក្នុងនាមជាក្រុមលេខ៧តាំងពីសប្តាហ៍មុននោះ បែរជាចាញ់ Bournemouth ២-១ ។ ទោះបីជាយ៉ាងណាក៏ដោយ ក្រុមដែលដឹកនាំដោយលោក Sean Dyche មិនទទួលសម្ពាធខ្លាំងនោះឡើយ ពីព្រោះពួកគេត្រៀមខ្លួនរួចជាស្រេចក្នុងដំណើរផ្សេងព្រេងក្នុងក្របខណ្ឌអឺរ៉ុបក្រោយអវត្តមានអស់រយៈពេល៥១ឆ្នាំ។
ជំនួបផ្សេងទៀតរួមមាន West Ham ឈ្នះ Everton ៣-១ Crystal Palace បំបាក់ក្រុមបាតតារាង West Brom ២-០ ខណៈ Stoke City បានទទួលជ័យជម្នះបង្គ្រប់កិច្ចលើភ្ញៀវ Swansea ២-១ មុនពួកគេត្រូវបន្តទៅជួបគ្នានៅក្របខណ្ឌ Championship។
សង្ខេប Premier League៖
ក្រុមដែលបានកៅអី Champions League
-Manchester City (ជើងឯក)
-Manchester United
-Tottenham Hotspur
-Liverpool
ក្រុមដែលបានកៅអី Europa League
-Chelsea
-Arsenal
-Burnley
ក្រុមដែលធ្លាក់ទៅ Championship
-Swansea City
-Stoke City
-West Bromwich Albion
ក្រុមដែលឡើងពី Championship:
-Wolverhampton Wanderers (ជើងឯក)
-Cardiff City
- ក្រុមមួយទៀតក្នុងចំណោម Fullham, Deby County, Aston Villa, Middlesbrough
© រក្សាសិទ្ធិដោយ thmeythmey.com