រដ្ឋាភិបាលមហាធៀ នឹងដាក់បម្រាមប្រើថង់ប្លាសិ្ទកទូទាំងប្រទេស តែទុកពេលមួយឆ្នាំពន្យល់ប្រជាជនសិន

អន្តរជាតិ

រដ្ឋាភិបាលមហាធៀ នឹងដាក់បម្រាមប្រើថង់ប្លាសិ្ទកទូទាំងប្រទេស តែទុកពេលមួយឆ្នាំពន្យល់ប្រជាជនសិន

28, May 2018 , 2:18 pm

រូបភាព

ដោយ: សៅ ផលនិស្ស័យ (Sao Phal Niseiy)

រដ្ឋាភិបាលថ្មីរបស់លោក មហាធៀ មហាម៉ាត់ នឹងបន្តអនុវត្តច្បាប់ហាមឃាត់ការប្រើប្រាស់ស្បោងប្លាស្ទិកនៅទូទាំងប្រទេសដើម្បីដោះស្រាយបញ្ហាបំពុលបរិស្ថាន។ ប៉ុន្តែរដ្ឋាភិបាលនេះត្រូវការពេលមួយឆ្នាំសិនដើម្បីចុះអប់រំ និងពន្យល់ប្រជាជនឲ្យបានយល់ច្បាស់ពីចំណាត់ការរដ្ឋាភិបាល និងប្រយោជន៍នៃការឈប់ប្រើប្រាស់ថង់ប្លាស្ទិក។

ដូចបានសន្យាក្នុងការឃោសនា រដ្ឋាភិបាលដឹកនាំដោយលោក មហាធៀ មហាម៉ាត់ នឹងផ្តោតសំខាន់ការដោះស្រាយបញ្ហាបំពុលបរិស្ថានជាពិសេសការបោះចោលសំណល់ថង់ប្លាស្ទិកតែម្តង។ ដើម្បីដោះស្រាយបញ្ហានេះ ក្នុងរយៈពេលមួយទៅទៀត រដ្ឋាភិបាលក្រុងគូឡាឡាំពួរ នឹងចាប់ផ្តើមអនុវត្តការហាមឃាត់ការប្រើប្រាស់ថង់ប្លាស្ទិកទូទាំងប្រទេស។

យោងតាមការចុះផ្សាយរបស់សារព័ត៌មានម៉ាឡេស៊ី Malaysiakini រដ្ឋមន្ត្រីថ្មីទទួលបន្ទុកលំនៅដ្ឋាននិងរដ្ឋបាលមូលដ្ឋានលោកស្រី Zuraida Kamaruddin បានលើកឡើងថា វាជារឿងចាំបាច់ដែលត្រូវមានការហាមឃាត់ការប្រើប្រាស់ថង់ប្លាស្ទិក។

ប៉ុន្តែលោកស្រីបានលើកឡើងពីសារសំខាន់ក្នុងការបញ្ជៀបចំណេះដឹងក្នុងចំណោមប្រជាជនគ្រប់ស្រទាប់វណ្ណៈពាក់ព័ន្ធនឹងគោលបំណងរបស់រដ្ឋាភិបាលក្នុងការហាមឃាត់ថង់ប្លាស្ទិកនេះសិន។ លោកស្រីកត់សម្គាល់ថា មកដល់បច្ចុប្បន្នការយល់ដឹងរបស់ប្រជាជនៅមានកម្រិតទាប បើទោះជារដ្ឋាភិបាលធ្លាប់បានដាក់ចេញការហាមឃាត់ការប្រើថង់នៅគូឡាឡាំពួរ, Putrajaya, Selangor, Melaka និងJohor ក៏ដោយ។

«ប្រជាជនម៉ាឡេស៊ីយើងនៅមានឥរិយាបថមួយចូលចិត្តអ្វីងាយស្រួល។ ពួកគេចង់ប្រើប្រាស់ថង់ប្លាស្ទិក ដោយអាចយួររបស់មកផ្ទះបានស្រួល។ ដូច្នេះហើយ រដ្ឋាភិបាលត្រូវការពេលខ្លះដើម្បីពន្យល់ និងអប់រំប្រជាជនសិន។ និយាយទៅ ផ្តល់ពេលឲ្យខ្ញុំមួយឆ្នាំអាចល្មម»។

លោកស្រីបន្ថែមថាដោយសារប្រជាជនខ្លះធ្លាប់បានលឺហើយពីការហាមប្រើប្រាស់ថង់ប្លាស្ទិក។ ដូច្នេះ វាប្រហែលជាអាចអនុវត្តវិធានការនេះបានលឿន បើសិនជាអាជ្ញាធរចាប់ផ្តើមចុះណែនាំ និងចុះពន្យល់ប្រជាជនបានលឿននោះ។

ទូរទស្សន៍សិង្ហបុរី Channel News Asia ស្រង់សម្តីសមាគមរោងចក្រម៉ាឡេស៊ីដែលផលិតថង់ប្លាស្ទិកថា នៅម៉ាឡេស៊ីប្រជាជនម្នាក់ប្រើប្រាស់ថង់យ៉ាងហោចណាស់ក៏ ៣០០ដែររៀងរាល់ឆ្នាំ។ វាបង្ហាញថា បរិមាណថង់ដែលត្រូវគេបោះចូលនោះនឹងបំពុលបរិស្ថានខ្លាំង បើសិនជាគ្មានវិធានការទេ។

កាលពីកុម្ភៈដើមឆ្នាំនេះ លោក មហាធៀ មហាម៉ាត់ នាយករដ្ឋមន្ត្រីទី ៧ របស់ម៉ាឡេស៊ី បានរិះគន់រដ្ឋាភិបាលលោក ណាជីប រ៉ាហ្សាក់ ដែលអនុញ្ញាតឲ្យមានការប្រើប្រាស់ថង់ឡើងវិញនៅរដ្ឋ Selangor ដោយលោកចាត់ទុកថា វាជារឿងអាក្រក់សម្រាប់អនាគតម៉ាឡេស៊ី។ សម្រាប់លោកផ្ទាល់ គោលនយោបាយគាំទ្រ ថង់ដែលអាចប្រើប្រាស់ឡើងវិញ (reusable plastic bags) បាននោះគួរជាអ្វីដែលរដ្ឋាភិបាលម៉ាឡេស៊ីត្រូវយកមកអនុវត្ត។

តាមពិតទៅ សំណល់ប្លាស្ទិកជាកង្វល់ធំបំផុតរបស់ពិភពលោក។ រាល់ឆ្នាំសំណល់នេះមានចន្លោះពី ៥០០ពាន់លានទៅ ១ទ្រីលានថង់ប្លាស្ទិកត្រូវគេប្រើប្រាស់លើពិភពលោក ហើយមានត្រឹមតែ ១០ភាគរយប៉ុណ្ណោះដែលត្រូវគេប្រើប្រាស់ឡើងវិញ។ មិនត្រឹមតែប៉ុណ្ណោះទេ ថង់ច្រើនជាង ៨លានតោនដែលគេប្រើនោះត្រូវបានគេបោះចូលក្នុងសមុទ្ររៀងរាល់ឆ្នាំ ហើយអ្នកជំនាញបារម្ភថា នៅត្រឹមឆ្នាំ ២០៥០ នៅក្នុងសមុទ្រមានថង់ច្រើនជាងចំនួនត្រីផង(បើគិតលើទម្ងន់)៕