លោក ដូណាល់ ត្រាំ ទន្ទឹងរង់ចាំសំបុត្រលោក គីម ជុងអ៊ុន ខណៈការចរចាដើរទៅមុខដោយវិជ្ជមាន

អន្តរជាតិ

លោក ដូណាល់ ត្រាំ ទន្ទឹងរង់ចាំសំបុត្រលោក គីម ជុងអ៊ុន ខណៈការចរចាដើរទៅមុខដោយវិជ្ជមាន

01, Jun 2018 , 8:59 pm

រូបភាព

រូបភាព AFP

ដោយ: តន ចាន់រិទ្ធារ៉ា

មន្ត្រីជាន់ខ្ពស់កូរ៉េខាងជើង នឹងប្រគល់លិខិតមួយច្បាប់របស់មេដឹកនាំកំពូល គីម ជុងអ៊ុន ទៅឲ្យប្រធានាធិបតីអាមេរិក ដូណាល់ ត្រាំ នៅថ្ងៃទី១ ខែមិថុនា។ អនុប្រធានគណៈកម្មាធិការមជ្ឈិបក្សពលករកូរ៉េ គីម យ៉ុងឈុល ដែលកំពុងស្ថិតនៅអាមេរិក នឹងប្រគល់លិខិតនេះឲ្យលោក ត្រាំ ផ្ទាល់ដៃ។ អត្ថន័យក្នុងសំបុត្រនេះអាចមានជាប់ទាក់ទំនងគម្រោងជួបគ្នានៅខែក្រោយ ខណៈអាមេរិក និងកូរ៉េខាងជើងកំពុងចរចាគ្នាដើម្បីឲ្យជំនួបនេះអាចលេចជារូបរាងបាន។

ចាកចេញពីទីក្រុងញូវយ៉ក លោក គីម យ៉ុងឈុល ដៃស្ដាំរបស់មេដឹកនាំកំពូលកូរ៉េខាងជើង គីម ជុងអ៊ុន នឹងធ្វើដំណើរទៅកាន់រដ្ឋធានីវ៉ាស៊ីនតោននៅថ្ងៃទី១ ខែមិថុនាដើម្បីជួបជាមួយប្រធានាធិបតី ដូណាល់ ត្រាំ នៅសេតវិមាន។ ជាមន្ត្រីជាន់ខ្ពស់កូរ៉េខាងជើងទីមួយជាន់សេតវិមានក្នុងរយៈពេលជិត២០ឆ្នាំ លោក គីម ដែលជាអតីតមេចារកម្មផងនោះ ក៏នាំយកសំបុត្រមួយច្បាប់របស់លោក គីម ផ្ញើឲ្យលោក ត្រាំ ផងដែរ។

លោក គីម ដែលក្លាយជាតួអង្គសំខាន់ក្នុងការចរចាជាមួយអាមេរិក បានទៅដល់ទីក្រុងញូវយ៉កដើម្បីចរចាជាមួយរដ្ឋមន្ត្រីការបរទេសអាមេរិករ ម៉ៃ ប៉ុមប៉េអូ ជុំវិញផែនការជំនួបរវាងមេដឹកនាំអាមេរិក និងកូរ៉េខាងជើងនៅសិង្ហបុរី។ យ៉ាងណាមិញ ក្រោយការចរចាអស់ពីរថ្ងៃ ភាគីទាំងសងនៅតែមិនទាន់កំណត់ច្បាស់ថា ជំនួបថ្ងៃទី១២ ខែមិថុនា នឹងដំណើរការតាមគម្រោងឬយ៉ាងណាឡើយ ប៉ុន្តែទទួលបានផ្លែផ្កាគួរឲ្យកត់សម្គាល់។

លោក ប៉ុមប៉េអូ ដែលអះអាងពីភាពជឿនលឿននៃផែនការជំនួបនៅសិង្ហបុរី និយាយថា វាត្រូវការភាពក្លាហានរបស់លោក គីម ជុងអ៊ុន បើចង់ក្ដាប់ឱកាសនេះដែលមួយជីវិតមានម្ដងដើម្បីផ្លាស់ប្ដូរពិភពលោក។ ក្រោយជំនួបជាមួយលោក គីម ក្នុងសណ្ឋាគារក្នុងទីក្រុងញូវយ៉ក ប្រមុខការទូតអាមេរិកសង្កត់ថា៖ «លោក ត្រាំ និងខ្ញុំជឿថា លោកប្រធាន គីម ជាប្រភេទមេដឹកនាំដែលអាចសម្រេចចិត្តតាមផ្លូវនេះ ហើយក្នុងប៉ុន្មានសប្ដាហ៍ និងខែខាងមុខ យើងនឹងដឹងថា រឿងនេះកើតឡើងឬអត់។»

ចំណែកឯលោក ត្រាំ វិញក៏បានទន្ទឹងរង់ចាំសំបុត្ររបស់មេដឹកនាំកូរ៉េខាងជើងដែរ។ ទោះជាព័ត៌មានលម្អិតនៃសំបុត្រនេះមិនទាន់បញ្ចេញក្ដី គេជឿថា អាចមានជាប់ពាក់ព័ន្ធនឹងគម្រោងជួបគ្នានៅសិង្ហបុរី។ នេះក៏ព្រោះតែក្នុងលិខិតថ្ងៃទី២៤ ខែឧសភា ដែលជូនដំណឹងពីការលុបចោលជំនួបប្រវត្តិសាស្ត្រនេះ លោក ត្រាំ បានសង្កត់ធ្ងន់ថា បើលោក គីម ចង់ជួបលោក មេដឹកនាំកូរ៉េខាងជើងអាចទូរសព្ទ ឬសរសេរសំបុត្រទៅឲ្យលោកបានគ្រប់ពេល។

ជុំវិញជំនួបនេះ មន្ត្រីអាមេរិក និងកូរ៉េខាងជើងកំពុងតែចរចាគ្នាយ៉ាងញាប់ដៃជើងទាំងនៅឧបទ្វីកូរ៉េ និងនិងសិង្ហបុរីដើម្បីឲ្យជំនួបនេះលេចចេញពិតប្រាកដ។ ប៉ុន្តែលោក ប៉ុមប៉េអូ នៅតែប្រកាន់ជំហរប្រុងប្រយ័ត្នដដែល ទោះជាការចរចានៅញូវយ៉កមានលទ្ធផលល្អក្ដី។ លោកព្រមានថា ដំណោះស្រាយបន្ទាន់ ទំនងជាមិនអាចរកបានភ្លាមឡើយ ព្រោះអាមេរិកត្រូវជ្រើសរើសផ្លូវដែលខុសពីផ្លូវរបសរដ្ឋាភិបាលមុនៗ៕