អន្តរជាតិ
ក្រោយចូលនិវត្តន៍ ប្រធានក្រុមហ៊ុន Starbucks អាចនឹងឈរឈ្មោះធ្វើប្រធានាធិបតីអាមេរិកឆ្នាំ ២០២០
× ប្រធានប្រតិបត្តិនៃហាងកាហ្វេលំដាប់ពិភពលោក Starbucks លោក Howard Schultz បានប្រកាសនៅថ្ងៃចន្ទ ទី ៤ ខែមិថុនាថា លោកសម្រេចចូលនិវត្តន៍ពីការងារហើយ។ គេវាយតម្លៃថា អ្នកជំនួញរូពនេះប្រហែលជានឹងឈរឈ្មោះជាបេក្ខជនប្រធានាធិបតីនៅឆ្នាំ ២០២០ តំណាងបក្សប្រជាធិបតេយ្យផង។
ស្ថិតក្នុងវ័យ ៦៤ ឆ្នាំលោក Schultz បានបំពេញការងារជាប្រធានប្រតិបត្តិនៃក្រុមហ៊ុន Starbucks បន្ទាប់ពីលោកសម្រេចលាលែងពីតំណែងជានាយកប្រតិបត្តិកាលពីខែមេសាឆ្នាំ ២០១៧។ លោកបានផ្ទេរតំណែងនេះឲ្យទៅលោក Kevin Johnson។
បើតាមសេចក្តីប្រកាសព័ត៌មានរបស់ក្រុមហ៊ុន Starbucks ផ្ទាល់ លោក Schultz នឹងទទួលតំណែងប្រធានកិត្តិយសរបស់ក្រុមហ៊ុន បន្ទាប់ពីលោកចាកចេញនៅចុងខែមិថុនានេះ។
ការប្រកាសចូលនិវត្តន៍ពីកិច្ចការគ្រប់គ្រងក្រុមហ៊ុនរបស់លោក Schultz នេះ បង្កើតឲ្យមានការវាយតម្លៃថា លោកប្រហែលជានឹងចូលក្នុងវិស័យនយោបាយក្នុងនាមជាសមាជិកបក្សប្រជាធិបតេយ្យ ហើយចុងក្រោយលោកនឹងឈរឈ្មោះប្រកួតយកតំណែងប្រធានាធិបតីដែលនឹងមកដល់ក្នុងពេលពីរឆ្នាំទៀតនោះ។
ពាក់ព័ន្ធនឹងការចូលនិវត្តន៍ លោក Schultz បានថ្លែងប្រាប់សារព័ត៌មាន New York Times ថាលោកមិនទាន់សម្រេចចិត្តថា នឹងត្រូវធ្វើអ្វីបន្តទៀតឡើយ ប៉ុន្តែលោកបានសង្កត់ធ្ងន់ថា បច្ចុប្បន្ននេះលោកបារម្ភខ្លាំងពីស្ថានភាពប្រទេសជាតិជាពិសេសការបែកខ្ញែកគ្នាខ្លាំងនៅក្នុងប្រទេសផង ក៏ដូចជាគោលជំហរអាមេរិកនៅលើឆាកអន្តរជាតិផងដែរ។
លោក Schultz និយាយដូច្នេះ៖«រឿងមួយក្នុងចំណោមរឿងជាច្រើនទៀត ដែលខ្ញុំចង់ធ្វើក្នុងជីវិតបន្ទាប់របស់ខ្ញុំនោះ គឺកំណត់ថា ខ្ញុំអាចមានតួនាទីបែបណាដើម្បីជួយសង្គម»។
ពេលសួរថាតើលោកមានគោលដៅឈរឈ្មោះជាប្រធានាធិបតីឬអត់ លោក Schultz បានឆ្លើយតបថា៖«ខ្ញុំគិតពីថា មានជម្រើសច្រើន ហើយវាអាចរួមមានទាំងការធ្វើការងារក្នុងវិស័យសាធារណៈទៀត។ ប៉ុន្តែវាស្ថិតនៅលើផ្លូវវែងឆ្ងាយណាស់ដើម្បីសម្រេចចិត្ត។ ខ្ញុំចង់បម្រើប្រទេសជាតិ ប៉ុន្តែវាមិនមែនមានន័យថា វាទាល់តែខ្ញុំត្រូវឈរឈ្មោះប្រជែងយកតំណែងសាធារណៈដើម្បីបម្រើជាតិឡើយ»។
លោក Schultz បានចូលរួមជាមួយក្រុមហ៊ុន Starbuck នៅឆ្នាំ ១៩៨២ ជានាយកផ្នែកប្រតិបត្តិការ និងទីផ្សារ ហើយលោកបានជួយធ្វើឲ្យក្រុមហ៊ុននេះឈានឆ្ពោះទៅរកភាពល្បីល្បាញពាសពេញពិភពលោក និងមានសាខានៅប្រទេស ៧៧ លើពិភពលោក៕
Tag:
អាមេរិក
Howard Schultz
Starbucks
© រក្សាសិទ្ធិដោយ thmeythmey.com