អន្តរជាតិ
អាមេរិក ឲ្យសមាជិកណាតូបង្កើនទ័ពនិងសព្វាវុធដើម្បីត្រៀមទប់ទល់ការគំរាមរបស់រុស្ស៊ី រដ្ឋមន្ត្រីការពារជាតិអាមេរិក ជេម ម៉ាធីស ជជែកជាមួយអគ្គលេខាធិការបក្សសម្ព័ន្ធយោធាណាតូ Jen Stoltenburg (រូបភាព AFP)
× អាមេរិកកំពុងរៀបចំផែនការទាមទារឲ្យសមាជិកសម្ព័ន្ធយោធាណាតូទាំងអស់បង្កើនចំនួនទ័ព និងសព្វាវុធឲ្យបានច្រើនដើម្បីត្រៀមលក្ខណៈប្រយុទ្ធ។ ផែនការថ្មីរបស់អាមេរិកមានគោលដៅទប់ទល់ការគំរាមកំហែងរបស់រុស្ស៊ី ដែលអាមេរិកអះអាងថា មានបំណងបែងចែកអឺរ៉ុប។ គំនិតផ្ដួចផ្ដើមថ្មីរបស់អាមេរិកលើកនេះ ទំនងជាបង្កើតបញ្ហាសម្រាប់រដ្ឋសមាជិកណាតូ ដែលមានបញ្ហាបរិមាណសព្វាវុធផង ហើយយន្តការស្រដៀងគ្នានេះក៏មានស្រាប់ផង។
រដ្ឋមន្ត្រីការពារជាតិអាមេរិក ជេម ម៉ាធីស នឹងស្វែងរកការឯកភាពពីសមាជិកសម្ព័ន្ធយោធាណាតូជុំវិញផែនការបង្កើនចំនួនយោធា និងអាវុធដើម្បីទប់ទល់រុស្ស៊ី។ លោក ម៉ាធីស នឹងប្រមូលការគាំទ្រពីសំណាក់រដ្ឋមន្ត្រីការពារជាតិណាតូក្នុងកិច្ចប្រជុំថ្នាក់រដ្ឋមន្ត្រីការពារជាតិនៅថ្ងៃទី៧ ខែមិថុនា នៅទីក្រុងព្រុចសែល។ មន្ត្រីអាមេរិក និងណាតូនិយាយថា អាមេរិកក៏នឹងស្វែងរកការគាំទ្រពីជំនួបកំពូលមេដឹកនាំណាតូក្នុងកិច្ចប្រជុំខែកក្កដាដែរ។
យោងតាមទីភ្នាក់ងារព័ត៌មាន Reuters ក្រោមផែនការថ្មីដែលស្គាល់ថា៣០-៣០-៣០-៣០ សម្ព័ន្ធយោធាណាតូត្រូវមានកងទ័ពចំនួន៣០វរសេនាតូច យន្តហោះចម្បាំងចំនួន៣០កង និងកប៉ាល់ចំនួន៣០គ្រឿង ហើយត្រូវត្រៀមខ្លួនពង្រាយក្នុងរយៈពេល៣០ថ្ងៃបន្ទាប់ពីមានបញ្ជាឲ្យប្រុងជើងការ។ ចំនួនទ័ពពិតប្រាកដ ឬក៏ថ្ងៃកំណត់ដើម្បីអនុវត្តយុទ្ធសាស្ត្រថ្មីនេះមិនទាន់បានជជែកនៅឡើយទេ ខណៈចំនួនកងទ័ពក្នុងមួយវរសេនាតូចមានចន្លោះពី៦០០នាក់ទៅ១០០០នាក់តាមប្រទេសនីមួយៗ។
អាមេរិក និងសម្ព័ន្ធយោធាណាតូបានបន្តបង្កើនការប្រុងប្រៀបរបស់ខ្លួនជាលំដាប់ក្រោយរុស្ស៊ីលេបយកតំបន់គ្រីមៀក្នុងឆ្នាំ២០១៤ និងសមយុទ្ធយោធាជាបន្តបន្ទាប់នៅតាមព្រំដែននៅអឺរ៉ុបខាងកើត។ បន្ទាប់ពីនោះ ណាតូបានបង្កើតកម្លាំងឆ្លើយតបពិសេសមួយ និងបានពង្រាយទ័ពចំនួន៤វរសេនាតូចនៅប្រទេសបាល់ទិក និងប៉ូឡូញ ដែលគាំទ្រដោយយោធាអាមេរិក និងអាវុធយុទ្ធភណ្ឌច្រើនទៀត។ ប៉ុន្តែគេមិនទាន់ច្បាស់ថា កម្លាំងនេះអាចពង្រាយបានលឿនឬក៏អាចស្ថិតស្ថិរដល់ពេលណាឡើយ។
ស្របគ្នានឹងគ្នានេះដែរ បញ្ហាប្រឈមមួយនៃគម្រោងរបស់អាមេរិក គឺសំណើរបស់អាមេរិកអាចត្រូវគ្នាជាមួយគំនិតផ្ដួចផ្ដើមដែលមានស្រាប់នៅតំបន់អឺរ៉ុបឬយ៉ាងណា ស្របពេលប្រទេសអឺរ៉ុបក៏មានផែនការជំរុញសមត្ថភាពប្រយុទ្ធរបស់ខ្លួន និងការធ្លាក់បរិមាណអាវុធ។ កាលពីខែធ្នូ ឆ្នាំមុន អឺរ៉ុបបានបង្កើតកិច្ចព្រមព្រៀងមួយសំដៅអភិវឌ្ឍកម្លាំងឆ្លើយតបគ្រោះថ្នាក់ និងអភិវឌ្ឍឧទ្ធម្ភាគចក្រ ក៏ដូចជាកប៉ាល់ចម្បាំងថ្មីផង។
មន្ត្រីការទូតរបស់សម្ព័ន្ធយោធាណាតូម្នាក់និយាយថា ចំនួនកងទ័ពនៅអឺរ៉ុបមានកំណត់ ដែលមិនអាចឲ្យចូលរួមក្នុងគំនិតផ្ដួចផ្ដើមទាំងអស់ឡើយ។ យ៉ាងណាមិញ បើងាកទៅមើលចំនួនទ័ពរបស់ភាគីសងខាង រុស្ស៊ីមានយោធាសកម្មចំនួនប្រហែល៨សែននាក់ ខណៈសម្ព័ន្ធយោធាណាតូវិញមានច្រើនជាងពីរលាននាក់ឯណោះ៕
Tag:
អាមេរិក
NATO
រុស្ស៊ី
© រក្សាសិទ្ធិដោយ thmeythmey.com