ពូទីន៖ ប្រទេសដើរតាមអាមេរិកដាក់ទណ្ឌកម្មលើរុស្ស៊ី កំពុងរងគ្រោះដោយសារអាមេរិកវិញហើយ

អន្តរជាតិ

ពូទីន៖ ប្រទេសដើរតាមអាមេរិកដាក់ទណ្ឌកម្មលើរុស្ស៊ី កំពុងរងគ្រោះដោយសារអាមេរិកវិញហើយ

06, Jun 2018 , 10:59 pm

រូបភាព

ប្រធានាធិបតីរុស្ស៊ី វ្ល៉ាឌីមៀ ពូទីន ក្នុងកិច្ចសម្ភាសជាមួយប្រព័ន្ធផ្សព្វផ្សាយចិន (រូបភាពពីគេហទំព័រប្រធានាធិបតីរុស្ស៊ី)

ដោយ: តន ចាន់រិទ្ធារ៉ា

ប្រធានាធិបតីរុស្ស៊ី វ្ល៉ាឌីមៀ ពូទីន បានសើចចំអកឲ្យប្រទេសដែលដើរតាមអាមេរិក ហើយដាក់ទណ្ឌកម្មលើរុស្ស៊ីដើម្បីឲ្យរុស្ស៊ីផ្លាស់ប្ដូរនយោបាយរបស់ខ្លួន។ ជាមួយការអះអាងថា គ្មានអ្វីធ្វើឲ្យរុស្ស៊ីប្រែប្រួលបាននោះ លោក ពូទីន បានឌឺដងឲ្យប្រទេសមួយចំនួនដែលដាក់សម្ពាធលើរុស្ស៊ីតាមអាមេរិកវិញ ថា កំពុងប្រឈមមុខទណ្ឌកម្មពីសំណាក់អាមេរិកវិញហើយ។ ទោះជាមិននិយាយចំឈ្មោះ មេដឹកនាំរុស្ស៊ីទំនងសំដៅអឺរ៉ុបដែលជាសម្ព័ន្ធមិត្តអាមេរិកតែម្ដង។

ទណ្ឌកម្មរបស់បស្ចិមប្រទេសខ្លាំងមែន តែមិនអាចបង្ខំឲ្យរុស្ស៊ីផ្លាស់ប្ដូរគោលនយោបាយឯករាជ្យលើឆាកអន្តរជាតិឡើយ។ នេះជាសម្ដីរបស់ប្រធានាធិបតីរុស្ស៊ី វ្ល៉ាឌីមៀ ពូទីន ក្នុងកិច្ចសម្ភាសជាមួយប្រព័ន្ធផ្សព្វផ្សាយចិនមុនដំណើរទស្សនកិច្ចផ្លូវរដ្ឋនៅលើទឹកដីចិន។ លោក ពូទីន ប្រកាសជំហររឹងមាំថា រុស្ស៊ីក៏មិនទទួលយកការដោះដូរអ្វីដែលប៉ះពាល់អធិបតេយ្យរបស់ខ្លួនដែរ។

យោងតាមសារព័ត៌មានរុស្ស៊ី RT លោក ពូទីន ជឿថា ទណ្ឌកម្មជាច្រើនលើរុស្ស៊ីរបស់អាមេរិក និងសម្ព័ន្ធមិត្តលោកខាងលិច រាប់ទាំងសហភាពអឺរ៉ុបផង មានគោលដៅតែមួយគត់ គឺបង្អាក់ដំណើរការអភិវឌ្ឍសេដ្ឋកិច្ចរបស់រុស្ស៊ី។ យ៉ាងណាមិញ ប្រធានាធិបតីទើបកាន់តំណែងអាណត្តិទីពីររូបនេះសង្កត់ធ្ងន់ថា គ្មានទណ្ឌកម្មណា ឬវិធានការណាដែលមានសមត្ថភាពគ្រប់គ្រាន់ឲ្យរុស្ស៊ីផ្លាស់ប្ដូរនយោបាយរបស់ខ្លួនបានឡើយ។

«ខ្ញុំជឿថា វាជារឿងអធិបតយ្យរបស់រុស្ស៊ីឬក៏គ្មានរុស្ស៊ីតែម្ដង។ ហើយពិតណាស់ ប្រជាជនរុស្ស៊ីរើសយកជម្រើសទីមួយ។ ខ្ញុំគិតថាប្រជាជនចិនក៏សម្រេចចិត្តដូចគ្នាដែរ។ យើងគ្មានជម្រើសផ្សេងឡើយ។» នេះជាការបញ្ជាក់របស់លោក ពូទីន ក្នុងកិច្ចសម្ភាសដែលផ្សាយដោយទីភ្នាក់ងារព័ត៌មានរុស្ស៊ីនៅថ្ងៃទី៦ ខែមិថុនា។ មិនត្រឹមតែមិនអាចធ្វើអ្វីរុស្ស៊ីឡើយ ការប៉ុនប៉ងរបស់បស្ចិមប្រទេសដែលបំផ្លាញសេដ្ឋកិច្ចរុស្ស៊ី នឹងធ្វើឲ្យប្រទេសដើរតាមអាមេរិកជួបបញ្ហាមិនខាន។

ទោះជាមិនបានបញ្ចេញឈ្មោះប្រទេសណាក្ដី សម្ដីរបស់មេដឹកនាំរុស្ស៊ីរូបនេះពិតជាចង់សំដៅទៅប្រទេសអឺរ៉ុប។ នេះក៏ព្រោះតែរដ្ឋាភិបាលអាមេរិកកំពុងត្រៀមដាក់ទណ្ឌកម្មលើក្រុមហ៊ុនអឺរ៉ុបដែលជាប់ពាក់ព័ន្ធគម្រោងសាងសង់បំពង់បង្ហូរឧស្ម័ន Nord Stream 2 ដែលជាបណ្ដាញដឹកជញ្ជូនឧស្ម័នរបស់រុស្ស៊ី៥០ប៊ីលានម៉ែត្រគូបទៅកាន់ទីផ្សារអឺរ៉ុប។ ក្រៅពីនេះ ប្រទេសខ្លះនៅអឺរ៉ុបក៏ប្រឈមមុខចំណាត់ការដំឡើងពន្ធលើដែកថែប និងអាលុយមីញ៉ូមផង។

ទំនងជួបបញ្ហាខ្លួនដោយសារដើរតាមអាមេរិកនោះ ប្រទេសអឺរ៉ុបខ្លះចាប់ផ្ដើមធុញទ្រាន់ និងចង់រកស៊ីជាមួយរុស្ស៊ីដូចមុន។ សំណើលើកលែងទណ្ឌកម្មលើរុស្ស៊ី ត្រូវបានឮជាហូរហែពីប្រទេសជាច្រើនដូចជាអូទ្រីស និងរដ្ឋាភិបាលថ្មីនៅអ៊ីតាលីជាដើម។ សម្រាប់លោក ពូទីន ទណ្ឌកម្មប៉ះពាល់លើប្រទេសទាំងអស់ រាប់បញ្ចូលទាំងអ្នកដែលបង្កើតវាផងដែរ៕