អន្តរជាតិ
អូស្ត្រាលី សន្យាជួយបណ្តាកោះប៉ាស៊ីហ្វិកមិនឲ្យធ្លាក់ខ្លួនវ័ណ្ឌកនឹងបំណុលរបស់មហាអំណាចចិន
× រដ្ឋាភិបាលក្រុងកង់បេរ៉ាបានសន្យាផ្តល់ជំនួយដល់បណ្តាកោះប៉ាស៊ីហ្វិកដែលមានលក្ខណៈប្រសើរជាងជំនួយអភិវឌ្ឍរបស់ចិននៅពេលខាងមុខ។ ការប្រកាសបែបនេះកើតឡើងដោយសារ អូស្ត្រាលីបារម្ភខ្លាំងពីការកើនឡើងឥទ្ធិពលរបស់ចិន និងលទ្ធភាពនៃការជំពាក់បំណុលចិនវ័ណ្ឌករបស់កោះតូចៗទាំងនោះផង។
រដ្ឋមន្ត្រីការបរទេសអូស្ត្រាលីលោកស្រី Julie Bishop បានសន្យានៅថ្ងៃអង្គារទី ១៩ ខែមិថុនានេះថា រដ្ឋាភិបាលលោកស្រីនឹងផ្តល់ឲ្យប្រទេសកោះប៉ាស៊ីហ្វិកដែលជាមិត្តជិតខាងនូវកញ្ចប់ហិរញ្ញវត្ថុដែលប្រសើរជាងជំនួយអភិវឌ្ឍឬកម្ចីរបស់ចិនផងដែរ។
ថ្លែងប្រាប់សារព័ត៌មាន Sydney Morning Herald លោកស្រី Julie រដ្ឋាភិបាលអូស្ត្រាលីចង់ធានាថា ប្រទេសជិតខាងខ្លួនមានជម្រើសជាជាងពឹងផ្អែកតែលើកម្ចីឬជំនួយរបស់ចិននោះ។ ហើយលោកស្រីសង្កត់ធ្ងន់ថា បញ្ហានេះអាចនាំឲ្យមានផលអវិជ្ជមានច្រើនផងក្នុងនោះមានការជាប់ជំពាក់ជំពិនបញ្ហាបំណុល និងអាចបាត់បង់នូវអធិបតេយ្យរបស់រដ្ឋផងដែរ។
បច្ចុប្បន្ននេះ គម្រោងច្រើនស្អេកស្កះត្រូវបានសាងសង់ឡើងក្រោមគំនិតផ្តួចផ្តើមអភិវឌ្ឍហេដ្ឋារចនាសម្ព័ន្ធ «ខ្សែក្រវាត់មួយវិថីមួយ» (OBOR) ដែលបង្កើតឡើងដោយមេដឹកនាំចិនលោក ស៊ី ជិនភីង។ ប៉ុន្តែអូស្ត្រាលីហាក់ព្រួយបារម្ភខ្លាំងថា បណ្តារដ្ឋតូចៗនៅប៉ាស៊ីហ្វិកទាំងនោះនឹងវ័ណ្ឌកខ្លាំងដោយសារលុយកម្ចីរបស់ចិន ហើយធ្លាក់ខ្លួនស្ថិតក្រោមឥទ្ធិពលផ្តាច់មុខរបស់ចិនថែមទៀត។
សូមទាញការចាប់អារម្មណ៍បន្តិចថា ចាប់ពីឆ្នាំ ២០០៦ ដល់២០១៦ បើតាមរបាយការណ៍វិទ្យាស្ថាន Lowvy របស់អូស្ត្រាលី ចិនបានផ្តល់ជំនួយហិរញ្ញវត្ថុរួមទាំងកម្ចីសម្បទានចំនួន ១,៧៨ពាន់លានដុល្លាររួចទៅហើយ។
លោកស្រី Bishop បានថ្លែងដូច្នេះថា៖« កោះប៉ាស៊ីហ្វិកជារដ្ឋអធិបតេយ្យ។ យើងចង់ធានាថា ពួកគេអាចរក្សាអធិបតេយភាពរបស់ខ្លួនបាន ហើយគេអាចធានាការអភិវឌ្ឍនៃសេដ្ឋកិច្ច និងមិនធ្លាក់ផុងខ្លួននឹងបញ្ហាបំណុលឡើយ។ បញ្ហានោះ គឺ វាអាចមានការលើកលែងបំណុលជាថ្នូរនឹងការទទួលបានអ្វីដែលមានតម្លៃស្មើ ហើយពួកគេនឹងបាត់បង់អធិបតេយ្យតែម្តង»។
វិបត្តិបំណុលនេះធ្លាប់កើតមានឡើងរួចមកហើយក្នុងនោះមានស្រីលង្កាផង។ ស្រីលង្កាបានសម្រេចអនុញ្ញាតឲ្យចិនគ្រប់គ្រងកំពង់ផែទឹកជ្រៅកាលពីឆ្នាំមុនក្រោមកិច្ចព្រមព្រៀងជួលរយៈពេល ៩៩ឆ្នាំ បន្ទាប់ពីរដ្ឋាភិបាលស្រីលង្កាមិនមានលទ្ធភាពសងបំណុលចិនវិញនោះ។
ប្រមុខការទូតអូស្ត្រាលីខាងលើបានបន្ថែមទៀតថា អូស្ត្រាលីនឹងធ្វើគ្រប់យ៉ាងតាមដែលអាចធ្វើបានដើម្បីផ្តល់ជម្រើសសម្រាប់ប្រទេសនានា ដោយឲ្យពួកគេអាចបន្ថយការពឹងផ្អែកលើគំនិតផ្តួចផ្តើមរបស់ចិន។ លោកស្រីបញ្ជាក់ផងដែរថា គម្រោងអូស្ត្រាលីនឹងប្រកួតប្រជែងជាមួយចិនផង និងបំពេញបន្ថែមគ្នាទៅវិញទៅមកផងដែរ។
ដូច្នេះ គំនិតផ្តួចផ្តើមខ្សែក្រវាត់មួយវិថីមួយលែងជាប្រភពទុនតែមួយសម្រាប់ជួយផ្គត់ផ្គង់គម្រោងហេដ្ឋារចនាសម្ព័ន្ធទៀតហើយ។ យ៉ាងណាក៏ដោយ តំណាងរដ្ឋាភិបាលអូស្ត្រាលីរូបនេះមិនបានបញ្ជាក់ឲ្យច្បាស់ថា គម្រោងនោះនឹងជាអ្វីឲ្យប្រាកដឡើយ ប៉ុន្តែលោកស្រីគ្រាន់តែបង្ហើបថា អូស្ត្រាលីនឹងពិភាក្សាជាមួយអង់គ្លេសដើម្បីស្វែងរកលទ្ធភាពបង្កើតកិច្ចសហប្រតិបត្តិការលើគម្រោងប៉ាស៊ីហ្វិកផង៕
Tag:
អូស្ត្រាលី
ចិន
ប៉ាស៊ីហ្វិក
Julie Bishop
© រក្សាសិទ្ធិដោយ thmeythmey.com