ជាតិ
សហព័ន្ធឧស្សាហកម្មយានយន្តនៅកម្ពុជា ពន្យល់ពីចំណុចសំខាន់ៗដែលត្រូវអនុវត្តដើម្បីសុវត្ថិភាពពេលបើកបរ
× សហព័ន្ធឧស្សាហកម្មយានយន្តនៅកម្ពុជា (CAIF) ដែលជាសមាគមន៍មួយប្រមូលផ្តុំទៅដោយក្រុមហ៊ុននាំចូល និងចែកចាយរថយន្តនៅក្នុងកម្ពុជា ក៏មានវត្តមាន នៅក្នុងព្រឹត្តិការណ៍ពិព័រណ៍អឺរ៉ុប ដែលមានក្រុមហ៊ុនចំនួន៥១ ចូលរួមផងដែរ។
ក្នុងនាមជាសមាជិក CAIF និងជាសមាជិកក្រុមប្រឹក្សានៃសហព័ន្ធឧស្សាហកម្មយានយន្តនេះផងលោក ជេមស៍ ហ្សឹមឃី (James ZEMKE) អគ្គនាយកក្រុមហ៊ុន Mercedes-Benz ប្រចាំកម្ពុជា បានឆ្លៀតពន្យល់ត្រួសៗប្រាប់សារព័ត៌មានថ្មីៗ នៅក្នុងស្តង់ពិព័រណ៍របស់ CAIFតែម្តង។
សូមទស្សនាកិច្ចសម្ភាសរវាង កញ្ញា ខន ចំប៉ា អ្នកកាសែតនៃសារពត៌មានថ្មីៗ និងលោក ជេមស៍ ហ្សឹមឃី អគ្គនាយកក្រុមហ៊ុន Mercedes-Benzដូចតទៅ៖
បើតាមលោក មានកត្តាសំខាន់ៗមួយចំនួនដែលអ្នកបើកបររយន្តទាំងអស់ត្រូវតែប្រកាន់ខ្ជាប់ ដែលមានដូចជា អ្នកបើកបររថយន្តត្រូវតែយល់ដឹង និងអនុវត្តតាមច្បាប់ចរាចរណ៍។ ទន្ទឹមនឹងនេះ ពួកគាត់ក៏ត្រូវបើកបរដោយប្រកាន់ខ្ជាប់នូវឥរិយាបថបើកបរល្អផងដែរ ដោយត្រូវពាក់ខ្សែក្រវ៉ាត់សុវត្ថិភាព មិនប្រើប្រាស់ទូរសព្ទក្នុងពេលបើកបរ កុំបើកបរពេលស្រវឹង និងបើកបរដោយប្រុងប្រយ័ត្នជានិច្ច។ នេះបើតាមអគ្គនាយកក្រុមហ៊ុន Mercedes-Benz ដដែល។
តាមលោក ជេមស៍ ហ្សឹមឃី ដដែលការថែទាំរថយន្តទៀងទាត់ និងការប្រើប្រាស់គ្រឿងបន្លាស់ដែលសុទ្ធល្អ ក៏អាចបញ្ចៀសបានគ្រោះថ្នាក់ដែរ។ លោកពន្យល់ដូច្នេះ៖«អ្នកបើកបរត្រូវថែទាំរថយន្តជាប្រចាំដូចជាការត្រួតពិនិត្យកង់រថយន្ត ប្រេងហ្វ្រាំង ដុំហ្វ្រាំង និងផ្លិតទឹកជាដើម។ មួយទៀតការប្រើគ្រឿងក្លែងក្លាយដែលមានគុណភាពទាប ក៏បង្កឲ្យមានហានិភ័យខ្ពស់ដែរ ដូច្នេះអ្នកបើកបរត្រូវគិតពីសុវត្ថិភាពរយៈពេលវែង និងសុវត្ថិភាពរបស់ក្រុមគ្រួសារទាំងមូល»។
លោក ជេមស៍ ហ្សឹមឃី ក៏បានជំរុញឲ្យប្រើប្រាស់រថយន្តដែលល្អផងដែរ ដើម្បីរក្សាសុវត្ថិភាពចរាចរណ៍សម្រាប់អ្នកបើកបរគ្រប់រូប។ មានន័យថា អ្នកត្រូវទិញរថយន្តពីអ្នកលក់ដែលល្អ ទិញរថយន្តដែលផលិតឡើងស្របតាមស្ថានភាពផ្លូវ ត្រូវនឹងប្រភេទប្រេង និងអាកាសធាតុនៅកម្ពុជា និងរថយន្តដែលបំពាក់ប្រព័ន្ធសុវត្ថិភាព ដើម្បីការពារខ្លួនអ្នក និងក្រុមគ្រួសារ៕
Tag:
យានយន្ត
រថយន្ត
ចរាចរណ៍
James ZEMKE
Mercedes
CAIF
© រក្សាសិទ្ធិដោយ thmeythmey.com